Mihukom Ko sa Pagpangita og Templo

Ni Mireille Rouffet

Ang tagsulat nagpuyo sa Auvergne-Rhône-Alpes, France.

Nangita ko og usa ka balaang dapit ug sa katapusan nakakita og paagi nga mahimong kabahin sa usa ka mahangturon nga pamilya.

1973 kadto. Nanglimbasug ko sa pipila ka mga hagit, hilabihan ang akong tinguha nga masayud sa Dios, mao nga mihukom ko sa pagbasa sa Biblia. Usa ka adlaw nakabasa ko mahitungod sa templo ni Solomon sa 2 Cronicas 2–5, ug mibati ko nga ang sama nga balaang dapit mahimong ania sa yuta. Mao nga nagpuasa ko ug nag-ampo nga magiyahan ko sa Espiritu Santo aron makit-an kini. Mibati ko nga kon makakita ko og templo, makahimo na dayon ko sa pagsulti sa usa sa mga sulugoon sa Ginoo kabahin sa akong mga problema, ug iya kong tabangan aron masulbad kini.

Mao nga mihukom ko sa pagpangita og templo. Niadtong higayona nagpuyo ko sa Fontenay-sous-Bois, usa ka kasikbit nga dapit sa Paris, mao nga misugod ko og drayb padulong sa siyudad aron pagpangita og usa ka templo. Nakakita ko og daghang mga building, lakip nang mga simbahan ug mga sinagoga, apan wala ko makakita og templo. Pag-uli nako, nag-ampo ko ug natingala nganong wala ko makakita og templo. Dili ba igo ang akong kaputli? O dili pa lang gyud ko andam?

Nalimtan na nako ang tanan kong napakyas nga pagsiksik hangtud ang sister nga mga misyonaryo sa Simbahan ni Jesukristo sa mga Santos sa Ulahing mga Adlaw miabut sa akong panimalay pagka Pebrero 1980. Mitudlo sila kanako nga ang pinakaduol nga templo tua sa Zollikofen, Switzerland—ang Bern Switzerland nga Templo.

Nabunyagan ko pagka Abril 12, 1980, ug miadto ko sa templo sa unang higayon mga usa gayud ka tuig human niadto, pagka Mayo 5, 1981. Didto nakahimo ko sa pagbuhat sa buluhaton sa templo alang sa daghang mga babaye sa akong pamilya, lakip na ang akng mga lola, mga tiya, ug mga ig-agaw.

Niini nga mga babaye, ang nailhan ra gayud nako mao ang akong ig-agaw nga si Olga.

Si Olga, nga taga Italy, naminyo niadtong batan-on pa siya kaayo, apan subo lang, ang iyang bana bayolente ug dili matinud-anon kaniya. Uban sa tabang sa iyang amahan ug sa iyang igsoon nga lalaki, si Olga mihukom sa pag-eskapo sa dihang mabdos siya sa iyang ikalima nga anak.

Mipuyo siya uban sa iyang mga ginikanan ug igsoon nga lalaki. Human sa iyang pagpanganak, si Olga namatay. Ang mga ginikanan ni Olga wala gayud maulii gikan sa kakalit sa iyang kamatayon.

Samtang nagpahigayon ko sa mga ordinansa sa templo alang kang Olga, usa ka pulong ang nagsige og santup sa akong hunahuna: misyon. Apan nalibug ko—bisi ko nga nagpadako og tulo ka mga bata nga ako ra, ug dili gayud ko makahimo sa pagmisyon.

Ang tubag miabut human sa daghang mga bulan human niadto. Usa ka adlaw ang akong ig-agaw nga si Renzo misulti kanako nga ang inahan ni Olga, ang akong tiya nga si Anita, namatay. Kalit nga nahinumdom ko nga nakompleto na nako ang buluhaton sa templo alang kang Olga niana nga Martes, ug ang iyang mama namatay pagkasunod Biyernes. Uban sa hilabihan nga emosyon, mibati kog pag-aghat nga si Olga naghinam-hinam nga makadawat sa iyang mga ordinansa sa templo aron iyang masugat ug matudloan ang iyang mama didto sa kalibutan sa mga espiritu. Lagmit mao kadto ang misyon ni Olga.

Apan ako usab adunay misyon sa pagtabang sa akong kaugalingon nga mga ginikanan. Naninguha ko nga makaistorya kanila kabahin sa Simbahan sa makadaghang higayon, apan dili gayud sila interesado. Mao nga human ang akong mama ug papa namatay, gibuhat dayon nako ang buluhaton sa templo alang kanila.

Sa dihang nabugkos na ang akong mga ginikan, ang akong kasingkasing kusog nga mipitik, ug ang akong mga mata napuno sa mga luha sa gugma. Nabugkos dayon ko ngadto sa akong mga ginikanan. Dili gayud ko makahunong sa paghunahuna kabahin sa akong mama, ug gusto nakong gakson kadto nga sister nga mibarug alang kaniya. Gipasalamatan nako siya sa pagbarug alang sa akong mama. Ang sister usab may mga luha sa iyang mga mata, ug mipasalamat kanako sa kasinatian. Bisan og wala ko kaila niya, mibati kami nga mga sakop sa susamang pamilya.

Ang akong mga ginikanan nabugkos usab ngadto sa ilang mga ginikanan, ug si Olga, nga akong girepresentahan sa ordinansa, nabugkos sa iyang mga ginikanan, ang akong tiyo nga si Marino ug tiya nga si Anita.

Matag higayon nga mahinumdom ko niadto nga mga kasinatian, ma-emosyonal ko. Naghunahuna ko kabahin ni Olga, ug naglaum ko nga siya nagtuman sa iyang misyon sa pikas bahin sa tabil. Tungod sa mga ordinansa sa templo, dili ra ako ang miyembro sa Simbahan sa among pamilya. Nagtuo ko nga ang akong mga ginikanan midawat sa mga ordinansa nga gipahigayon alang kanila. Napuno ko sa tumang kalipay ug nagpasalamat sa Ginoo sa paghimo niini nga posible alang nako aron maistablisar ang mahangturon nga pamilya pinaagi sa mga panalangin sa Iyang balaang templo.