Papitaiso pē ʻe Ua?

Thomas R. Coleman, Kenisesi, USA

Tā fakatātā ʻa Allen Garns

Lolotonga ʻeku hoko ko e palesiteni ʻo e Misiona Kuatemala Kuatemala Sití, ne mau maʻu ha kau faifekau taimi kakato foʻou. ʻI heʻeku fakafeʻiloaki ki he kau faifekaú ni, ne u fakamatala kiate kinautolu e talanoa ʻo hoku fakauluí mo e papitaisó.

Naʻá ku talaange ne akoʻi mai ʻe ʻEletā Tēvita ʻAkau mo Ueini Mātiu ʻa e ongoongoleleí ʻi hoku taʻu hivá pea nofo ʻi Kelenitaivi, Monitana, USA. Ne ʻave au ʻe he ongo faifekaú mo ha mēmipa ʻo e Kolo Kelenitaiví ki Uilisitoni, Takouta Noate, USA ʻi ha pongipongi momoko ʻo e faʻahitaʻu momokó ʻi he taʻu 1957 ke papitaiso au ʻi ha faiʻanga papitaiso he ʻapisiasi ko iá.

Hili hono fai ʻeku talanoá pea ʻinitaviu e kau faifekau foʻoú, ne talamai ʻe he taha ʻo kinautolu ko hono hingoá ko ʻEletā Penisimani Peikatoni, ko ʻene kui tangatá ʻa Tēvita ʻAkau. Ko ha meʻa fakafiefia moʻoni! Naʻe papitaiso ʻe ʻEletā ʻAkau ha kiʻi tamasiʻi taʻu hiva ʻi Kelenitaivi, Monitana, pea hili ha meimei taʻu ʻe 50 ne uiuiʻi e tamasiʻi ko iá ko e palesiteni fakamisiona ʻo ʻene mokopuna tangatá.

ʻI he omi ko ia ʻa e ongomātuʻa mo e kui ʻa ʻEletā Peikatoní ke ʻave ia ʻi he ʻosi ʻene ngāue fakafaifekaú, naʻá ku fiefia ke toe feʻiloaki mo Tēvita ʻAkau. Lolotonga ʻema talanoá, ne u fakahā kiate ia ʻa e Tohi ʻa Molomoná—mo ha pōpoaki mo e talaʻofa kuó ne tohi—ʻa ia naʻá ne foaki mai kiate au he ʻaho naʻa ku papitaiso aí.

Naʻe talaange ʻe he faʻē ʻa ʻEletā Peikatoní ne ʻikai faʻa talanoa ʻa ʻene tamaí ʻo kau ki heʻene ngāue fakafaifekaú. Naʻá ne ongoʻi naʻe ʻikai ke fuʻu ola lelei ʻene ngāué he naʻá ne papitaiso pē ha toko ua: ko ha fefine tāutaha mo ha kiʻi tamasiʻi taʻu hiva.

Naʻá ku talaange ʻi he loto houngaʻia koeʻuhí ko ʻene ngaahi ngāué, ne faifai pea kau mai e toenga hoku fāmilí ki he Siasí pea naʻá ku ngāue fakafaifekau taimi kakato mo hoku tokouá, pea mo homa ngaahi foha ʻe toko hiva. Ne u talaange, koeʻuhí ko ʻene ngāue fakafaifekaú, kuo akoʻi ʻa e ongoongoleleí pea kau mai ha kakai taʻefaʻalaua ki he Siasí.

Ne tokangaʻi au ʻe ha kau maʻu lakanga fakataulaʻeiki lelei, moʻui taau mo faivelenga lolotonga e ngaahi taʻu ʻo ʻeku kei siʻí mo e hoko ko ha talavoú, ʻo kamata pē meia ʻEletā ʻAkau mo hono hoa ko ʻEletā Mātiú. Te u houngaʻia maʻu pē ʻi heʻena akoʻi kiate au e ongoongolelei ʻo Sīsū Kalaisí pea ʻomi au ki he puleʻanga ʻo e ʻEikí, ʻo Ne tāpuekina lahi ai au.