ʻEletā Mark A. Bragg

Fitungofulu Taki Māʻolunga

ʻI he taimi naʻe taʻu 14 ʻa Maʻake Pelekí, naʻe hanga ʻe hano kaungāmeʻa heʻene timi peisipoló ʻo fakafeʻiloaki hono fāmilí ki he Siasí. Naʻe papitaiso ʻa Maʻake pea mālohi ʻene faʻeé he Siasí.

Naʻe pehē ʻe ʻEletā Peleki, “Naʻá ne liliu ʻemau moʻuí.”

Naʻe fāʻeleʻi ʻa Mark Allyn Bragg ʻi he ʻaho 16 ʻo ʻEpeleli 1962, ʻi Sanitā Mōnika, Kalefōnia, USA kia Donald E. mo Diane Bragg.

Lolotonga e ako ʻa ʻEletā Peleki ʻi he ʻUnivēsiti ʻo ʻIutaá, naʻe ui ia ke ne ngāue ʻi he Misiona Mexico Monterrey Mission, ʻi hono kei puleʻi ʻe he palesiteni fakamisiona ko Roy H. King mo hono uaifí ko Darlene O. King.

ʻI he ʻosi e ngāue fakafaifekau ʻa ʻEletā Pelekí, naʻe kamata ʻeva leva ki he ʻofefine siʻisiʻi taha ʻo ʻene palesiteni fakamisioná, ko ʻĪvoni. Naʻá na mali he temipale Losi ʻEniselesi Kalefōniá ʻi he ʻaho 17 ʻo Māʻasi 1984.

Hili e pekia fakafokifā e tamai ʻa ʻEletā Pelekí, naʻe toe foki e ongomātuʻá ki Kalefōnia ke ne kamata ngāue fakapangikē (naʻá ne fakakakato hono fatongia ko e tokoni palesiteni ʻi he Bank of America) pea ke ne ofi ai ki he faʻē ʻa ʻEletā Pelekí.

Naʻe ʻosi he taʻu ʻe fitu pea toki maʻu ha fānau ʻi he fāmili Pelekí. ʻOku manatu ʻa ʻEletā Peleki ʻo pehē, “Ne ʻi ai ha ngaahi taimi ne ongoʻi hangē ʻoku kehe homau fāmilí.”

Pea ʻi he—“ʻaho fisifisimuʻa taha ʻi he māmaní”—ne faʻeleʻi ai ʻe Sisitā Peleki e lahi taha ʻo ʻema fānau ʻe toko faá. Naʻe pehē ʻe ʻEletā Peleki, “ʻOku ou manatuʻi … ʻeku fakakaukau, mahalo ʻoku ʻikai ha taha ia ʻe toe fiefia ange ʻiate au he momeniti ko iá.”

Ka naʻe ʻikai faingofua maʻu pē ʻa e moʻuí ki he fāmilí. Hili e ʻaho naʻe hikinimaʻi ai ʻa ʻEletā Peleki ke hoko ko ha pīsope ʻi he uooti naʻe tupu hake aí, naʻe mate fakafokifā ʻene faʻeé lolotonga ha kaihaʻa kā. Ko e fuofua meʻafakaʻeiki ia ke ne puleʻi heʻene kei pīsopé. ʻOkú ne manatu ʻo pehē, “Naʻe ʻi ai maʻu pē kau Fineʻofá he ʻaho kotoa pē maʻa homau fāmilí.”

ʻE hanga ʻe he ngaahi lēsoni ko ʻeni ʻo e ʻofá, tokoní mo e manavaʻofá ʻo tataki ʻa ʻEletā Peleki lolotonga hono ngaahi fatongia he Siasí—heʻene hoko ko ha palesiteni fakasiteikí, Fitungofulu Fakaʻēliá pea mo ha taha ngāue ouau he temipalé.