O Ata o le Faatuatua
Cayo ma Atonio
Pale, Farani
O Cayo Sopi ma Atonio Linat sa avea ma ni uo talu mai o laiti. Sa faamoemoe lava Cayo, o se tagata o le Ekalesia, o le a auai Atonio [i le Ekalesia].
Leslie Nilsson, tagata pueata
Cayo:
Sa ou feiloai ia Atonio i aso ua leva. Sa faatoa matou siitia atu lava i totonu o le eria. Sa ou alu i le aoga fou lea ma amata ona ou maua ni uo. O Atonio o se tasi lea o i latou na. E masalo sa tai ono pe tai fitu o matou tausaga. E malie le mafaufau atu i lena mea, ae o lea ua 26 ou tausaga.
Sa matou taaalo i se taaloga e ta’u o le Poko. O se taaloga matou te taaalo ai i Farani—ou te le iloa pe o faia i se isi atunuu. A o matou taaalo, sa taumafai Atonio e aveese au kata e tasi pe lua. Sa faafuasei ona ma fufusu. Sa tatoso ese i maua e le matou faiaoga. Ina ua uma lena mea, ou te manatu sa faapea ona talisapaia atili ai e le tasi le isi. Sa amata ona ma faifai mea faatasi—taalo i taaloga vitio, faasee i laupapa faasee, ma tietie uila. Sa faifaimalie lava ona amata ona ma faaaluina faatasi ni taimi se tele.
Sa manao i taimi uma lo’u tina e tatalo lo matou aiga. Sa o se vaega o mea e masani ona fai i le fale. Sa faapena foi i le faitauina o tusitusiga paia. Sa avea nei mea ma ni faiga masani ia i matou. I se tasi o po sa ou moe ai i le fale o Atonio. A o fai lau tatalo ae ou te lei moe, sa iloa mai e Atonio ona fesili mai lea po o le a lau mea sa fai. Ou te le manatua lelei po o le a lau tala na fai atu; nao lou manatuaina sa ma i ai i lona potu ma sa ma talanoa e uiga i le tatalo.
Na i ai ni taimi na sau ai Atonio i lo’u fale, ma vaai ai o matou faitauina tusitusiga paia, tatalo e faamanuia meaai ao lei aai, ma tatalo o se aiga. Sa vaai o ia a o matou pepese faatasi foi i viiga. Pe na faatasi pe faalua ona ou fai ia te ia e sau i le lotu. Atonu na ou vaai i lana tali mai, sa lei fiafia tele i le manatu o le sau i le lotu. Sa ou faapea ifo ia te au lava, “Ia ou te matea ua pau ai iina, ta’i leaga foi, ae o le a faaauau pea ona avea i ma’ua o ni uo lelei.”
Atonio:
I le taimi muamua sa fai si ou taumamao e uiga i le Ekalesia. Sa ou le malamalama tele, ma sa fai si ou fefe e talanoa ia Cayo i le ala e faapotopoto faatasi ai lona aiga mo tatalo. O lea la, i le amataga ou te lei tali ai i ana valaaulia. Ae sa faasolosolo malie lava ona lelei ou lagona. Sa ou lagonaina i lou loto sa ese mai le aigao Cayo mai isi aiga.
Cayo:
Na iu ina ma o ese atu i isi mea. Sa i ai ni nai taimi i le aluga o tausaga sa le toe faalogo ai le tasi i le isi, ae ma te toe fetaui lava i taimi uma. A o ma talavou, sa toe valalata foi le ma faigauo.
Atonio:
Sa mafai ona ou iloa sa ese lava Cayo mai isi au uo. Sa matou faia uma lava ni mea faavalevalea a matou tutupu ae, ae sa fesoasoani mai Cayo ia te au i le filifilia o se auala lelei.
Cayo:
Sa amata ona matou o ma Atonio ma lo’u aiga i le lotu. Ona sui ai lea o mea e pei ona masani ai, sa faaaluina e faifeautalai se taimi tele faatasi ma i matou, ma sa fai foi si masani o Atonio i le Ekalesia. Sa ia iloa le mea e ta’u o le tatalo, sa ia iloa viiga, sa ia iloa mea uma na—ae sa le o se tagata o le ekalesia.
Atonio:
Mai le 8 e oo i le 18 o tausaga, sa tele ina ou manatunatu ai e papatiso. Peitai sa ou faaaluina se taimi umi ona sa tele ni mea na manaomia ona suia i lou olaga, e ui ina sa ou taumafai e ola i mataupu faavae lelei.
I le 18 o ou tausaga, sa ou feiloai ai i faifeautalai i le Cayo i le fale. Sa aoaoina au e faifeautalai i lesona ou te saunia ai mo le papatisoga. Sa laua fesoasoani mai ia te au, ma sa faagaeetia lo’u loto i le la savali. I lena taimi, sa faailoa atu ai lo’u tina ma lo’u tuafafine laitiiti i faifeautalai. Sa papatisoina i laua i ni nai masina e muamua ai ia te au. Na ou papatiso i le aso 10 o Mati, 2007.
