Gigiyahan sa Ginoo: Single nga Pagkaginikanan
Wala ko magplano nga mahimong single nga ginikanan sa upat ka anak tunga-tunga sa akong pagka-20 nga pangidaron ug ako naglibug ug nasagmuyo. Gamay ra ang akong balay nga kapuy-an sa upat ka gagmayng bata, ug wala ko nakaeskwela sa kolehiyo. Naglibug ko kon unsaon kaha nako nga masuportahan sa pinansyal ang bag-o pa nakong pamilya. Ang tubag wala moabut kanako sulod sa mga adlaw o mga bulan apan human sa daghang tuig sa pagsunod sa usa ka pag-aghat ug sa mga nagsunod.
Maayo gani kay duna koy kinaiya sa pagduol ngadto sa Ginoo sa mga panahon sa problema. Usa ka gabii miabut ang klaro nga tubag: “Eskwela.” Naglibug ko kon unsaon sa paghimong posible niini uban sa pinansyal nakong mga obligasyon, mao nga nakigsulti ko sa akong mga ginikanan ug sa akong bishop. Miuyon sila nga ang pag-eskwela maoy saktong paagi, ug sulod sa pipila ka semana na-enroll ko sa usa ka lokal nga unibersidad, diin nakakuha ko og degree sa elementary education inubanan sa pag-endorso sa special education.
Isip usa ka magtutudlo, kulang gihapon ang akong kita aron makaigo sa pinansyal nga mga panginahanglan sa nagtubo nakong mga anak. Padayon kong mihangyo sa Ginoo bahin sa kulang nga kwarta. Atol sa akong pakig-istorya sa akong bishop, girekomendar niya nga moeskwela ko og balik sa pagkuha og master’s degree. Miuli ko, nag-ampo bahin niini ug nag-enroll og balik sa eskwelahan sa pagkasunod nga semester.
Mga pipila ka tuig human niadto naaghat ko nga mobalik na usab sa eskwelahan. Nagpa-iskedyul ko sa gikinahanglan nga mga test, giinterbyu para sa mga programa sa educational administration, ug na-enroll ko, balik na usab sa usa ka master’s program sa laing lokal nga unibersidad. Dihang nakompleto kini, naablihan ang bag-ong mga oportunidad ngari nako sa pagpanarbaho nga mipabuhong sa akong kinabuhi og bag-ong mga pakigrelasyon, nakapasiugda og personal nga paglambo, ug natabangan kong makadiskubre og bag-ong mga talento.
Didto sa templo usa ka gabii, gipaambit nako ang akong kasagmuyo ngadto sa Ginoo nga bisan sa akong mga paningkamot, dili gihapon makanunayon ang akong pagkab-ot sa mga gikinahanglang pinansyal. Gibati nako ang kainit sa langitnong komunikasyon nagpahinumdom nga ang tanang gikinahanglan sa akong pamilya nakab-ot na, pinaagi sa kaugalingon nakong paningkamot o pinaagi sa kamatinabangon sa uban, ug kon magpabilin kong masulundon, kami makasugakod ra. Ug napahinumduman ko sa Alma 20:4, “Ako nasayud, diha sa gahum sa Ginoo [ako] makahimo sa tanan niini nga mga butang.”
Mapasalamaton kaayo ko sa Langitnong Amahan sa mga pag-aghat nga humanon ang akong pag-eskwela ug sa padayon nga oportunidad sa trabaho. Nagpasalamat sab ko sa tanang tawo kinsa nagmahunahunaon kaayo sa tibuok katuigan. Akong nakat-unan nga makahimo pa diay ko og daghan labaw kay sa akong gituohang posible uban sa tabang sa akong Langitnong Amahan. Sa managsama nga kahulugan, akong nakat-unan ang mabination nga pagdawat ug kinasingkasing nga paghatag.