ʻEletā W. Mark Bassett

Fitungofulu Taki Māʻolunga

Ko e faʻahitaʻu māfana kotoa pē ʻi he kei siʻi ʻa W. Mark Bassett, naʻá ne fononga mo hono fāmilí mei honau ʻapí ʻi he feituʻu Sakalamenitō, Kalefōnia, USA, ke ʻaʻahi ki heʻene kui fefiné, he tafaʻaki ʻene faʻeé, naʻe nofo ʻi ʻAlapama, USA. Lolotonga e ngaahi ʻaho ʻo ʻenau fononga ki aí, naʻe ʻaʻahi maʻu pē fāmilí ki he ngaahi feituʻu fakahisitōlia ʻo e Siasí.

Tatau ai pē pe ko e ʻaʻahi ki he ngaahi feituʻu fakahisitōlia ʻo Nāvū, ʻIlinoisí pe ko e ʻeveʻeva pē ʻi he Vaoʻakau Tapu ʻi Palemaila ʻi Niu ʻIoké, ka ʻoku manatu ʻa ʻEletā Pāseti ki he ngaahi ongo mālohi naʻá ne maʻu—ʻi heʻene kei tamasiʻí—ʻi heʻene ʻaʻahi ki he ngaahi feituʻu toputapu ko iá.

Naʻá ne pehē, “Ne mau ongoʻi ha meʻa ai.” “Ko e founga ia ne maʻu ai ʻeku fakamoʻoní, ʻo fakafou he fanga kiʻi aʻusia īkí.”

Kuo hoko ʻa e fakamoʻoni ko ia ne maʻu heʻene kei talavoú ko ha ha maʻuʻanga ivi kia ʻEletā Pāseti, ʻi heʻene moʻuí kotoa.

Naʻe fāʻeleʻi ia he ʻaho 14 ʻo ʻAokosi 1966, kia Edwina Acker mo William Lynn Bassett, ʻi Carmichael, Kalefōnia, pea ko ʻEletā Pāsetí ko e fika ua ia ʻi he fānau ʻe toko nima. Naʻe hoko e ngāue ʻi he Siasí mo hono moʻuiʻaki ʻo e ongoongoleleí ko ha ngaahi meʻa mahuʻinga naʻe fakamuʻomuʻa ʻe honau fāmilí.

Hili ʻene ngāue ʻi he Misiona Kuatemala Kuatemala Sití mei he 1985 ki he 1987, naʻe hiki ʻa ʻEletā Pāseti ki Polovo, ʻIutā, ke ako ʻi he ʻUnivēsiti Pilikihami ʻIongí. Naʻá ne mali mo Angela Brasher ʻi he Temipale Sōlekí ʻi he ʻaho 20 ʻo Tīsema 1989. Ko e mātuʻa kinaua ki he fānau ʻe toko nima pea ʻoku ʻi ai mo hona makapuna ʻe toko ua.

ʻI he 1991, naʻe maʻu ai ʻe ʻEletā Pāseti hano mataʻitohi fakatauhitohi mei BYU peá ne hiki kimui ange mo hono fāmilí ki he ʻēlia Sakalamenitoó ke ngāue ʻi he ngāueʻanga fakatautuki wholesale ai e meʻalelé. Naʻá ne ngāue ko e pule ki he tafaʻaki fakapaʻangá ʻi he Brasher’s Sacramento Auto Auction peá ne hoko ko ha ʻōfisa pule fakapaʻanga pea ne co-owner ʻa e kautaha fakatautuki meʻalele ko e West Coast Auto Auctions, Inc., naʻe fakatautuki atu ai ʻa e ngaahi meʻalelé ʻi he fakahihifo ʻo e ʻIunaiteti Siteití.

Naʻe ngāue ʻa ʻEletā Pāseti ʻi ha ngaahi fatongia kehekehe ʻi he Siasí, kau ai ʻene hoko ko ha palesiteni ʻo e Kau Talavoú, pīsope, aleaʻanga māʻolunga, palesiteni fakasiteiki, palesiteni ʻo e Misiona ʻAlisona Mesá mei he 2007 ki he 2010, pea mo ha Fitungofulu Fakaʻēlia.