Brian K. Ashton

Tokoni Ua ʻi he Kau Palesitenisī Lahi ʻo e Lautohi Faka-Sāpaté

Naʻe uiuiʻi ʻa Misa Palaieni K. ʻEsitoni ki he kau palesitenisī lahi ʻo e Lautohi Faka-Sāpaté ʻi he ʻamanaki ke ʻosi ʻene ngāue ko ha palesiteni ʻo e Misiona Tekisisi Hiusitoni Sauté. Naʻe fanongonongo hono uiuiʻí ʻi Sune, pea naʻe hikinimaʻi ia lolotonga e konifelenisi lahi ʻo ʻOkatopa 2015.

ʻOku hokohoko atu pē ʻa Misa Teti R. Kalisitā ko e palesiteni lahi, pea tokoni ʻuluaki ʻa Misa Tēvini G. Taulani, ʻa ia ne hoko ko e tokoni ua talu mei ʻEpeleli ʻo e 2014.

Naʻe tupu e ʻatā ʻi he kau palesitenisií, ʻi he fakanofo ʻa Sione S. Tena ke hoko ko e palesiteni ʻo e ʻUnivēsiti Pilikihami ʻIongí–Hauaiʻí.

Naʻe fāʻeleʻi ʻa Palaieni Keni ʻEsitoni ʻi Polovo, ʻIutā, USA, ʻi he 1969, kia Keni mo Viki Palauni ʻEsitoni. Ko e lahi taha ia ʻi ha fānau ʻe toko hiva. ʻOkú ne manatu ki hono akoʻi maʻu pē ʻe heʻene mātuʻá ʻa e ongoongoleleí ʻi ʻapí.

Naʻe ngāue fakafaifekau taimi kakato ʻa Misa ʻEsitoni ʻi he Misiona Pelū Lima Sauté. Naʻe takiekina ʻene fili ke ngāué, ʻe ha kaungāmeʻa lelei naʻá ne ongoʻi ke talaange kiate ia ʻoku fie maʻu ke ʻalu ʻo ngāue fakafaifekau. ʻI hono fakahā ʻe hono kaungāmeʻá ʻene ongó, naʻe ongoʻi ʻe Palaieni hono fakapapauʻi mai ʻe he Laumālié. Naʻá ne faingataʻaʻia lahi fakaesino ʻi heʻene ngāue fakafaifekaú ʻi he taimi ne ui ai ia ke hoko ko e palesiteni ʻo ha fuʻu kolo lahi. Lolotonga e taimi ko ʻení, naʻá ne lotua fakamātoato maʻu pē ha tokoni mei he Tamai Hēvaní. Naʻá ne pehē, “Naʻá ku ako ke falala kiate Ia, pea naʻá Ne tokoniʻi au.” “Kuo hoko ha faikehekehe lahi ʻi he ako ke falala kiate Iá.”

Naʻá ne hū ki he ʻUnivēsiti Pilikihami ʻIongí, hili ʻene ngāue fakafaifekaú , ʻo fetaulaki ai mo hono uaifi ko Melinitā ʻElí. Ka neongo ia, kimuʻa peá na malí naʻe ngāue fakafaifekau ʻa Melinitā ʻi he Misiona Sipeini Malaká kae ngāue ʻa Misa ʻEsitoni ʻi he hihifo lotoloto ʻo e ʻIunaiteti Siteití. Hili ʻene ngāue fakafaifekaú, naʻá na mali ʻi he Temipale Seni Siaosi ʻIutaá. ʻOku ʻi ai haʻana fānau ʻe toko fitu.

Naʻe maʻu ʻe Misa ʻEsitoni ha mataʻitohi MA ʻi he pisinisí mei he ʻUnivēsiti Hāvatí, lolotonga e ako ʻa Sisitā ʻEsitoni ʻi he akoʻanga fakafaitoʻó. Ko ha tokotaha pisinisi ʻa Misa ʻEsitoni pea kuó ne fokotuʻu ha ngaahi kautaha lahi.

Kuo hoko ʻa Misa ʻEsitoni ko ha pīsope, aleaʻanga māʻolunga, palesiteni ʻo e kōlomu ʻo e kaumātuʻá, mo ha faiako ʻi he Tokāteline ʻo e Ongoongoleleí.