Tatau ʻo e Tohi Tapu ʻa e Siasí ʻi he lea faka-Potukalí

Naʻe lava ʻo maʻu ʻi he ʻinitanetí ha tatau ʻo e Tohi Tapu ʻa e Siasí ʻi he lea faka-Potukalí ʻi Sepitema ʻi he AsEscrituras.lds.org pea pehē ki he polokalama Gospel Library ʻi he telefoni toʻotoʻó. ʻOku toe maʻu foki ia ʻi he ePub mo e PDF. ʻE maʻu atu e tatau kuo pākí ʻi Māʻasi 2016, pea maʻu mo e tatau ʻi he ongó mo e Braille ʻi he 2016.

ʻOku fakatefito ʻa e tatau foʻou, ʻoku ui ko e Bíblia Sagrada, Almeida 2015, ʻi he tatau ʻi he 1914 ʻi he liliu ʻa e João Ferreira Annes de Almeida ʻo e tohi Tapú, ʻa ia naʻe fili koeʻuhí ko e tuʻunga māʻolunga ʻo hono liliú. ʻI he malumalu ʻo e fakahinohino ʻa e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá, naʻe ngāue ha timi ʻo e Kau Taki Māʻolungá, Kau Fitungofulu Fakaʻēliá, kau mataotao ʻi he leá, mo e kāingalotu ʻo e Siasí ʻi ha taʻu ʻe nima ke toe vakaiʻi mo teuteuʻi e tatau ʻa e Siasí. ʻOku lea faka-Potukali ha kāingalotu ʻo e Siasí ʻe meimei 1.4 miliona.