2015
Fakatapui ʻo e Feituʻu ne Fakafoki Mai Ai e Lakanga Fakataulaʻeikí
Nōvema 2015

Fakatāpui ʻo e Feituʻu ne Fakafoki Mai Ai e Lakanga Fakataulaʻeikí

ʻI he ʻaho 19 ʻo Sepitema 2015, naʻe puleʻi ʻe Palesiteni Lāsolo M. Nalesoni, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, hono fakatapui ʻo e feituʻu ʻi Penisilivēnia, USA, ne maʻu ai ʻe Siosefa Sāmita mo ʻOliva Kautele ʻa e Lakanga Taulaʻeiki Faka-ʻĒloné meia Sione Papitaisó. Naʻe ʻiloa ʻa e feituʻu ko iá ʻi he 1820 ko Hāmoni, Penisilivēnia, pea naʻe hoko ai ha ngaahi meʻa lahi ʻi he kamataʻanga ʻo e hisitōlia ʻo e Siasí kuo Fakafoki maí:

  • Ko e fetaulaki ʻa Siosefa Sāmita mo ʻEma Heilí, ko ʻena feohi fakakaumeʻá, mo e kamata ʻena nofomalí.

  • Ko e tūʻuta mai ʻa ʻOliva Kautele ke tokoni ko ha tangata tohi ʻi hono liliu ʻo e Tohi ʻa Molomoná.

  • Ko hono liliu e konga lahi ʻo e Tohi ʻa Molomoná.

  • Ko hono fakafoki mai ʻo e Lakanga Taulaʻeiki Faka-ʻĒloné mo e (neongo ʻoku ʻikai ʻiloʻi pau ʻa e feituʻú) Lakanga Taulaʻeiki Faka-Melekisētekí.

  • Ko e ngaahi fuofua papitaiso ne fakahoko ʻi he mafai ʻo e lakanga fakataulaʻeikí ʻi he kuonga ʻo onopōní.

  • Ngaahi fakahā ne maʻu ʻa ia ne hoko ko e vahe 15 ʻi he Tokāteline mo e Ngaahi Fuakavá pea mo ha konga ʻo e Mataʻi Tofe Mahuʻingá.

ʻOku kau ʻi he feituʻu ne toe fakaleleiʻí ha senitā takimamata, ʻa ia ʻoku toe hoko ko ha ʻapisiasi ki ha kolo fakalotofonua; ko e ʻapi ne toe langa ʻo ʻEma mo Siosefa pea mo e ʻapi ʻo e ongomātuʻa ʻa ʻEmá, ʻa ʻAisake mo ʻIlisapesi Heilí; mo e lava ke ʻalu ki he feituʻu ʻi he Vaitafe Sesikuehaná ʻa ia ʻoku pehē naʻe fakahoko ai e papitaiso ʻo Siosefa mo ʻOlivá.

Naʻe pehē ʻe Palesiteni Nalesoni, “Naʻe maʻu ʻe Siosefa ʻi Hāmoni ha feituʻu maʻongoʻongonoa fakalaumālie mo ha malu, ʻo fakaʻatā ia ke tokanga taha pē ki hono liliu ʻo e Tohi ʻa Molomoná. “ʻI he vahaʻataimi ko ʻení, naʻe akoʻi ai ʻe he ʻEikí ʻa Siosefa ʻi hono fatongia fakalangi ko e palōfita, tangata kikite, mo e tangata maʻu fakahā.”

Ko e ʻaʻahi ʻa Palesiteni Lāsolo M. Nalesoni mo hono uaifi ko Uenitií ki he tatau ʻo e ʻapi ʻo Siosefa mo ʻEma Sāmitá, ʻa ia ne fakahoko ai hono liliu e konga lahi ʻo e Tohi ʻa Molomoná.

Paaki