Ngaahi Tali mei he Kau Taki ʻo e Siasí
Founga hono Maʻu ʻo e Fiefiá
Fai ʻe ʻEletā Dallin H. Oaks
ʻO e Kōlomu ʻo e Kau ʻAposetolo ʻe Toko Hongofulu Mā Uá
Mei ha lea ʻi he konifelenisi lahi ʻo ʻOkatopa 1991.
ʻE kāinga, ʻa e toulekeleka mo e kei talavou, ʻoku ou kole kiate kimoutolu takitaha ke manatuʻi kuo teʻeki hoko ʻa e angahalá ko e fiefia pea ʻoku fakatau ʻa e angahalá ki he mamahí. ʻE kakai kei talavou, ʻoua naʻa mou kumi ʻa e fiefiá ʻi he ngaahi meʻa fakaʻofoʻofa mo mamaha ʻo e māmaní. He ʻikai ke tau lava ʻo maʻu ʻa e fiefia ʻoku tolongá ʻi he tulifua ki he ngaahi meʻa ʻoku halá. Ne pehē ʻe ha tokotaha, “He ʻikai lava ke feʻunga e meʻa ʻoku ʻikai ke ke fie maʻú, koeʻuhí he ʻikai fakafiemālieʻi koe ʻe he meʻa ʻoku ʻikai ke ke fie maʻú.”
ʻE kau talavou mo e toulekeleka, hanga homou matá mo homou lotó mei he ngaahi pōpoaki kākā ʻo e mītiá. ʻOku ʻikai ha fiefia ʻi he ʻolokaholó pe faitoʻo konatapú, ko e fakapōpula pē. ʻOku ʻikai ha fiefia ʻi he fetāʻakí, ko e mamahi pē mo e loto mamahi. ʻOku ʻikai ha fiefia ʻi he ngaahi fetuʻutaki fakasekisualé mo e feohi angamaheni fakaesino ʻi tuʻa ʻi he ngaahi haʻi ʻo e nofo-malí, ko e fakamā pē pea vave e hifo ki he hala ki he mate fakalaumālié.
ʻOku ʻi ai ha fiefia tuʻuloa ʻi he meʻa ʻoku tau maʻú. ʻOku maʻu ʻa e fiefiá mo e nēkeneká ʻi he tuʻunga ʻoku ʻi ai ha tahá, kae ʻikai mei he meʻa ʻokú ne maʻú pe hangē ʻoku ʻi aí. Toʻu tupu, tuʻu maʻu ʻi hoʻo ngaahi tuʻunga moʻuí. Ako pea fakaʻaongaʻi ʻa e kiʻi tohi fakamoʻui, Ki hono Fakamālohia ʻo e Toʻu Tupú.
ʻOku ohi ʻe he anga māʻoniʻoní ʻa e anga māʻoniʻoni. ʻOku ongo ʻa e ngaahi ola ʻo e ngaahi sīpinga māʻoniʻoní ki he ngaahi toʻu tangata ka hoko maí. ʻOku tupu mei he tauhi fānau leleí ha toʻu tupu te nau hoko ko ha mātuʻa lelei. ʻOku hangē ko hono fakamālohia ha tokolahi ʻo kitautolu ʻe he ngaahi sīpinga fakaʻeiʻeiki ʻo ʻetau ngaahi kui paionia ʻi he ngaahi fonua lahi, ko ia ʻoku lava ke hoko e ngaahi fili angatonú mo e ngaahi feilaulau ʻa hotau kuongá ni ʻo tāpuekina hotau fāmilí, kaungāmeʻá mo hotau ngaahi fonuá ʻi he ngaahi taʻu ka hoko maí.
ʻOku ou fakamoʻoni kiate kimoutolu ki he fiefia ʻoku tuʻuloá mo e fiefia taupotu taha ʻa kinautolu ʻoku ngāue ʻaki ʻa e tui ki he ʻOtuá mo tauhi ʻEne ngaahi fekaú. ʻOku ou fakalotolahiʻi kimoutolu takitaha ke fekumi ki he fiefia ʻoku maʻu mei hono tauhi ʻo e ngaahi fekau ʻa e ʻOtuá pea fakahoko ha ivi tākiekina anga māʻoniʻoni maʻá e lelei ʻa kinautolu ʻoku tau ʻofa aí.