Ang Makahupay nga Gahum ni Kristo
Paghulagway pinaagi ni Allen Garns
Pipila ka tuig na ang milabay ang akong higala nga si Joseph nagplano nga modrayb gikan sa Utah ngadto sa Washington, D.C., USA. Gidapit ko sa pag-uban niya sa biyahe. Sa among pagpaingon gibisitahan namo ang nagkalain-laing mga dapit sa kasaysayan sa Simbahan, ug sa dihang miabut mi sa East Coast, mipaingon mi ngadto sa Siyudad sa New York.
Mga duha pa lang ka semana human sa mangilngig nga hitabo sa Septyembre 11, 2001. Kusog kaayo ang among gibati nga mobisita sa lugar diin naguba ang Twin Towers.
Nakakita kami og usa ka sundalo nga naggiya sa daghang mga tawo samtang sila nanan-aw sa mga nangaguba. Mitunol siya og mga tisyu aron ipahid sa mga luha sa mga tawo.
Si Joseph ug ako mibati kon unsa ka dako ang gibati nga kasakit sa tanan, ug ganahan mi nga makatabang. Nakahukom kami nga ang labing maayong butang nga among mahimo mao ang pagpakigsulti sa mga tawo, pagpaminaw sa ilang mga istorya, ug tingali mopakigbahin og mensahe ngadto kanila sa paglaum sa gipahiuli nga ebanghelyo ni Jesukristo.
Sa among pagpaingon balik sa among hotel, miagi mi sa subway. Naglingkod sa akong atbang mao ang usa ka babaye nga nagbasa og libro. Naghunahuna ko kon unsay kahay nahitabo sa iyang kinabuhi. Nagpaila ko sa akong kaugalingon ug gisultihan siya nga nagbisita mi sa New York. Miingon ko nga ganahan mi sa iyang mga kasinatian sa bag-ong nahitabo sa Septyembre 11.
Ang iyang pangalan mao si Maria, ug dugay na siyang nagpuyo sa Siyudad sa New York City. Nagtrabaho siya sa usa ka building nga dili layo sa mga tower. Miingon siya namo nga pipila ka semana sa wala pa ang Septyembre 11, duna siyay kusog nga gibati nga kinahanglan siyang mag-ampo ug mangutana kon aduna bay Dios. Miingon siya nga hangtud nianang higayona sa iyang kinabuhi, wala pa siya makaampo og maayo sukad ug wala gayud kaayo mobati sa panginahanglan. Wala siya makabati sa tubag sa iyang pag-ampo hangtud sa pag-ataki sa mga terorista sa mga tower nianang matahum nga kabuntagon. Ang kaguliyang ug kalibug miabut sa tanan nga diha sa iyang palibut, apan siya kalit nga mibati og kakalma. Misulti si Maria namo nga iyang gibati ang talagsaong kalinaw ug nga, bisan pa sa tanang dili mapasabut nga kalaglagan nianang higayona, gibati niya nga ang Dios diha nagtan-aw kaniya.
Human kini masulti ni Maria kanamo, si Joseph ug ako misulti kaniya nga iyang gibati ang Espiritu sa iyang Langitnong Amahan sa paagi nianang espesyal nga kalinaw ug kahupayan. Gisultihan namo siya nga mahimo niyang mabati kana nga kalinaw, samtang magtinguha siya Kaniya pinaagi sa pag-ampo ug pinaagi sa pagbasa sa Basahon ni Mormon. Gihatagan namo siya og kopya sa Basahon ni Mormon ug misulti kaniya nga ang basahon makahatag kaniya og padayon nga kalinaw nga iyang gitinguha. Nalipay kaayo siya nga midawat niini ug nagpasalamat kanamo.
Wala ko masayud unsay sunod nga nahitabo sa istorya ni Maria tungod kay si Joseph ug ako kinahanglan nang manaog, apan nasayud ko nga ang Langitnong Amahan nahigugma sa matag usa sa Iyang mga anak. Nasayud ko nga Siya nakahibalo sa mga detalye sa atong kinabuhi, ilabi na kon ang kahimtang ingon og dili na mao sa atong palibut. Makahatag Siya kanato og dili masulti nga kalinaw nga moabut gikan sa Iyang Espiritu, pinaagi sa gahum sa Iyang Anak, nga si Jesukristo. Ang kahayag ni Kristo mohayag og maayo lapus sa bisan unsang dagkong mga pagsulay o kalisdanan tungod kay Siya mibuntog niining tanan.