Pōpoaki ʻa e Faiako ʻAʻahí
Ko e Malí ko e Tuʻutuʻuni ʻe he ʻOtuá
Ako ʻi he faʻa lotu ʻa e fakamatala ko ʻení pea feinga ke ʻiloʻi ʻa e meʻa ke vahevahé. ʻE fakatupulaki fēfē ʻe he mahino ki he “Ko e Fāmilí: Ko ha Fanongonongo ki Māmaní” ʻa hoʻo tui ki he ʻOtuá mo fai tāpuekina ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
ʻOku kei hokohoko atu ʻe he kau palōfitá, kau ʻaposetoló, mo e kau takí ʻa hono “fakahā ʻi he loto māluʻia, ko e mali ʻi ha vā ʻo ha tangata mo ha fefine naʻe tuʻutuʻuni ia ʻe he ʻOtuá pea ko e fāmilí ko e uho ia ʻo e palani ʻa e Fakamoʻuí.”1
Naʻe pehē ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku ʻomi ʻe ha fāmili ʻoku fakahoko ai e malí ʻe ha tangata mo ha fefiné, ʻa e faʻunga lelei taha ki hono fakatupulaki e palani ʻa e ʻOtuá. …
“… He ʻikai lava ʻe ha taha fakamatelie ʻo kitautolu pe ha toe taha ʻo liliu e tuʻutuʻuni fakalangi ko ʻeni ʻo e malí.”2
Naʻe pehē ʻe Poni L. ʻOsikāsoni, ko e palesiteni lahi ʻo e Kau Finemuí: “ʻE lava ʻe he tokotaha kotoa pē neongo pe ko e hā hono tūkunga nofomalí pe tokolahi ʻo e fānaú, ke nau taukapoʻi e palani ʻa e ʻEikí ʻoku fakamatalaʻi ʻi he fanongonongo ki he fāmilí. Kapau ko e palani ʻeni ʻa e ʻEikí, ʻoku totonu ke hoko ia ko ʻetau palani!”3
Naʻe hoko atu ʻa ʻEletā Kulisitofasoni ʻo pehē: “ʻOku ʻi ai hamou niʻihi ʻoku ʻikai ke mou aʻusia e tāpuaki ʻo e malí koeʻuhí, ko ha ngaahi palopalema ʻo kau ai ʻa e ʻikai ha taha taau, fetokangaʻaki ʻa e tangata mo e tangata pe fefine mo e fefiné, ngaahi palopalema fakaesino pe fakaʻatamai, pe ko ha manavasiʻi naʻa ʻikai ke ola lelei. … Pe naʻá ke ʻosi mali pea ʻikai ke ola lelei ʻa e mali ko iá. … ʻOku ʻi ai ha niʻihi ʻo kimoutolu ʻoku ʻikai ha fānau. …
“Naʻa mo ia, … ʻe lava e taha kotoa pē ʻo kau ki hono fakahoko e palani fakalangí he toʻu tangata takitaha.”4
Ngaahi Potufolofola Kehé
Sēnesi 2:18–24; 1 Kolinitō 11:11; Tokāteline mo e Ngaahi Fuakavá 49:15–17
Ngaahi Talanoa ʻa e Kakai Moʻuí
ʻOku manatuʻi ʻe Misa Leli M. Kipisoni, ko ha tokoni ʻuluaki kimuʻa ʻi he palesitenisī lahi ʻo e Kau Talavoú, ʻa e pehē ʻe Seli, ʻa ia ko hono uaifí ʻi he taimí ni:
“ʻOku ou ʻofa ʻiate koe koeʻuhí he ʻoku ou ʻilo ʻokú ke ʻofa ki he ʻEikí ʻo laka hake ʻi hoʻo ʻofa ʻiate aú.’ …
“Naʻe ongo moʻoni ia ki hoku lotó. …
“… [Pea] Naʻá ku fie maʻu ke ne ongoʻi maʻu pē ʻoku mahulu hake ʻa ʻeku ʻofa ki he ʻEikí ʻi ha toe meʻa.”5
Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “Ko e ʻEiki ko Sīsū Kalaisí ʻa e tefitoʻi taumuʻa ʻo ha fetuʻutaki ʻi ha mali fuakava. … [Fakakaukauloto ʻoku] fokotuʻu ʻa e Fakamoʻuí ʻi he tumuʻaki ʻo [ha] tapatolu, pea ʻi ai ha fefine ʻi he tuliki ʻe taha ʻi laló pea ʻi ai ha tangata ʻi he tuliki ʻe taha ʻi laló. Fakakaukau ange leva ki he meʻa ʻoku hoko ʻi he vahaʻa ʻo e tangatá mo e fefiné ʻi heʻena ‘haʻu [fakafoʻituitui] kia Kalaisí’ pea feinga ke hoko ʻo ‘haohaoa ʻiate Iá’ (Molonai 10:32). Tuʻunga pea fakafou ʻi he Huhuʻí, ʻoku ʻalu pē ʻa e taimí mo e toe vāofi ange ʻa e fefiné mo e tangatá.”6