ʻEletā Peter F. Meurs

Fitungofulu Taki Māʻolunga

ʻI he kei siʻi ʻa Pita Miuasí, naʻá ne nofo mo hono fāmilí ʻo kaungāʻapi mo ha tangata naʻá ne fakalele ha falekoloa “ngaahi ha meʻa pē” ne maumau ʻi he meʻangāue fāmá. Naʻá ne fakamoleki ha taimi lahi mo hono kaungā-tangatá ʻi he falekoloá ʻo vaʻinga mo e meʻangāué pea faʻu ha fanga kiʻi paiki iiki mo ha fanga kiʻi saliote. Naʻe ako ʻenisinia fakamakēniki ʻa Pita kimui ange ʻi he ʻUnivēsiti Monash ʻi Melipoane, ʻAositelēlia.

Lolotonga ʻene kei feinga akó ʻi hono taʻu 18, naʻá ne poaki mālōlō ki he ʻunivēsití ʻi ha taʻu ʻe ua ke ne ʻalu ʻo ngāue fakafaifekau ai ʻi he Siasí. Naʻe talaange ko e taʻu pē ʻe taha ʻe lava ke ne fakatoloi aí; ka toe lōloa ange ai ʻe mole hono faingamālie ki he polokalamá. Naʻá ne fili ke ʻoua te ne ngāue.

Ka ʻi he hili ha taimi nounou mei ai, naʻá ne fanongo ki hono talaki ʻe Palesiteni Sipenisā W. Kimipolo (1895–1985) ʻi ha konifelenisi lahi ʻoku totonu ke ngāue fakafaifekau ʻa e talavou moʻui taau kotoa pē (vakai, “Planning for a Full and Abundant Life,” Ensign, May 1974, 87).

“Hangē naʻe lea tonu mai pē ia kiate aú. Ne ongo moʻoni ia kiate au,” ko e manatu ia ʻa ʻEletā Miuasí. Naʻá ne fakakaukau leva ke ʻalu ā ia ʻo ngāue. ʻI ha uike ʻe taha kimuʻa pea mavahé, naʻá ne maʻu ai ha tohi mei he ʻunivēsití ʻo fakaʻatā mai ke toloi ʻene akó ʻi ha taʻu ʻe ua.

Naʻe toe foki ʻa Pita ʻo ako hili ʻene ngāue fakafaifekaú, ka ʻokú ne pehē ko ʻene ngāue fakafaifekaú ko e “ako lelei taha ia kuó u maʻú.” Naʻe akoʻi ange ʻe he ongoongoleleí kiate ia ko e “tefitoʻi moʻoni lelei taha ʻo e tuʻunga fakatakimuʻá ko hono tokoniʻi ko ia ʻo e kakaí ke nau lavameʻá.”

Hili e maʻu e mataʻitohi BA ʻo ʻEletā Miuasi ʻi he ʻenisinia fakamīsiní, naʻá ne ngāue leva ko ha ʻenisinia maʻá e Esso Australia, pea naʻá ne kaunga ʻi hono fokotuʻu ʻo e WorleyParsons Limited. Naʻá ne toki hoko ko e talēkita fakalakalaka ʻa e Fortescue Metals Group.

Hili ʻene ngāue fakafaifekaú, naʻá ne mali mo ha fefine ʻokú ne ui hono kaumeʻa lelei tahá, ko Maxine Evelyn Thatcher, ʻi he ʻaho 2 ʻo Sānuali 1979, ʻi he Temipale Hamilton New Zealand. ʻOku ʻi ai haʻana fānau ʻe toko fā mo e makapuna ʻe toko hiva.

Naʻe fāʻeleʻi ʻa ʻEletā Miuasi ʻi he ʻaho 21 ʻo Tīsema 1956, ʻi Warrnambool, Victoria, Australia kia Frederik mo Lois Jones Meurs—pea kuó ne ngāue ʻi ha ngaahi fatongia lahi, kau ai ʻene hoko ko ha palesiteni ʻo e kōlomu kaumātuʻá, tā ʻōkani ʻa e uōtí, palesiteni ʻo e Kau Talavoú ʻi he uōtí mo e siteikí, talēkita public affairs, palesiteni fakakolo mo e fakavahefonua, pīsope, palesiteni fakasiteiki mo e Fitungofulu Fakaʻēlia.