Toʻo Kongokonga Lalahi mei he Konifelenisi Lahi Fakataʻu Hono 186 ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní

Naʻe kamata ʻa e fakataha pongipongi Tokonaki ʻo e konifelenisi lahi ʻo ʻEpelelí ʻaki ha fakaafe meia Palesiteni Henry B. Eyring ʻo ne poupouʻi ai e kau fanongó ke nau lotua e kau leá mo e kuaeá, kimuʻa pea mo e lolotonga ʻenau leá. Pea ʻi he fakaʻosinga ʻo e konifelenisí ʻi he hoʻatā Sāpaté, naʻe pehē ai ʻe ʻEletā Jeffrey R. Holland: “Kapau te ke sio he ngaahi ʻaho ka hoko maí … ki he ngaahi meʻa ʻi hoʻo moʻuí ʻoku teʻeki ai ke fenāpasi mo e ngaahi pōpoaki kuó ke fanongo ai he fakaʻosinga ʻo e uike ko ʻení, ʻoua naʻá ke ongoʻi lotosiʻi. … Ko e meʻa lelei fekauʻaki mo e ongoongoleleí ko ʻetau maʻu ha lelei ko ia heʻetau feingá, neongo kapau ʻoku ʻikai ke ola lelei maʻu pē“ (peesi 125, 126).

Ko honau ui ke ngāué, ʻoku fakahaaʻi mo fakamālohia ai e ui meia Palesiteni Thomas S. Monson “ʻi heʻetau fakakaukau atu ki he ngaahi fili ʻoku tau fai ʻi heʻetau moʻuí he ʻaho takitahá, … kapau te tau fili ʻa Kalaisi, ta kuo tonu ʻetau filí” (peesi 86).

Ne kau he ngaahi meʻa mahuʻinga mei he konifelenisí ʻa e:

• Fanongonongo ʻe Palesiteni Monisoni ha temipale foʻou ʻe fā: ʻi Belém, Brazil; Quito, Ecuador; Lima, Peru (temipale hono uá); pea mo Harare, Zimbabwe (vakai ki he talanoá ʻi he peesi 142).

• Hikinimaʻi ʻo ha Kau Taki Māʻolunga foʻou ʻe toko 11 (kamata honau piokalafí he peesi 131).

• Hikinimaʻi ʻo ha kau palesitenisī foʻou ʻo e Palaimelí (kamata honau piokalafí he peesi 136).

• Fanongononga ʻo ha polokalama foʻou maʻá e fakafoʻituituí mo e ngaahi fāmilí ke nau tokoni ki he kau kumihūfanga honau feituʻú (vakai, peesi 13, 111, mo e 141).

• Tokanga makehe ki he ngaahi vā fetuʻutaki fakafāmilí, tautautefito ki he fatongia ʻo e kakai tangatá ʻi heʻenau hoko ko ha husepāniti, tamai mo e taha maʻu lakanga fakataulaʻeikí.

• ʻIlo fakatokāteline mei he kau lea hangēko ʻEletā Dale G. Renlund: “ʻI heʻetau ʻunuʻunu ofi ange ki he ʻOtuá, ʻe hū mai ki heʻetau moʻuí ʻa e mālohi fakaivia ʻo e Fakalelei ʻa Sīsū Kalaisí. Pea hangē ko e ongo ākonga ne na fononga he hala ki ʻEmeasí, te tau ʻilo ai ne tau feohi pē mo e Fakamoʻuí lolotonga ʻetau fonongá (peesi 42).