Cayo:
Sa alu ai le taimi na alu ai, e silia ma le 10 tausaga, ae na iu lava ina papatiso o ia.
E malie le vaaia o le auala e faia ai e le Alii ia mea. Ina ua uma lena, sa ou alu i se misiona i Farani ma sa ma fetusiai lava i le tasi ma le isi. O lenei la o le a ma valavala ona o lea ua avea Atonio o se gendarme [leoleo], ma o le a alu e faigaluega mo le lua i le lima tausaga i Guyana, ae ou te mautinoa o le a ma fesootai pea.
Atonio:
Talu ona ou auai i le Ekalesia, ua ou faia mea e manaomia e tumau ai i le ala sao, ma ia faasoa atu le talalelei ia i latou e siomia au. O se mea e faigofie lava, peitai o le talalelei e mafai ona faigata ona talia ma ola ai isi tagata. I le avea ai ma tagata o le Ekalesia, e ese moni lava i tatou mai i isi.
Sa faigata i nisi o tagata o lo’u aiga ona iloa le pogai matou te sauni ai ma lo’u tina, ma lo’u tuafafine i le lotu i Aso Sa uma. E fai lo’u suti ona ou alu lea i le 8:30 ina ia taunuu atu i le 9:00, ma sa masani ona ou nofo ai seia oo i le 3:00 i le aoauli ona o lo’u valaauga. Ou te fiafia e asiasi i isi tagata o le Ekalesia ma iloa mea o loo tutupu i o latou olaga. Ou te fiafia e auai faatasi ma tagata o le Ekalesia; e ese le manaia. E taua le i ai o tagata o le ekalesia e siomia i tatou, ia i ai le lotogatasi, ma ia lagonaina le pei o loo tatou faamalolosia le tasi ma le isi.
Cayo:
Ou te talitonu e faia e le Alii mea uma na te mafaia ina ia mafai ona tatou matuai suia moni ma faamaoni. O le avea ma se Au Paia o Aso e Gata Ai ma se soo o Keriso, e le na o se fesili o le filifili e ola i ni uiga faaalia faapitoa; o le molimauina o se suiga tele ia i tatou lava. Sa ou vaaia lena suiga ia Atonio.
Atonio:
Ou te mafanafana i le iloa o loo i ai so’u Tama Faalelagi. Ou te mafanafana foi i le iloa, ua Ia auina mai Lona Alo o Iesu Keriso, e maliu mo i tatou—mo a’u.
Peitai, i soo se tulaga lava, ua ou iloa e moni. Ua ou iloa foi e moni tusitusiga paia. E moni le Tusi a Mamona. Ua ou talitonu i ai. E moni le Ekalesia. O loo i ai so tatou perofeta moni o Thomas S. Monson. O Aposetolo e Toasefululua ua valaauina moni e le Atua.
O se mea lena sa ou le malamalama muamua i ai, ma ou te manatu, e oo mai lava i le aso, ou te le o malamalama atoatoa i ai. E ese le mamana, ma e tulaga ese e pei lava o se lagona malosi.
O Cayo Sopi (agavale) ma Atonio Linat (taumatau) o loo savavali i lo latou pitonuu i le faoaaai o Pale, Farani. Na uo mai lava o la laiti.
Sa manatua e Atonio, “A o faasolo ina avea i maua o se uo vavalalata, sa mafai ona ou iloa sa ese lava Cayo mai isi au uo.” I le aluga o taimi, na fesoasoani faataitaiga a Cayo ia Atonio e fiafia atili ai i le talalelei toefuataiina.
Ua fuafua Cayo ma Atonio e fesootai pea pe a siitia atu Atonio i Guyana.
“Talu ona ou auai i le Ekalesia,” na fai mai ai Atonio, “Ua ou faia mea e manaomia e tumau ai i le ala sao, ma ia faasoa atu le talalelei ia i latou e siomia au.” O le faasoaina atu o le talalelei o se “mea e faigofie lava,” o lana tala lea.
E tumau pea le faafetai o Cayo mo le avanoa na ia maua e faasoa atu ai le talalelei i lana uo. “Ou te talitonu e faia e le Alii mea uma na te mafaia ina ia mafai ona tatou matuai suia moni ma faamaoni,” o le tala lea a Cayo. “Sa ou vaaia lena suiga ia Atonio.”
Fai mai Atonio, o le mauaina o le talalelei ua avea o se faamanuiaga i lona olaga. “Ou te mafanafana i le iloa o loo i ai so’u Tama Faalelagi,” o lana tala lea. “Ou te mafanafana foi i le iloa, ua Ia auina mai Lona Alo o Iesu Keriso.”
“E malie le vaaia o le auala e faia ai e le Alii ia mea,” o le tala lea a Cayo. Na silia ma le 10 tausaga faatoa papatiso Atonio, ae i lena taimi, na maua ai e Atonio se molimau malosi.