Ko e Ngāue ʻi he Siasí
Ne ma Fili ke ma Ngāue
ʻOku nofo ʻa e tokotaha naʻá ne faʻú ʻi Pevalia, Siamane.
Naʻe fefaʻuhi hoku husepānití mo e kanisaá, ka naʻá ma tali ʻo ʻikai ha toe momou ʻa e ui ke ma ngāue ʻi he Temipale Felengifeeti Siamané.
Tā fakatātaaʻi ʻe Ben Sowards
ʻI he ʻaho 12 ʻo Tīsema, 1994, ne ma maʻu ai ha telefoni mei Sōleki Siti. Naʻe ongo mai ha leʻo anga fakakaumeʻa ʻo talamai kiate kimaua ʻoku fie talanoa mai ʻa Palesiteni Tōmasi S. Monisoni, ʻa ia naʻe hoko ko e Tokoni Ua ʻi he kau Palesitenisī ʻUluakí he taimi ko iá.
Naʻe talaange ʻe Palesiteni Monisoni ki hoku husepāniti ko Kēhātí, “ʻOku fie maʻu ʻe he palesiteni ʻo e Temipale Felengifeeti Siamané ke ui koe ke ke hoko ko hono tokoni pea mo ho uaifí ke hoko ko ha tokoni ki he metuloni ʻo e temipalé.” Naʻe fakahā mai leva ʻe Palesiteni Monisoni ʻa ʻene tokanga ki he tuʻunga moʻui lelei ʻa hoku husepānití.
Naʻe fekuki ʻa Kēhaati mo e fokoutua kanisā totó ʻi ha taʻu ʻe 11. Neongo e faingataʻa ko iá, naʻe ui kimaua ʻe he ʻEikí, pea ne ma ʻio ange ʻo ʻikai ha momou.
ʻI he taimi naʻá ku fakafisi ai mei heʻeku ngāué ʻi heʻeku teuteu atu ki he ngāue fakafaifekaú, ne ʻeke mai ʻe heʻeku pule ngāué, “Te ke kei nofo mai kapau te u hiki hoʻo vahé?”
Ne u tali ange, “ʻIkai, kuo pau ke ma ʻalu,” peá u talaange kiate ia kuó ma ʻosi palōmesi ki he ʻEikí te ma ʻalu ʻo ngāue fakafaifekau. “Ne ma taumuʻa ke ma ngāue ʻi ha ngaahi taʻu mei heni, ka ʻoku ʻikai ke u ʻilo pe ʻe kei moʻui hoku husepānití ʻo aʻu ki ai.”
ʻI he taimi ne ma maʻu ai ha ola ʻo e sivi angamaheni ʻa Kēhātí hili ha uike ʻe ua nai mei ai, ne talaange ʻe he toketaá kiate ia, “Nofo heni; ʻoku teimōvai ʻa hoʻo moʻuí.”
Naʻe fakaʻau ke toe kovi ange hono tūkungá. Ne ma loto-mamahi pea naʻe ʻikai ke ma ʻilo pe ʻe anga fēfē haʻama fakahoko homa uiuiʻí, ka naʻá ma fonu ʻi he tui, ʻamanaki lelei, mo e loto-fakapapau. Naʻá ma tukuange ʻa e meʻa kotoa ki he toʻukupu ʻo e ʻEikí. Kapau ʻoku ʻi ai Haʻane ngāue maʻamaua, te Ne tofa ha hala ke ma ikunaʻi ia.
ʻI he ʻaho 2 ʻo Sānuali, 1995, ne ma mavahe ki heʻema ngāue fakafaifekaú. Fakafokifā ne u toki fakatokangaʻi ʻa e meʻa kuó u tukuangé: ko ʻeku faʻeé, ʻeku fānaú, hoku makapuná, ʻeku ngāue maʻuʻanga moʻuí, hoku falé, mo ʻeku ngoué. Ka ʻi he ʻaho hono hokó ne ma ʻi he Temipale Felengifētí, ne hoko ai ʻa e pō naʻe fakapoʻulí ko ha ʻaho maamangia foʻou kiate kimaua. Naʻe mavahe atu ʻa e ngaahi mafasia fakaʻaho ʻo e moʻuí meiate kimaua.
Ne ma maʻu ʻi he potu māʻoniʻoni ko ʻení ʻa e ʻofa, maama, ʻamanaki lelei, fiefia, falala, māfana, ongoʻi malu, maluʻi, mo e nonga ʻoku malama mai mei hotau Fakamoʻuí. Naʻá ma fetaulaki ʻi heʻema ngāué mo ha kakai lelei mei ha ngaahi fonua lahi. Neongo naʻa nau lea ʻi ha ngaahi lea fakafonua kehekehe, naʻa mau fetaiaki ʻi he lea ʻo e ʻofá. Naʻá ma fiefia ʻaupito ʻi heʻema ngāue ʻi he temipalé.
Naʻe fakamālohia ʻe he laumālie ʻo e temipalé mo e mālohi ʻo e ʻOtuá hoku husepāniti ʻofeiná ʻi ha māhina ʻe 26. Ne ʻikai fuoloa mei hono tukuange kimaua mei homa uiuiʻi ʻi he temipalé, ne ʻave ʻa Kēhaati ʻi ha ʻaho ʻe taha ki he falemahakí ke fai hono faitoʻo angamahení. Ne tauhi ai ia ʻe he kau toketaá he taimi ko ʻení. Hili ha ngaahi māhina siʻi mei ai naʻá ne foki atu ki hono ʻapi fakalangí.
ʻI heʻeku vakai atu ki aí, ʻoku ou vakai ki he ngaahi taʻu ko ia ʻo ʻema ngāue ʻi he temipalé ko ha meʻaʻofa mei he langí—ke u ngāue fakataha ai mo hoku husepānití ʻi he fale ʻo ʻetau Tamai ʻofá ʻi heʻema fakahoko ʻema palōmesi ke ngāue fakafaifekau fakatahá. ʻOku ou houngaʻia ʻi hoku lotó kotoa koeʻuhí ko e aʻusia ko iá.