ʻEletā Gary B. Sabin

Fitungofulu Taki Māʻolunga

ʻOku manatuʻi lelei ʻe ʻEletā Keuli B. Sāpini ha fuʻu ʻakau kilisimasi ʻe tolu.

Ko e ʻuluakí, ko ha fuʻu ʻakau Kilisimasi fakaʻofoʻofa ʻi heʻene kei ʻi he toʻu tupú. ʻI he kaka ʻa Keuli he fuʻu ʻakaú ke aʻu ki ha foʻi lolé, naʻe holofa e fuʻu ʻakaú.

Ko hono uá, ko ha vaʻa ʻo e fuʻu ʻakau kilisimasi naʻá ne maʻu heʻene kei ngāue fakafaifekau ʻi Pelisiumé mo e ʻOtu Netalení ʻi he 1973 ki he 1975. Naʻe ʻave ʻe ʻEletā Sāpini mo hono hoá e vaʻa kaú ni ki hona fale nofoʻangá ʻo fokotuʻu ia he tafaʻaki ʻo e fanga kiʻi kaati Kilisimasi ne na maʻu mei hona ʻapí.

Ko e tolú ko ha fuʻu ʻakau ne faʻu ʻaki e fanga kiʻi maama Kilisimasí ʻo tau he meʻa tautauʻanga vaisiliva (IV) he veʻe mohenga hono ʻofefiné ʻi falemahakí. ʻI he fānau Sāpini ʻe toko tolú,ne kau hono ʻofefiné he mahaki ʻo e maʻamaʻá (cystic fibrosis), pea naʻe fai ai hano tafa ʻo fetongi hono ongo maʻamaʻá hili ha taʻu ʻe taha mei he mālōlō siʻono kiʻi tuongaʻané he mahaki tatau pē.

ʻOku pehē ʻe ʻEletā Sāpini, “Kuo tau ako lahi mei heʻetau fānaú ʻo lahi ange ia he meʻa kuo nau ako meiate kitautolu.”

ʻI heʻene hoko ko ha Taki Māʻolungá, te ne manatuʻi e fanga kiʻi ʻakau Kilisimasí mo e meʻa kuó ne ako meiate kinautolú. ʻOku hanga ʻe he fuʻu ʻakau takitaha ʻo fakaʻilongaʻi ha konga ʻo hono hala fonongá—mei heʻene fie kai lole he kei siʻi, ki heʻene hoko ko ha faifekau naʻá ne akoʻi e palani ʻo e fakamoʻuí, ki ha tamai ne fakafalala ki he ʻofa e Fakamoʻuí ke paotoloaki siʻono fāmilí ʻi he ngaahi faingataʻa ʻo e matelié.

Naʻe fāʻeleʻi ʻa Gary Byron Sabin ʻi Polovo, ʻIutā, USA, ʻi he ʻaho 7 ʻo ʻEpeleli 1954, kia Marvin E. mo Sylvia W. Sabin. Naʻá ne mali mo Valerie Purdy ʻi ʻAokosi ʻo e 1976. Ko e mātuʻa kinaua ki ha fānau ʻe toko nima; naʻe fāʻeleʻi mai e fika onó kuo siʻi mālōlō.

Hili ʻene ʻosi mei he ʻUnivēsiti Pilikihami ʻIongí ʻi Polovó, naʻe maʻu ʻe Eletā Sāpini hono mataʻitohi MA mei he ʻUnivēsiti Sitenifōtí.

Kuo ngāue ʻa ʻEletā Sāpini ʻi ha ngaahi uiuiʻi kehekehe ʻi he Siasí; kau ai ʻene hoko ko ha pīsope, palesiteni fakasiteiki, mo ha Fitungofulu Fakaʻēlia. Naʻá ne fokotuʻu, sea mo CEO ʻi ha ngaahi kautaha lahi, kau ai e Excel Reality Trust, Price Legacy, Excel Reality Holdings mo e Excel Trust.

ʻI he 1993, naʻe fokotuʻu ai ʻe ʻEletā mo Sisitā Sāpini ʻa e kautaha ngāueʻofa ko e Sabin Children’s Foundation, ko ʻenau tefitoʻi taumuʻá ke tokangaekina e ngaahi fie maʻu fakafaitoʻo ʻa e fānaú.