Pīsope W. Christopher Waddell

Tokoni Ua ʻi he Kau Pīsopeliki Pulé

ʻI he hoko ʻa Kulisitofā Uātele ko ha tokotaha ʻatelita ʻi he kolisí, naʻá ne maʻu ha sikolasipi volipolo ʻi he ʻUnivēsiti Seni Tieko Siteití ʻi Kalefōniá, USA. Ka naʻá ne ako ke houngaʻia ʻi ha pīsope naʻá ne fehuʻi ange ha ngaahi meʻa kehe lolotonga ʻene ʻi ʻapi he tutukú.

ʻOku manatu ʻa Pīsope Uātele ʻo pehē, “Naʻe ʻikai ke ne pehē, ‘ʻOku fēfē ʻa e volipoló?’ kae ‘ʻOkú ke fēfē hake? ʻOkú ke fai hoʻo ngaahi lotú, tuʻu maʻu, mo mālohi ʻi he Siasí?’ Naʻá ku houngaʻia moʻoni ʻi he ngaahi fehuʻi ko iá [fekauʻaki] … mo e ngaahi meʻa naʻe mahuʻinga tahá.”

Kuo tokoni ʻa e tokanga taha ki he meʻa ʻoku mahuʻinga tahá kia Pīsope Uātele ke ne moʻui ʻaki ha ongo taumuʻa fakafāmili ko e, “Foki ʻi he lāngilangi” mo e “Falala ki he ʻEikí.” Naʻe fakaʻatā ia ʻe he falala ko iá ke fakatatali ʻa e volipoló kae ʻalu ʻo ngāue fakafaifekau. Hili ʻene foki mai mei he ngāue fakafaifekaú, naʻe lava ke ne kaumeʻa mo ha finemui mei ha ʻunivēsiti ʻe taha. Kimui ange hili ʻena malí, naʻe malava ʻi heʻena falala ki he ʻEikí ke na fanongo ki he Laumālié ʻi hono fai ha fili ke hikí.

ʻOkú ne pehē, “Ke ke fai e meʻa kotoa ʻi he founga ʻa e ʻEikí, pea ʻe lelei ia.”

ʻE hokohoko atu hono tāpuekina ʻa Pīsope Uātele ʻi he falala ki he ʻEikí ʻi heʻene hoko ʻeni ko e Tokoni Ua ʻi he Pīsopeliki Pulé, ʻa ia kuo hoko ko ha Fitungofulu Taki Māʻolunga talu mei ʻEpeleli 2011.

Naʻe fāʻeleʻi ʻa Ueini Kulisitofā Uātele ʻi Losi ʻEniselesi, Kalefōniá, ʻi he 1959. Naʻá ne mali mo Kalo Sitenisolo ʻi Siulai 1984 ʻi he Temipale Losi ʻEniselesi Kalefōniá. Ko e mātuʻa kinaua ki ha fānau ʻe toko fā pea ʻi ai ha makapuna ʻe toko tolu. Kuó ne hoko ko ha tokoni ʻi he Kau Palesitenisī Fakaʻēlia ʻi Tokelau Hihifo ʻo Saute ʻAmeliká, pea ʻe nofo ʻi ha vahaʻataimi nounou ʻi Pelū.

Naʻe maʻu ʻe Pīsope Uātele ha mataʻitohi BA mei he ʻUnivēsiti Seni Tieko Siteití ʻi he 1984. Naʻá ne toe hoko atu ʻo ngāue ʻi he polokalama MBA Māʻolunga ʻi BYU. Naʻá ne ngāue mo Merrill Lynch ʻi he kamataʻanga ʻo e 1984, peá ne hoko ai ko e ʻuluaki tokoni palesiteni ʻo e fakahū paʻangá.

Kuo hoko ʻa Pīsope Uātele ko ha Fitungofulu Fakaʻēlia, palesiteni ʻo e Misiona Sipeini Pasaloná (ʻa ia naʻá ne ngāue faifekau taimi kakato kei talavou ai), palesiteni fakasiteiki, tokoni ʻi ha kau palesitenisī fakasiteikí, tokoni ʻi ha kau palesitenisī fakamisiona, pīsope, mo ha tokoni ʻi ha kau pīsopeliki.