ʻOhake ha Ngaahi Foha Moʻui Taau
Janness Johnson, Kalefōnia, USA
Tā fakatātā ʻa Stan Fellows
ʻI he ngaahi taʻu kuo hilí, ʻi heʻeku kei hoko ko ha faʻē tāutahá, ne u ongoʻi lomekina ʻi hono tokangaʻi mo poupouʻi ʻeku fānau ʻe toko faá, ne ʻomi ʻe heʻeku faʻeé mo e tuongaʻané ha meʻaʻofa lahi naʻe lava ai ke u foki ki he ʻunivēsití. Lolotonga ʻeku fakaʻuli ki he akó, te u fakakaukau ki heʻeku ngaahi ʻamanakí mo e ngaahi fakaʻānaua maʻa ʻeku fānaú. Ne u papi ului ki he Siasí. Ko ʻeku fakaʻamu taupotu tahá ke nau maʻu e faingamālie ke akoʻi e ongoongoleleí ki he niʻihi kehé pea ʻoatu e fiefia naʻá ku ongoʻí.
ʻI heʻeku fakaʻuli atu ki he akó ʻi ha pongipongi ʻe taha, ne u fakakaukau ki heʻeku ongo tama tangata lalahi tahá, naʻe vāmamaʻo hona ʻaho fāʻeleʻí ʻaki ha māhina ʻe 22. Kapau te na ngāue, ʻe ʻosi e ngāue fakafaifekau ʻa e lahi tahá ʻi he taimi ke kamata hono tehiná. Naʻá ku fāinga mo e meʻá ni pea fifili pe te u lava ʻo tokoniʻi kinaua ke totongi ʻena ngāue fakafaifekaú. Ne ʻikai ke u fakapapauʻi te u maʻu e paʻanga ke ʻave e ʻuluakí, pe ko e fika uá.
Ne hokohoko atu e faingataʻaʻiá ni ʻi ha ʻaho ʻe tolu, lolotonga ia ʻoku ou lotua ha tali. Naʻe maʻu mai e talí ʻi he ʻaho hono nimá: “ʻOhake ha ngaahi foha moʻui taau. ʻOku faingofua hono maʻu ʻa e paʻangá; ka ʻoku ʻikai pehē e ngaahi foha moʻui tāú.”
Ne fonu hoku lotó ʻi he nonga. Ne mamaʻo ʻaupito e talí mei he ngaahi hohaʻa fakapaʻangá ʻou ofo ai. Ko ʻeku ngāué ke ʻohake ha fānau moʻui taau. ʻE lava ke u fakahoko e efiafi fakafāmili ʻi ʻapí, maʻu lotu, ʻave ʻeku fānaú ki he seminelí, pea tokoniʻi hoku ngaahi fohá ʻi he ngaahi ʻekitivitī ʻa e Kau Talavoú. Te u lava ʻo ʻai ke hoko e lotú, ʻaukaí, mo e lau folofolá ko ha konga ʻo ʻemau moʻui fakafāmilí. Naʻá ku ʻilo kapau te u fai ʻeku tafaʻakí, mahalo ʻe maʻu ʻe heʻeku fānaú ha faingamālie ke ngāue fakafaifekau.
Makehe mei heʻemau ngāue angamahení, ne ʻi ai haʻamau faiako fakaʻapi lelei ne ʻofa ʻi homau fāmilí. Naʻá ne haʻu maʻu pē mo hono uaifí he māhina takitaha. Naʻá ne akoʻi ʻeku fānaú ʻi he ngaahi lēsoní, ʻoange kiate kinautolu ha ngaahi tāpuaki, pea kau atu ki heʻenau ngaahi polokalama sipotí. Ne ʻave ʻe he kaungāmeʻá hoku ngaahi fohá ki he ngaahi fakataha lakanga fakataulaʻeiki fakasiteikí pea mo e ngaahi nofo kemi pō kakató. Naʻe ʻoange ʻe ha kau mēmipa ʻo e siteikí ha faingamālie ke nau ngāue ai pea maʻu ha paʻanga, ʻi ai mo ha kaungāʻapi ne hangē ha toe mātuʻá, mo ha kau faiako ne nau akoʻi kinautolu ke mapuleʻi kitá pea fakahoko e lelei tahá ʻi he akó, mūsiká mo e sipotí.
ʻI he taʻu 19 hoku foha lahi tahá, ne maʻu e paʻanga ki heʻene ngāue fakafaifekaú. Ko e meʻa ne hokó, ne maʻu e paʻanga ke ʻalu e fānau kotoa ʻe toko faá ʻo ngāue. Naʻa nau ngāue ʻi Mekisikou, Palāsila, Saute Kalolaina mo Veisinia, USA. Ne aʻu ki ha taimi ne ngāue fakafaifekau ai e ongo ua iiki tahá ʻi he taimi tatau!
Kuo hanga ʻe he aʻusia ko iá ʻo ʻai ke u faʻa fakakaukau ki he folofola ʻa e ʻEikí ʻi he tohi ʻa ʻĪsaiá: “ʻOku ʻikai ko hoʻomou ngaahi mahaló ʻa ʻeku mahaló, pea ʻoku ʻikai ko homou ngaahi halá ʻa hoku ngaahi halá” (ʻĪsaia 55:8).
ʻOku tali ʻa e ngaahi lotú ʻi heʻetau muimui ki he faleʻi ʻoku tau maʻú, pea ʻoku faʻa muiaki mai ai e ngaahi tāpuakí. ʻOku ou ʻilo ne liliu e moʻui ʻa ʻeku fānaú mo e niʻihi ne nau akoʻí ʻi he ngāue naʻa nau fakahoko maʻá e ʻEikí. Kuo faitāpuekina ʻe heʻenau ngāué ʻa homau ʻapí pea ʻe kei hokohoko atu ia ʻi ha ngaahi toʻu tangata.