Atong Luna
ANG IKAPULO UG ANG WALA DAMHA NGA PANALANGIN
Paghulagway pinaagi ni Katie Payne
Na-miyembro ko sa Simbahan usa pa lang ka bulan dihang mihatag ko sa una nakong hingpit nga ikapulo. Ako ra ang namiyembro sa akong pamilya, ug ang ikapulo lisud nga sabton sa akong pamilya. Dili ganahan ang akong mama nga mobayad ko og ikapulo ug gusto hinoon siya nga adto ra nako ihatag niya ang kwarta.
Usa ka adlaw sa wa pa ko motrabaho, namatikdan nako nga walay pagkaon sulod sa refrigerator ug kinahanglan kong mopalit og pagkaon. Wala na koy kwarta, mao nga mihangyo ko ni mama nga pahulamon ko og kwarta para paniudto. Mibalibad siya og miingon nga maong wala koy kwarta tungod kay gibayad nako sa ikapulo.
Milakaw ko aron kuhaon ang akong Basahon ni Mormon ug giingan siya nga kini nga basahon mohatag og sustansya nako sa tibuok adlaw—espirituhanong sustansya. Giablihan nako kini atubangan sa akong mama ug dunay 100 pesos nga nasup-it sa sulod (igo ipalit og paniudto). Milagro kadto—wala ko magbutang adto nga kwarta sa akong mga kasulatan. Nakakat-on ko og talagsaong leksyon: bisan og ang mga hagit ug tintasyon anaa bisan asa, kanunay mapanalanginan ko kon mobayad ko sa hingpit nga ikapulo ug motuman sa mga sugo.
Montserrat L., Federal District, Mexico
Panahon para sa Templo
Dihang nag-12 anyos na ko, akong nadawat ang una nakong temple recommend. Dili gyud nako makalimtan kadtong unang kasinatian sa templo. Ang kalinaw nga akong gibati lahi gyud kaayo. Bisan og ang akong balay sa habagatang Taiwan upat ka oras ang gilay-on gikan sa templo, mihukom ko nga moadto kausa sa usa ka bulan sa among stake temple day. Miadto ko bisan walay makakuyog nako.
Wala madugay gisugdan nako sa pag-imbitar ang akong mga higala sa Simbahan nga mokuyog nako. Bisan og sa sinugdanan daw dili kaayo sila interesado, karon kada bulan mangadto na sila. Daghang mga tawo sa ward nagsugod usab sa pag-adto sa templo. Karon bisan og kanunay nga magplano ang among ward nga mag-temple trip, daghan ang moadto—labaw pa sa nakita sa among stake kaniadto.
Sa wala madugay human midesisyon ko nga motambong matag bulan, ang akong pamilya mihukom nga moadto matag bulan. Bisan og duna mi test sa eskwelahan pagkasunod adlaw human sa among temple day, ang akong pamilya ug ako regular gayud nga motambong. Kanunay kong motambong sa templo kuyog sa akong pamilya sulod na sa pito ka tuig karon. Ang templo balay sa Ginoo, nahibalo kami sa kaimportante sa pag-adto sa templo.
Chi-Yun Liu, Tainan, Taiwan