Sisitā Bonnie H. Cordon

Tokoni Ua ʻi he Kau Palesitenisī Lahi ʻo e Palaimelí

Kuo ako ʻe Poni Hailame Kōtoni ha ngaahi lēsoni mahuʻinga ʻo e moʻuí, ʻi heʻene kei tupu hake ʻi he fakatonga hahake ʻo ʻAitahō, USA. ʻOku pehē ʻe he tokoni ua ʻi he kau palesitenisī lahi ʻo e Palaimelí, naʻe hanga ʻe he ngāue, vaʻinga mo e moʻui ʻi ha fāmá ʻo akoʻi ia ke “ʻoua te ne manavasiʻi ke fai ha meʻa.”

Ka naʻe hoko mai e lēsoni mahuʻinga tahá mei heʻene ongomātuʻá ko Harold mo Carol Rasmussen Hillam, ne na akoʻi ia te ne lava ʻo fai ha faʻahinga meʻa pē ʻi he tokoni ʻa e ʻEikí. Naʻe faʻa pehē ʻe heʻene tamaí, “ʻOku ʻikai ha fakangatangata.”

Naʻe fakafalala ʻa Sisitā Kōtoni ki he ʻilo ko iá ʻi heʻene hoko ko ha faifekau ne toki uiuiʻi ʻi Lisiponi, Potukalí, ʻi heʻene faifeinga ke ako e lea faka-Potukalí. “Naʻá ku faʻa lotu ʻo kolea ha mana. Ka koeʻuhí ko ʻeku tamaí, ne u ako ai te u lava ʻo fai ha ngaahi meʻa faingataʻa.”

Hili haʻane faʻa lotu, ngāue mālohi mo kātaki, naʻe kamata māmālie ke ne poto he lea faka-Potukalí, pea kuo faitāpuekina ai ʻene moʻuí ʻi ha ngaahi taʻu lahi mei ai, ʻi hono ui ia mo hono husepānití ke na ngāue ʻi Curitiba, Brazil.

ʻOkú ne pehē, “ʻOku mālie hono teuteuʻi kitautolu ʻe he ʻEikí mo Ne langaki hake kitautolú, fakakongokonga peé.” “ʻOku toe ʻuhinga mālie ia he taimi ʻoku tau toe manatu ai ki aí. Pau ke tau maʻu pē ʻa e tuí.”

Naʻe fāʻeleʻi ʻa Bonnie Hillam ʻi he ʻaho 11 ʻo Māʻasi 1964, ʻi Idaho Falls, Idaho. Hili ʻene ngāue fakafaifekaú, naʻá ne ako ki he education ʻi he ʻUnivēsiti Pilikihami ʻIongí ʻi Polovo, ʻIutā, USA. Lolotonga ʻene ʻi aí, naʻá ne kaungāmeʻa lelei ai mo Derek Lane Cordon. Naʻe iku ʻena kaungāmeʻá ke na feʻofaʻaki, pea naʻá na mali ʻi he ʻaho 25 ʻo ʻEpeleli 1986, ʻi he Temipale Sōlekí. ʻOku ʻi ai haʻana fānau ʻe toko fā—tamaiki tangata ʻe toko tolu mo ha fefine ʻe taha—pea mo ha makapuna ʻe toko tolu.

Kuó na ngāue ʻi ha ngaahi uiuiʻi kehekehe he Siasí ʻi he ngaahi taʻu lahi. Naʻá ne ngāue mo hono husepānití heʻene tokangaʻi e Misiona Brazil Curitiba mei he 2010 ki he 2013, pea kuó ne hoko ko ha palesiteni ʻo e Kau Finemuí ʻi he siteikí, taki nēsilī, faiako semineli, pea ngāue ʻi he ngaahi houalotu ʻa e Kau Finemuí, Fineʻofá mo e Palaimelí ʻi he uōtí.

ʻI haʻane lea fekauʻaki mo hono fatongia foʻoú, naʻe pehē ai ʻe Sisitā Kōtoni, ʻokú ne fakaʻamu ke akoʻi ha foʻi moʻoni mahuʻinga ʻe taha ki he fānau Palaimeli ʻo e Siasí: “ʻOku ʻofa e Tamai Hēvaní ʻiate kinautolu.”