Sisitā Jean B. Bingham

Tokoni ʻUluaki ʻi he Kau Palesitenisī Lahi ʻo e Palaimelí

Kuo ʻofa moʻoni ʻa Sisitā Sini Palasi Pingihemmi ʻi he taʻu ko ʻeni ʻe ono naʻe ngāue ai ʻi he poate lahi ʻa e Palaimelí. Kuó ne ʻaʻahi ki ha ngaahi ʻapi ʻo e kāingalotú, ʻalu ki ha ngaahi houalotu ʻa e Palaimelí, mātā e tui mālohi ʻa e Kāingalotú—tautautefito ki he fānau Palaimelí—ʻi he funga ʻo e māmaní.

Kuo fakaʻaongaʻi ʻe Sisitā Pingihemi, ne toki ui ko e tokoni ʻuluaki ʻi he kau palesitenisī ʻo e Palaimelí, ha konga lahi ʻo ʻene moʻuí ʻi hono akoʻi, lehilehiʻi mo ʻofa he fānaú. Tatau ai pē pe ko ʻene feohi mo hono fototehiná heʻenau tutupu haké pe ko ʻene ongo tamaiki fefiné, fānau fefine ohí, makapuná pe niʻihi ʻoku ʻaʻahi ange ki hono ʻapí, pe niʻihi kuo nau feʻiloaki lolotonga ʻene mēmipa he poate lahi ʻo e Palaimelí, kuó ne hoko ko ha taukapo mo ha maʻuʻanga ivi ki ha tokolahi.

Naʻá ne pehē, “ʻOku fakaofo e meʻa ʻe lavaʻi ʻe he kiʻi tamasiʻi mo e taʻahine kotoa, kapau te tau vakai kiate kinautolu ʻi he fofonga ʻo e Tamai Hēvaní, te tau lava ʻo tokoniʻi kinautolu ke nau aʻusia e tuʻunga kuó Ne fakataumuʻa kinautolu ki aí.”

Naʻe fāʻeleʻi ʻa Sisitā Pingihemi ʻi he ʻaho 10 ʻo Sune 1952, ʻi Polovo, ʻIutā, USA, kia Edith Joy Clark mo Robert Rowland Barrus, pea ko e fika tolu ia ʻi ha fānau ʻe toko hiva. ʻI heʻene kei māhina ʻe tolú, naʻe hiki ai hono fāmilí ki ʻInitiana ke lava ʻo hoko atu e ako ʻene tamaí. ʻI he fuofua taʻu ʻe ono ʻo e moʻui ʻa Sisitā Pingihemi, naʻá ne nofo ai mo hono fāmilí ʻi ha siteiti ʻe fā.

Hili e hiki ʻa Sisitā Pingihemi mei he akoʻanga māʻolunga ʻi Niu Sēsií, naʻá ne hiki ai ki Polovo, ʻIutā ke ne ako he ʻUnivēsiti Pilikihami ʻIongí. ʻI he taʻu hono ua ʻene ako aí, naʻá ne fetaulaki ai mo e tokotaha ʻe hoko ko hono husepānití, ko Bruce Bryan Bingham, ko ha tamasiʻi faama mei ʻIlinoisi naʻe papitaiso heʻene kei talavoú mo ʻene ongomātuʻá. Naʻá na mali ʻi he ʻaho 22 ʻo Tīsema 1972, ʻi he Temipale Provo Utah.

Kuo kau ʻi heʻene ngaahi fuafatongia he Siasí ʻene hoko ko ha palesiteni Palaimeli ʻo e uōtí, palesiteni ʻo e Kau Finemuí, tokoni ʻi he kau palesitenisī ʻo e Fineʻofá, palesiteni ʻo e Kau Finemuí ʻi he siteikí, ngāue fakatemipale pea mo ha faiako semineli pongipongi.

Naʻe lea ʻa Misa Pingihemi ʻo fekauʻaki mo hono uaifí ʻo pehē, “ʻI he taʻu ʻe 43 ʻo ʻema nofo malí, ʻoku ʻikai ha toe liliu he sīpinga kuó u mātā ʻi heʻene moʻuí, ʻi heʻene muimui maʻu pē ki he ngaahi ueʻi ʻa e Laumālié. Kuó ne toutou fakahoko maʻu pē e meʻa ʻoku finangalo ʻa e ʻEikí ke ne faí.”