ʻEletā Valeri V. Cordón

Fitungofulu Taki Māʻolunga

Ne maʻu ʻe ʻEletā Valeri Vladimir Cordón Orellana ha fakavaʻe ʻi he ongoongoleleí mei heʻen faʻeé ʻi heʻene kau ki he Siasí ʻi hono taʻu 16, pea naʻe tokoni lelei ia kiate ia ʻi he taimi naʻá ne hiki ai ʻi ha maile ʻe 95 (150 km) mei hono kolo tupuʻanga ko Sakapa ʻi Kuatemalé, ki he ako māʻolunga ʻi Kuatemala Sití ʻo ne ako ai ki he saienisi ʻo e komipiutá.

“Ko e meʻa mahuʻinga taha naʻá ku maʻu mei heʻeku faʻeé, ko e ongoʻi ʻaʻapa ʻaupito ki he ngaahi meʻa toputapu ʻa e Siasí,” ko e manatu ia ʻa ʻEletā Kōtoni, ʻa ia ko e foha ʻo Ovidio mo Ema Orellana Cordón.

Naʻe fāʻeleʻi ʻa ʻEletā Kōtoni ʻi he ʻaho 19 ʻo Fēpueli 1969, ʻi Kuatemala Siti, pea naʻá ne tupu hake pē ʻi Sakapa. Naʻe ʻalu ʻene tamaí ke ngāue ʻi Sikākou, ʻIlinoisi, ʻi he ʻIunaiteti Siteití. ʻI heʻene kei ʻi aí, naʻe takiekina ia ʻe ha kāingalotu ʻo e Siasí peá ne maʻu ai e pōpoaki ʻo e ongoongoleleí mei he kau faifekaú. Naʻe sila ʻa e fāmilí ʻi he Temipale Mesa ʻAlesoná ʻi he 1972, ʻi he kei taʻu tolu ʻa Vālelií.

ʻOku pehē ʻe ʻEletā Kōtoni naʻá ne tupuhake ʻo ʻofa ʻi he ongoongoleleí ʻi heʻene fanongo ki hono toutou hivaʻi ʻe heʻene faʻeé e fanga kiʻi hiva ʻa e Siasí hangē ko e “Fānau Au ʻa e ʻOtuá” pea mo e “ʻOku ou Fie Faifekau.” Naʻe ngāue ʻa ʻEletā Kōtoni ʻi he Misiona El Salvador mei he 1987 ki he 1989.

Naʻá ne mali mo Glenda Zelmira Zea Diaz ʻi he ʻaho 25 ʻo Māʻasi 1995, ʻi he Temipale Kuatemala Siti Kuatemalá. Naʻe taumuʻa pē ʻa Sisitā Kōtoni ke ngāue fakafaifekau ka naʻe liliu ʻene ngaahi palaní he taimi naʻe fetaulaki ai mo Vālelií. Naʻá ne toki fakatokangaʻi kimui ange ko e talavou ʻeni naʻe toʻoa ai hono lotó, ʻi heʻene sio he laʻitā ʻo Vāleli ʻi he makasini ʻa e Siasí he ngaahi taʻu kimuʻá. ʻOku ʻi ai hona ʻofefine ʻe toko tolu.

Naʻe maʻu ʻe ʻEletā Kōtoni hono mataʻitohi BA mei he ʻUnivēsiti Mariano Galvez ʻi Kuatemala ʻi he 2010 pea mo hano mataʻitohi MA ʻi he fakalele pisinisí mei he ʻInisititiuti Fakatekinolosia ʻo Masasūsetí ʻi he 2012. Naʻá ne ngāue ko ha talēkita ʻo e information systems ʻi ha kautaha fakatauʻanga faitoʻo pea mei he 2012 ʻi he Pepsico Foods Mexico, ʻi ʻAmelika Lotoloto mo e ʻOtu Kalipiané.

ʻI he taimi naʻe uiuiʻi ai ʻa ʻEletā Kōtoní, naʻá ne lolotonga ngāue ʻi he Kōlomu hono Fā ʻo e Kau Fitungofulú ʻi he ʻĒlia ʻAmelika Lotolotó. Naʻá ne ngāue ʻi he kau palesitenisī ʻo e Misiona Costa Rica San José East mei he 1998 ki he 2000.