Naʻá ne Lau ʻEku Fakamoʻoní

Faith Watson, ʻIutā, USA

Tā fakatātā ʻa Allen Garns

ʻI hono tali ʻeku telefoní, naʻá ku fanongo ki he leʻo fiefia ʻo ha taha ʻo e kau faifekau taimi kakato fakalotofonuá ʻokú ne fakamatala mai ʻo kau ki ha papitaiso ʻe fakahoko ʻi ha ngaahi ʻaho siʻi. Ko e meʻa fakafiefia maʻu pē ki he kau faifekaú ʻa e papitaisó, ka naʻe ʻikai ke u ʻiloʻi e hingoa ʻo e fefine ne ʻamanaki papitaisó. Ka naʻe kei vili mai pē ʻe faifekaú ke u ʻalu ange he ʻoku ʻi ai ha meʻa fakaʻohovale ʻe hoko kiate au. Naʻe ʻikai ke ne toe fakamatala mai ha meʻa.

ʻI he ʻaho ʻo e papitaisó, naʻe vave ʻeku aʻu atu ki ʻapisiasí ke ʻilo pe ko e hā e meʻa fakaʻohovalé. Ka naʻe ʻikai ke u ʻilo ʻa e finemuí—ko ʻAlisi—ʻa ia ʻoku teuteu ke papitaisó, pea naʻe ʻikai haʻane fakaʻilonga ʻokú ne ʻiloʻi au.

Hili e papitaiso fakaʻofoʻofa fonu Laumālié, ne toʻo ʻe ʻAlisi ha Tohi ʻa Molomona ʻi heʻene fai ʻene fakamoʻoni ki hono moʻoní, ʻo fakahaaʻi ʻene houngaʻia ʻi hono ngaahi akonakí, tautautefito ki hono fakamoʻoni ʻo e Fakamoʻuí. Naʻá ne fakamatala ʻi heʻene fakamoʻoní ki he founga naʻá ne maʻu ai e tohí. Naʻá ne ngāue ʻi ha loki ʻi ha falekoloa (mall) fakalotofonua. Naʻe haʻu ha fefine ʻi ha ʻaho ʻe taha ʻo ʻoange ʻa e tohí ki heʻene pulé. Naʻe ʻikai tokanga ki ai e pulé pea tuku ia ʻi ha funga laupapa.

Hili ha taimi nounou mei ai, ʻi he hiki e pisinisí mei he lokí, ne talaange ʻe he pulé kia ʻAlisi ke lī e tohí. Ka naʻe fie ʻilo ʻa ʻAlisi, peá ne sio taimi nounou ki he tohí, pea kole ange pe ʻe lava ke ne maʻu ia.

Ne ʻalu ʻa ʻAlisi mo e Tohi ʻa Molomoná ki ʻapi, lau ia ʻi loto ʻi ha ngaahi uike siʻi, pea naʻá ne tui ʻoku moʻoni. Ka naʻe ʻikai ke ne ʻilo ʻa e meʻa ke faí. Hili ha ngaahi māhina siʻi naʻe maʻu haʻane ngāue ʻe taha ʻo ne ngāue ai mo ha mēmipa ʻo e Siasí. Naʻá ne fakaʻekeʻeke ia fekauʻaki mo e Tohi ʻa Molomoná pea mo e Siasí, naʻe fakaafeʻi ia ʻe he tokotahá ni mo hono malí ke feʻiloaki mo e kau faifekaú.

Ne pehē leva ʻe he fefiné ni ʻokú ne loto ke lau ʻa e fakamoʻoni ʻoku tohi ʻi muʻa ʻi he Tohi ʻa Molomoná. Ko ʻeku fakamoʻoní ia. Ne u tuku ia ai kimuʻa pea ʻoange ki he pule ʻa ʻAlisí.

Ne malimali fiefia ʻa e ongo ʻeletaá. Ko e meʻa fakaʻohovale fakaʻofoʻofa taha ʻeni kuó u aʻusia ʻi heʻeku moʻuí! Hili e papitaisó, naʻe fakavave mai hoku tokoua foʻou ʻi he ongoongoleleí ke fāʻofua kiate au.

Ne u fiefia ke mamata ki hono papitaiso ʻo ʻAlisí mo fanongo ki heʻene fakamoʻoni loto-fakatōkilaló, ʻa ia ne maʻu ʻi hono lau e Tohi ʻa Molomoná pea lotu ʻo hangē ko e faleʻi ʻa Molonaí: “Kapau te mou kole ‘i he loto-fakamātoato, mo e loto-moʻoni, ‘o maʻu ‘a e tui kia Kalaisi, te ne fakahā ‘a hono moʻoní kiate kimoutolu ‘i he mālohi ‘o e Laumālie Māʻoniʻoní” (Molonai 10:4).

ʻOku ou kei ongoʻi e loto houngaʻia ʻi hono fakaʻatā au ke fai ha tokoni ki ha taha ʻo e fānau ʻa e ʻOtuá ke maʻu e ngaahi tāpuaki ʻo e ongoongolelei ʻo Sīsū Kalaisí.