Mensahe sa Visiting Teaching
Ang Pag-ula ni Kristo Mao ang Katin-awan sa Gugma sa Dios
Tun-i sa mainampuong paagi kining materyal ug tinguhaa ang inspirasyon aron masayud unsay angay nga ipakigbahin. Sa unsang paagi ang tumong sa Relief Society nag-andam sa mga anak sa Dios nga mga babaye alang sa mga panalangin sa kinabuhing dayon?
Hugot nga Pagtuo, Pamilya, Kahupayan
Ang panabut nga ang atong Langitnong Amahan mipadala sa Iyang Bugtong Anak aron kita makaangkon og pagka-imortal ug ang potensyal alang sa mahangturong kinabuhi makatabang kanato sa pagbati sa walay kinutuban ug dili matugkad nga gugma sa Dios alang kanato. Ang atong Manluluwas nahigugma usab kanato.
“Kinsa ba ang makapahimulag kanato gikan sa gugma ni Kristo? …
“Kay masaligon ako nga walay kamatayon, o kinabuhi, o mga manolunda, o mga punoan, o mga butang karon, o mga butang umalabut, o mga gahum,
“O kahabugon, o giladmon, o bisan unsa diha sa tibuok kabuhatan, nga arang makapahimulag kanato gikan sa gugma sa Dios, sa gugma nga anaa kang Kristo Jesus nga atong Ginoo” (Mga Taga-Roma 8:35, 38–39).
Sa Pag-ula ni Jesukristo, si Elder D. Todd Christofferson sa Korum sa Napulog Duha ka mga Apostoles miingon: “Ang pag-antus sa Manluluwas sa Getsemani ug ang Iyang paghingutas sa krus nagtubos nato gikan sa sala pinaagi sa pagtagbaw sa gipangayo sa kaangayan ngari kanato. Iyang kaloy-an ug pasayloon kadtong maghinulsol. Ang Pag-ula ni Jesukristo nagbayad usab sa utang nga nautang sa kaangayan nato pinaagi sa pag-ayo ug pagbayad nato sa bisan unsa nga pag-antus nga inosente natong giantus. ‘Kay tan-awa, siya miantus sa mga kasakit sa tanan nga mga tawo, oo, ang mga kasakit sa tanan nga buhi nga binuhat, mga lalaki, mga babaye, ug mga bata, nga nahisakop sa banay ni Adan’ (2 Nephi 9:21; tan-awa usab sa Alma 7:11–12).”1
Si Kristo “misilsil [kanato] sa mga palad sa [Iyang] mga kamot” (Isaias 49:16). Si Linda K. Burton, Kinatibuk-ang Presidente sa Relief Society, miingon, “Kanang labing gamhanang buhat sa gugma unta mopaluhod kanato diha sa mapainubsanong pag-ampo sa pagpasalamat sa atong Langitnong Amahan sa paghigugma kanato igo nga Iyang gipadala ang Iyang Bugtong ug hingpit nga Anak sa pag-antus sa atong mga sala, sa atong mga kaguol, ug sa tanang ingon og dili makiangayon sa atong indibidwal nga mga kinabuhi.”2