Mataʻikoloa ʻo e Fakamoʻoní
ʻOku nofo ʻa e tokotaha naʻá ne faʻú ʻi ʻAmasōnasi, Palāsila.
Ko e hā ʻa e mataʻikoloa ʻoku tupu ʻi hoʻo vahevahe iá?
“Pea ko ʻeni ʻoku ou ʻiloʻi ʻe au … he kuo fakahā ia ʻe he ʻEiki ko e ʻOtuá kiate au ʻaki hono Laumālie Māʻoniʻoní” (ʻAlamā 5:46).
Naʻe sio atu ʻa Sapulina ki he lue atu ʻene Faʻeé ki he matapaá mo honau kaungāʻapí. Naʻe pehē ʻe he tangataʻeikí, “Fakamālō atu ʻi he tohi ko ʻení.” Naʻá ne pukepuke ha Tohi ʻa Molomona.
“Fineʻeiki, ko e hā ʻokú ke talanoa ai kau ki he Siasí ki he taha kotoa pē?” Ko e fehuʻi ange ia ʻe Sapulina lolotonga ʻena fufulu e ʻū peletí.
Naʻe pehē ʻe he Fineʻeikí, “Koeʻuhí he ʻoku hangē ʻeku fakamoʻoni ki he Siasí ha mataʻikoloá.” “ʻOku ou fiefia ai. Pea ʻoku ou fie vahevahe ia mo e niʻihi kehé ke nau fiefia foki mo kinautolu!”
Ne fakakaukauloto ʻa Sapulina ki he kahoa ngingila ʻa e Fineʻeikí ʻi heʻene puha siuelí. “Ko e hā hoʻo ʻuhinga ʻoku hangē ha mataʻikoloá?”
Naʻe pehē ʻe he Fineʻeikí, “Sai, ʻoku mahuʻinga ʻaupito ha fakamoʻoni.” “Ko ha meʻaʻofa ia mei he Tamai Hēvaní ʻoku tokoni ke tau ʻiloʻi e meʻa ʻoku moʻoní.”
“Naʻá ke maʻu fēfē ia?” Naʻe fie maʻu ʻe Sapulina ke ne ʻiloʻi.
Naʻe ʻoange ʻe he fineʻeikí ha peleti maʻa mo ngingila kia Sapulina ke holo mātuʻu. “Naʻá ku maʻu māmālie ia. ʻI he taimi ʻoku ou lotu pe lau folofola aí, ʻoku ou ongoʻi nonga mo māfana ʻi hoku lotó. ʻOku hangē ʻoku ou tānaki atu ki he mataʻikoloa ʻo ʻeku fakamoʻoní.”
Naʻe kamokamo māmālie ʻa Sapulina. ʻE lava nai ke ne maʻu ha mataʻikoloa ʻo e fakamoʻoní?
ʻI he ʻaho Sāpaté, naʻe fai ʻe he faiako Palaimeli ʻa Sapuliná ha talanoa kau kia Sīsū Kalaisi. Naʻe fanongo fakalelei ʻa Sapulina. Naʻe pehē ʻe Sisitā Lōpesi naʻe fakaafeʻi ʻe Sīsū ʻa e fānau iiki kotoa pē ke haʻu kiate Ia. Naʻá ne tāpuakiʻi mo akoʻi kinautolu. ʻI he fakakaukau ʻa Sapulina kia Sīsuú, naʻá ne kamata ongoʻi māfana ʻi hono lotó.
Naʻe fakavavevave ʻa Sapulina ke kumi e Fineʻeikí hili ʻa e Palaimelí. “Mami, ʻokú ke ʻilo ha meʻa?” Naʻá ne fakamatala ki he Fineʻeikí ʻo kau ki he ongo māfaná.
Ne pehē ange e Fineʻeikí, “ʻOku fakaʻofoʻofa ia.” “Ko e ongo ko iá ko e taimi ia ʻoku ueʻi ai ʻe he Laumālie Māʻoniʻoní hotau lotó pea ʻai ke tau ʻiloʻi ʻoku moʻoni ʻa e ongoongoleleí.”
Naʻe malimali hake ʻa Sapulina ki he Fineʻeikí. “Ko e meʻa ia naʻe hokó! Naʻá ku fiefia loto ai.” Naʻe matuʻaki fakalongolongo ʻa e Laumālie Māʻoniʻoní ʻo ʻikai mei fakatokangaʻi Ia ʻe Sapulina kapau ne ʻikai ke ʻapasia.
Naʻe fāʻofua ki ai e Fineʻeikí. “ʻOkú ke maʻu ʻeni haʻo mataʻikoloa pē ʻaʻau ʻo e fakamoʻoní.” Ne toe fāʻofua ʻa Sapulina ki he Fineʻeikí. Naʻá ne fie vahevahe ʻa ʻene koloá mo e taha kotoa pē—ʻo hangē ko ia ne fai ʻe he Fineʻeikí! Ka te ne lava fēfē ke fai iá?
Ne maʻu ʻe Sapulina he pō ko iá ha kaati-tufa ʻoku ʻi ai ha fakatātā ʻo Sīsū ʻi he tafaʻaki ki muʻá. Naʻá ne mono ia ki heʻene kato āfeí.
ʻI he ʻaho hono hokó, ne manatuʻi ʻe Sapulina ʻi he taimi mālōloó e kātí. Naʻá ne toʻo hake ia pea ʻalu ʻo kumi hono kaungāmeʻa ko Keilá. Naʻe pehē ʻe Sapulina, “Ko ē Keila, ko e meʻa ʻeni maʻau.”
Ne pukepuke ofi ʻe Keila e kātí. “Mālō ʻaupito! ʻOku ou saiʻia ʻi he ngaahi fakatātā ʻo Sīsuú.”
Ne fakaʻaliʻali ange ʻe Sapulina kia Keila ʻa e uepisaití ʻi he tafaʻaki ʻe tahá. “Te ke lava ʻo ako lahi ange ʻo kau ki he Siasi ʻo Sīsuú ʻi heni.”
“Ko e fē e siasi ko ia?” Ko e fehuʻi ia ʻa Keilá.
Naʻe talaange ʻe Sapulina ko e “Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. “ʻOku ou fiefia ʻi heʻeku ʻalu ki he lotú pea ako kau kia Sīsuú.”
Naʻe faʻo ʻe Keila ʻa e kātí ki hono kató. “Te u fakaʻaliʻali ange e kātí ni ki heʻeku faʻeé.”
Hili ha ngaahi uike siʻi mei ai, ne lele atu ʻa Keila kia Sapulina he teʻeki kamata e kalasí. Naʻá ne pehē, “ʻOku ʻi ai ha meʻa ke u talaatu!” Naʻá ne fofonga malimali.
Naʻe vēkeveke ʻa Sapulina. Ko e hā nai ʻeni? Naʻe malimali ʻa Keila. “Naʻe ʻalu hoku fāmilí ki hoʻomou lotú! Pea naʻe hangē pē ko ia naʻá ke talamaí—naʻá ku ongoʻi fiefia ai.”
“Naʻá ku ʻilo te ke ongoʻi ʻa e Laumālie Māʻoniʻoní!” Ko e lea ange ia ʻa Sapuliná.
“Pea ʻoku ou tui ʻe vavé ni pē haʻamau papitaiso!”
Naʻe puna hake ʻa Sapulina ʻo fāʻofua kia Keila. Te na lava ʻeni ʻo vahevahe fakataha ʻa ʻena ngaahi mata’ikoloa ʻo e fakamoʻoní!