Ko Hoku Loki Fakaakeaké
ʻOku nofo ʻa e tokotaha naʻá ne faʻú ʻi ʻIutā, USA.
Ko ʻeku fineʻeikí naʻe puké, ka naʻá ku fie maʻu ke fakamoʻui foki mo au.
Faitā ʻa e ʻata mei muí ʻa e hxdbzyxy/iStock/Thinkstock
ʻI hoku taʻu 17 ne ʻilo ai ʻe heʻeku faʻeé naʻá ne maʻu ʻa e kanisā huhú. Ne lōmekina hoku fāmilí ʻe he meʻa fakaʻohovalé ni pea naʻá ne ʻai au ke u tūʻulutui ʻi he lotu fakamaatoato. Naʻá ku tangi ʻi ha meimei houa ʻe taha, ʻo fehuʻi ki he ʻOtuá pe ko e hā naʻá Ne tuku ai ke hoko ʻení, pea ke Ne fakamoʻui ʻeku faʻeé. Ne kamata ke maʻu ha fakafiemālie ʻi ha ngaahi ʻaho siʻi mei ai ʻi hono ʻilo ʻe he kāingalotu homau uōtí, kāingá, kaungāmeʻá mo e kaungāʻapí e ongoongó. Naʻe vave ʻenau omi ke tokoniʻi kimautolú. Naʻe ʻomi ha ngaahi meʻatokoni, fakafetongi ha ngaahi lea ʻofa mo e ngāue, pea fakahaaʻi ha tokanga mo e fie kaungāmamahi. Naʻe ongo moʻoni e ʻofa ne mau ongoʻi meiate kinautolú.
Ka neongo ne mau maʻu ha tokoni lahi, ne u ongoʻi loto mafasia. Naʻe ʻikai ke u tokanga pe ko e hā ʻe hoko kiate aú. Ne ʻikai ke u toe fai ʻa e meʻa naʻá ku manako aí. Ne u fakapikopiko mo taʻe-tokanga ki he ngaahi ngāue fakaʻapí, ngāue fakaakó, mo hoku uiuiʻi faka-Siasi. Naʻá ku pehē ko ha kavenga lahi ʻa e tūkunga ne u ʻi aí mo e fatongia lahi ange ne u maʻú. Naʻá ku ongoʻi te u lava ʻo fai toko taha e meʻa kotoa pea ʻikai fie maʻu ha tokoni ʻa ha taha.
Naʻe ngāue mālohi ange ʻa Sētane kiate au, ʻo talamai ʻoku totonu ke u ongoʻi mafasia, ʻoku finangalo e ʻOtuá ke ʻoua naʻá ku fiefia, pea naʻe ʻikai ko ha taha makehe au. Ko e meʻa fakamamahí, he naʻá ku tui ki ai ʻi ha kiʻi taimi. Naʻe ʻikai ke u vakai ki he tafaʻaki lelei ʻo ha faʻahinga meʻa. Naʻe ʻikai ke u vakai ko ha ʻofefine au ʻo e ʻOtuá. Ne fakakuihi au ʻe he puputuʻú, pea naʻe ʻikai ke u lava ʻo vakai ki he lahi hoku ngaahi tāpuakí. Naʻe ʻikai ke u lava ʻo sio ki he sioʻatá. Naʻá ku ongoʻi mamahi mo loto mamahi.
Meʻamālié, ne ʻi ai haku kaungāmeʻa ofi naʻá ne fakamoleki ha taimi lahi ke tokoniʻi au, pea naʻe poupouʻi foki au ʻe hoku ngaahi tokouá mo e tuongaʻané. Naʻá ku ongoʻi tauʻatāina lahi ange ki heʻeku ongomātuʻá, peá na ongoʻi tauʻatāina lahi ange kiate au. Ka naʻá ku kei fefaʻuhi pē.
Naʻe faʻa fakafiemālieʻi au ʻe heʻeku faʻeé ʻi he taimi naʻá ku ongoʻi loto mamahi aí. ʻI he taimi ne u ongoʻi ai kuo mole ʻa e ʻamanaki lelei kotoa pē, ne lelei ke ʻi ai ha taha ke talanoa ki ai pea ke tokoni mai. Naʻá ne faʻa haʻu ki ʻapi ʻi he vahaʻataimi ʻo e ngaahi faitoʻó ʻo haiane homau valá, teuteu ha meʻatokoni, pea mo foaki mai ha fakafiemālie mo e faleʻi. Naʻá ku ofo ʻi heʻene lava ke matuʻuaki e ngaahi faingataʻa peheé pea kei taʻe-siokitá.
