Mga Pangutana ug mga Tubag
“Unsaon nako paggahin og panahon alang sa mga kalihokan sa Simbahan, family home evening, ug personal nga pagtuon sa kasulatan kon ang homework mokuha man og dako kaayong panahon?”
Hunahunaa ang walay lain kaonon kon dili ice cream ra kada adlaw. Nindot kaayong paminawon—hangtod ang inyong lawas dili na maayo ang bation. Apan mahimsog ka pinaagi sa pagkaon lang og broccoli? Dili, ang maayong panglawas nagkinahanglan og balanse nga mga pagkaon.
Karon hunahuna ang bahin sa daghang mga kalihokan sa atong mga kinabuhi. Ang atong espirituhanon, mga pakigrelasyon, ug edukasyon tanan mahinungdanon sa atong paglambo. Busa unsaon ninyo pag-una ang importanting mga butang?
Tan-awa unsa ang labing importante diha nimo karon ug pag-ampo aron makahibalo unsa ang tutokan. Si Elder M. Russell Ballard sa Korum sa Napulog Duha ka mga Apostoles miawhag, “Unaha sa inyong paghunahuna ang gihimo ninyong sagradong mga pakigsaad uban sa Ginoo samtang magsulat kamo sa inadlaw ninyong mga iskedyul.”1 Ang tanang butang mahimo ra kon inyong unahon ang Ginoo.
Hinumdumi nga “Ang ubang mga butang mas maayo, ug ang uban pinakamaayo.”2 Tinguhaa ang Espiritu Santo sa pagtabang ninyo nga makadesider unsa ang labing maayo. Makahupay kamo sa naghilak nga igsoon sa dili pa maghimo sa homework, apan ang pag-adto sa Mutual mahimong unahon sa dili pa motan-aw og sine uban sa mga higala. Mahimo usab ninyong ilhon ang mga babag sa inyong kinabuhi. Unsa kaha ang paggahin og panahon sa mga kasulatan sa dili pa ang inyong mga higala sa Facebook?
Labaw sa tanan, ayaw kalimot sa pagsalig sa Ginoo alang sa kusog aron nga kamo “makalakaw, ug dili mangaluya” (tan-awa sa Isaias 40:31).
Buhata Lang Kini
Kon moingon lang ka nga, “Ah, buhaton lang ni nako kon moabut ang panahon,” si Satanas motintal nimo aron dili gyud nimo kini mabuhat. Pagtagana og oras sa pagbuhat niining mga kalihokan nga makapabayaw sa espirituwalidad, bisan kon kini nagpasabot nga ang pagbalibad sa laing mga kalihokan
Allison R., edad 20, Utah, USA
Paggahin og Panahon alang sa mga Butang Nga Mahinungdanon
Kon dili kita makagahin og panahon alang sa ebanghelyo, nagpasabut kini nga daghan kaayo kita og gibuhat ug kinahanglan kuhaan nato og gamay. Kinahanglan kita nga magplano og mga kalihokan kalabut sa ebanghelyo ug sa atong mga katungdanan. Niining paagiha aduna kitay panahon alang sa ebanghelyo ug sa mga butang nga tinuod nga mahinungdanon.
Noah H., edad 13, Arizona, USA
Tun-i Una ang mga Kasulatan
Magtuon ko sa kasulatan sa dili pa magbuhat sa homework. Kon magtuon kamo sa kasulatan sa dili pa ang inyong mga katungdanan sa eskwelahan, mas abtik kamo, ug makahinumdom kamo og mas daghang impormasyon. Sa sinemana nga mga kalihokan, kinahanglan lang ninyo kanang planohon sa unang simana—dayon ipangsal-ot ang uban niini.
Elder Clark, edad 20, Chile Concepción South Mission
Planoha ang Inyong Panahon
Dili gyud sayon ang pagplano sa akong oras isip usa ka estudyante. Apan naghimo ko og tagal sa pagplano sa akong sinemana nga mga kalihokan, nga naglakip sa mga klase, debosyonal sa buntag uban ang akong mga roommate, personal nga pagtuon sa kasulatan, klase sa institute, ug sa uban. Ako usab kining gihan-ay sumala sa kaimportante. Ang pagplano sa akong kalihokan nakatabang nako nga mabuntog ang paglangay-langay.
Daniel A., edad 19, Edo, Nigeria
Hinumdumi ang Mahangturong mga Butang
Maningkamot ko sa paghinumdom sa mga pulong sa akong mama: kita kinahanglan mohatag og prayoridad sa mga mahangturong mga butang, nga molungtad sa kahangturan (dili sama sa temporal nga mga butang, nga molungtad lang og kadiyot). Akong nakat-unan nga kon mohatag og prayoridad ngadto sa Dios, ang tanang butang mahan-ay ra kon asa kini angay. Sigurado ko nga kon mobuhat kita sa buhat sa Dios, ang Dios mopanalangin kanato sa atong mga buhat.
Vaishali K., edad 18, Andhra Pradesh, India
Maalamon sa Pagtrabaho
Kon mauli na ko sa balay gikan sa eskwelahan, buhaton nako ang akong mga homework assignment aron nga dili ko maulahi ug aron aduna pa koy dugang panahon alang sa mga kalihokan sa Simbahan. Usa ka butang nga makatabang usab mao nga kon ang akong inahan mag-iskedyul para sa matag butang nga akong buhaton kada adlaw. Mas sayon ang pag-apil sa mga kalihokan, pagbuhat sa homework, ug pagbasa sa mga kasulatan.
Rachel O., edad 13, São Paulo, Brazil
Paghimo og usa ka Iskedyul
Sa imong pagbangon, mahimo nimong basahon ang imong mga kasulatan, bisan kon pipila lang kini ka mga bersikulo. Kana nagpasabut sa pagbangon og sayo lima ka minutos aron sa pagbasa sa imong mga kasulatan. Alang sa pagtuon sa pamilya, paggahin og panahon uban sa imong pamilya nga kamong tanan makapamahulay gikan sa inyong mga gibuhat ug dungan nga magtuon. Alang sa mga kalihokan sa kabatan-onan, ang panahon na-set na, mao nga lakaw og pagkig-uban sa mga batan-on sa inyong ward.
Elena F., edad 15, Idaho, USA
Unaha ang Ginoo
Ang pagkat-on sa pagtakda sa mga prayoridad makatabang kanato nga makahigayon sa tanang butang nga gikinahanglan natong buhaton, ilabi na sa mga butang sa Ginoo. Usa sa nag-una nako nga mga prayoridad mao ang pagtambong sa seminary kada adlaw. Kon makatambong ko sa seminary sa buntag ug unya moeskwela, ang adlaw ingon og sobra pa sa 24 oras. Mas sayon ang mga buluhaton sa eskwelahan, ug ang personal nga pagbasa sa mga kasulatan ug isip pamilya nahimong makalipay. Ang paghinumdom nga unahon ang Ginoo sa atong mga kinabuhi makatabang nato nga makita ang tanang butang uban sa bag-ong panlantaw ug makatabang nato sa paghan-ay sa mga prayoridad ug pagkab-ot sa atong mga tumong.
Bianca S., edad 19, Paysandú, Uruguay