Ang Kinabuhi sama sa usa ka Drama sa Entablado: Ang Plano sa Kaluwasan sa Tulo ka Yugto
Ang tagsulat nagpuyo sa New York, USA.
Kini nga ideya gibase sa usa ka pakigpulong, “The Play and the Plan,” nahatag ni Presidente Boyd K. Packer (1924–2015), Presidente sa Korum sa Napulog Duha ka mga Apostoles, sa usa ka Church Educational System fireside alang sa mga young adult niadtong Mayo 7, 1995.
Kita anaa sa tunga-tunga sa tulo ka yugto sa drama sa entablado nga wala nato masabti sa hingpit, apan ang pagtutok kang Kristo makatabang nato sa pagkaplag og mahangturong kalipay.
Image © iStock/Thinkstock
Ang mga suga awop. Ang pula nga telon gipasaka. Ang nag-costume nga mga tawo miaksyon dayon. Kinsa man ang bayani? Kinsa man ang kontrabida? Lisud mailhan.
Nagbarug kamo sa sentro sa entablado, nga wala hisabti ang tanan. Ang tanan ingon og nakasabut unsay panghitabo gawas lang nimo. “Mao kini ang yugto 2,” usa sa aktor mihunghong. “Tan-awa kining tamdanan.”
Dili man kitang tanan mga aktor, apan ang ideya sa ingon nga drama dili layo sa kamatuoran. Hunahunaa ang plano sa kaluwasan, gitawag usab og “ang mahinungdanon nga laraw sa kalipay” (Alma 42:8), isip ang tulo ka yugto. Yugto 1 mao ang diin kita gikan, yugto 2 mao ang kinabuhi sa yuta, ug ang yugto 3 mao ang asa kita paingon. Atol sa yugto 2, wala kitay panumduman sa atong kagahapon ug gamay ra ang nahibaloan sa atong umaabut, apan swerte kay sa ebanghelyo ni Jesukristo—ang tamdanan sa drama—gibutang ang atong konteksto sa atong mortal nga kinabuhi.
Yugto 1: Pagsabut sa Atong mga Sinugdanan
Gikan sa mga kasulatan ug sa mga pulong sa buhi nga mga propeta, makat-on kita sa atong kinabuhi sa wala pa dinhi sa yuta (tan-awa sa Abraham 3:22–24). Sa wala pa kita moanhi sa yuta, miapil kita sa usa ka konseho uban sa atong Langitnong Amahan. Atong nahibaloan nga moanhi kita sa yuta aron makaangkon og usa ka lawas, makabaton og kaliwatan, moatubang sa mga oposisyon, ug molambo ang kahayag ug kamatuoran. Kon magmasulundon kita ug mahimong mas sama ni Kristo, usa ka adlaw makapuyo kita pag-usab uban sa atong Langitnong Amahan.
Tungod kay kita makahimo man og kasaypanan sa atong pagpadayon, si Jesukristo mao ang gipili isip atong Manluluwas aron sa pagbayad sa kantidad sa sala. Miantus Siya alang sa matag usa kanato, ug tungod sa Iyang Pagsakripisyo, malimpyuhan kita pinaagi sa paghinulsol.
Apan si Satanas (o Lucifer, isip tinawag usab didto sa kinabuhi sa wala pa sa kalibutan) nagrebelde ug nagtinguha sa pagkuha sa atong abilidad sa pagpili sa husto o sayop. Usa ka Gubat sa Langit Nagsugod. Sa iyang kapildihan, Si Satanas gipapahawa sa kalangitan, lakip na ang mga espiritu nga misunod kaniya (tan-awa sa Moses 4:1–4).
Bisan og dili kita makahinumdom niining kinabuhi nga wala pa dinhi sa yuta, kita nasayud nga misaad kita nga mobuhat kutob sa atong mahimo sa pagbalik ngadto sa presensya sa Dios kon anaa nakita sa yuta. Ug Siya misaad kanato sa kabubut-on, nagtugot kanato sa pagpili sa pagsunod Kaniya.
Yugto 2: Paggamit sa Atong Kabubut-on
Karon ania na kita sa yugto 2, ug ang Dios naghatag sa tamdanan aron sa paggiya nato balik Kaniya—ang ebanghelyo ni Jesukristo. Ang atong hagit mao ang paggamit sa atong kabubut-on sa pagsunod sa tamdanan aron kita makapangandam sa pagbalik ngadto sa atong Langitnong Amahan (tan-awa sa Abraham 3:25). Sama sa usa ka makuti nga drama nga puno sa pasakalye, ang atong mortal nga kinabuhi mahimong komplikado. Puno kini sa mga tintasyon, mga pagsulay, ug uban pang subo nga panghitabo sa tanang matang. Apan ang kamatuoran mao nga ang yugto 2 mahitungod tanan sa pagpili kon mosunod kita sa mga pagtulun-an ni Kristo aron kita mamahimong mas sama Kaniya.
Ang mga kasulatan nagsangkap sa hingpit nga sumbanan sa kalipay, nag-awhag kanato nga “mopadayon sa unahan uban ang pagkamakanunayon kang Kristo” (2 Nephi 31:20). Molambo kita samtang mohimo ug motuman kita sa mga pakigsaad, mosunod sa mga sugo, ug maghinulsol kon kita makasala. Samtang ilambigit nato ang atong kaugalingon sa kasulatan ug mga pagtulun-an sa atong mga propeta, magpabilin kita nga nagtutok sa plano nga gikauyonan natong sundon sa yugto 1.
Yugto 3: Paghangup sa Kahangturan
Ang atong pisikal nga mga lawas mahimong mamatay sa katapusan sa yugto 2, apan ang istorya wala mahuman diha. Sa pagkatinuod, ang yugto 3 walay pagsira sa tabil—mahangturon kini (tan-awa sa Abraham 3:26).
Tungod sa Pag-ula ni Jesukristo, ang tanan nga mga anak sa Dios nga nakapuyo sa yuta mabanhaw. Unsa pay mas malipayon kay sa pagkabanhaw? (tan-awa sa D&P 93:33).
Hapit tanan makadawat usab og himaya depende sa ilang mga binuhatan: ang telestial nga gingharian, dunay himaya nga sama sa bitoon; ang terrestrial nga gingharian, dunay himaya nga sama sa buwan; o ang celestial nga gingharian, dunay kinadak-ang himaya nga sama sa adlaw (tan-awa sa D&P 76:50–113). Sa celestial nga gingharian kita magpuyo uban sa Amahan ug sa Anak. Pipila ka mga tawo “magpabilin nga mga mahugaw” (2 Nephi 9:16) ug sila ilabay ngadto sa kawanangan sa kangitngit, diin sila wala nay pag-uswag.
Unsa Kaha ang Inyong Istorya?
Kon kita mosunod sa ebanghelyo ni Jesukristo sa yugto 2, yugto 3 sa atong drama sa entablado mahimong mahimayaon lapas sa mahunahuna. Ang mortal nga kinabuhi pagasugdan na. Anaa na ang aksyon. Unsay imong buhaton diha sa imong mortal nga kinabuhi?