ʻI heʻeku talanoa mo ia ʻi ha ʻaho ʻe taha ʻo kau ki hoku loto mafasiá, naʻá ne talamai ʻoku ʻikai ʻuhinga ʻeku tangi mo fakahaaʻi ʻoku ou fie maʻu tokoní ʻoku ou vaivai. Naʻá ne tokangaʻi au ʻi he taimi naʻe totonu ai ke u tokangaʻi iá.
Hili ha taha ʻo hono ngaahi tafa lahí, ne ʻi he loki fakaakeaké ʻeku fineʻeikí. ʻI he taimi ko iá, naʻá ku fakakaukau naʻá ku fie maʻu ha loki fakaakeake. Naʻe ʻikai ke u ʻilo pe te u kamata ʻi fē ʻa e founga fakaakeaké, ka naʻe pau ke u fai ha meʻa.
Ko ia naʻá ku kamata leva hono fakafoʻou hoku ngaahi talēnití mo ia ne u malavá pea pehē ki hono fakatupulaki ha niʻihi foʻou. Naʻá ku feimeʻatokoni mo fai e foó. Naʻe toe lahi ange ʻeku lue laló ke u lava ʻo fakakaukaú. Ne u hivaʻi ha ngaahi solo. Naʻá ku ifi kalāneti mo tā piano lahi ange pea kamata ke lelei ange ʻeku tāmeʻá. Ne lahi ange e ngaahi tohi ne u laú. Naʻá ku kamata fanongo lahi ange ki he ngaahi hiva langaki moʻuí. Naʻá ku ʻātakaiʻi au ʻaki e faleʻi mei he kau taki ʻo e Siasí mo ha ngaahi maʻuʻanga tokoni mahuʻinga kehe. Naʻá ku ofi ange ki he ʻOtuá mo hoku Fakamoʻuí ʻi he lotu fakatāutahá, ʻaukaí, mo e ako folofolá.
Ka ne u kei ongoʻi pē ʻoku fakaʻau ke mole atu ʻeku nongá. Naʻe faingataʻa ʻi heʻeku fie maʻu ke u nonga he ngaahi ʻaho ʻe niʻihi, ka naʻá ku ongoʻi loto mamahi aí. Naʻe fakaʻau ke faingataʻa ange ʻa e ngaahi feliliuaki ʻa e ngaahi ongó. Naʻe hangē naʻe toki kamata pē ʻeku fononga ki he nongá.
Naʻá ku ʻalu leva ki he temipalé ke fakahoko e papitaiso maʻá e kau pekiá mo ʻeku kalasi ʻo e Kau Finemuí. Naʻá ku fakakaukau ki heʻeku ngaahi palopalemá lolotonga ʻeku ʻi he temipalé, pea lolotonga ʻeku kumi he ngaahi peesi ʻo ʻeku folofolá. Ne u lau ai kau ki he Fakamoʻuí ʻi he ʻĪsaia 53:4, “Ko e moʻoni kuó ne toʻo kiate ia ʻa ʻetau ngaahi vaivaí, ʻo ne fua ʻetau ngaahi mamahí.”
Hili ha ngaahi miniti siʻi mei ai, ne mole e puputuʻu naʻá ne fakakuihi mo fakatupu ʻeku mamahi lahí. Naʻe ala mai e ʻEikí ʻi he fakapoʻulí mo e loto-foʻi ʻo hoku lotó pea tuku e nonga ʻo e Laumālié. Ne u ongoʻi e mahino mo e fiefia ko ia naʻe fuoloa e ʻikai ke u ongoʻí. Naʻá ku vakai ki he lahi ʻo e ngaahi tāpuaki ne u maʻú mo e lahi e meʻa ne fai ʻe he taha kotoa maʻá ku mo hoku fāmilí. Naʻá ku vakai ki heʻeku vāofi ange mo hoku fāmilí mo e kaungāmeʻá. Ne u vakai ko ha ʻofefine fakaʻofoʻofa moʻoni au ʻo e ʻOtuá.
Naʻá ku maʻu ʻi he temipalé ʻa hoku loki fakaakeaké.
ʻI heʻeku toe vakai ki he aʻusia ko ʻení, ʻoku ou ʻiloʻi ai kuó u fie kaungāmamahi mo angaʻofa ange he taimí ni kiate kinautolu ʻoku faingataʻaʻia ange ʻiate aú. ʻOku ou ʻilo e feituʻu ke u fakaakeake aí. Naʻe hoko ʻa e taʻu faingataʻa taha ʻo ʻeku moʻuí ko e taʻu lelei taha ia ʻo ʻeku moʻuí.