O Le Filifiligaa Sieni
E alala le tusitala i Texas, ISA.
Connecticut, 1842
“O le Alii lo’u leoleo mamoe …” sa faalogoina e Sieni Elisapeta Manning le musika, ae sa le mafai ona ia taulai atu i upu. Sa autilo o ia i ona lima, ma mafaufau loloto.
Sa auai o ia i le lotu Pesipeteriane i le tausaga ua mavae. Ae sa ia lagona lava le pei na i ai se mea na misi. “O loo ou sailia se mea e sili atu,” sa mafaufau ai. Ae o le a ea lena mea?
Ina ua tuua le lotu, sa o atu i fafo Sieni faatasi ma isi tagata uma o le faapotopotoga. Na amata ona sui le lanu o laulaau i le lanumumu ma le auro. Sa atagia mai le sulu o le la i le Vaitafe lata ane o Norwalk.
Sa fai mai se tasi o alii, “Ua sau se faifeautalai femalagaai i le nuu.” “O ia o se Mamona, ma ua fai mai ua toe fetalai mai le Atua i perofeta.”
Sa tu Sieni e faalogologo. Mata o le mea ea lenei sa ia sailia?
“Perofeta?” sa aamu mai ai se isi alii. “E pei ona i ai i le Tusi Paia? O ai o le a alu e faalogo i se savali faapea?”
“O au!” Na oso atu ai Sieni. Sa faliu ane ni nai tagata e sioa atu ia te ia, e aofia ai ma le faifeau. Na lagona e Sieni le matamuli.
Sa faauu foliga o le faifeau. “Ou te manatu e le tatau ona e latalata atu ia te ia. O le mea faavalevalea, le mea lena. Ua e malamalama?” Ina ua leai sana tala na fai atu, sa lue lona [faifeau] ulu ma see atu lana talanoa i se isi tagata. Sa vaai atu Sieni ua alu ona topetope loa lea i lona fale.
O le fale, sa le o le mea lea sa nonofo ai Mama ma ona tuagane ma uso. O le faatoaga a le aiga o Fitch. Sa alu o ia e nofo iina o se auauna ina ua faatoa ono ona tausaga. Sa galue malosi o ia i aso uma, e fesoasoani i le faletua o Fitch i le tagamea, auli, ma le faiga o meaai. Sa masani ona ala o ia ao lei oso le la. Na te faia le afi, palu falaoa, ma saeu le pata. Soo se taimi lava sa mafai ai, sa alu ai e asi lona lava aiga.
I ni nai aso mulimuli ane, sa mafaufau pea lava Sieni i le faifeautalai a o ia faatautauina ofutino o le Susuga a Fitch e faalala. Sa apata solo lavalava i le agi a le savili.
Sa fai atu le faifeau ia te ia e aua nei alu, ae peitai … sa manaomia ona alu. Sa manao e vaai pe mafai ona fesoasoani lenei Mamona e sue le upumoni lea sa ia sailia. E oo ane i le taini na uma ai ona tautau le tagamea, ua ia iloa le mea e fai. O le a alu i le fonotaga, e tusa lava po o a tala a tagata e fai mai.
I le Aso Sa, sa ala a’e Sieni i le tafa o ata, fai lona ofu sili ona manaia, ma savali toatasi atu i le falefaafiafia e fai ai le fonotaga. Sa faaseesee filemu atu i se nofoaumi laupapa i le pito i tua o le falefaafiafia. Sa ataata Sieni ina ua ia vaaia le aofai o tagata sa i ai iina. Sa foliga mai sa le nao ia lea sa suea se mea e sili atu!
Na filemu le potu ina ua tulai Elder Wandell. Sa vave uma le itula na sosoo ai a o ia talanoa mai e uiga i le Tusi a Mamona ma se perofeta e igoa ia Iosefa. Sa fai mai o ia, e mafai ona papatiso tagata e ala i le faatofuina, e pei ona sa faia e Keriso. Ma sa ia talanoa mai e uiga i le Au Paia ua faapotopoto atu i se aai mamao lava ua ta’ua o Navu. I le faaiuga o le fonotaga, sa lagona e Sieni le matuai tumu o lona loto lea sa tau le mafai ai ona manava.
O le po lena, sa asiasi atu ai Sieni i lona aiga.
“O le a la sou manatu i le savali a le faifeautalai?” sa fesili atu ai lona tina ina ua faamatala atu e Sieni le mea na alu ai lona Aso Sa.
“Ua matuai ou talitonu lava sa ia faailoa mai le talalelei moni,” na fai atu ai Sieni. “E tatau ona ou taliaina. O le a papatiso i le Aso Sa lea.”
“Papatiso? O le a e auai i se isi lotu?” o le fesili lea a lona tuagane, o Isaako, ma toso mai se nofoa.
“Ioe! O le mea lea sa ou suea lava. E moni.”
Sa iloa e Isaako sa mo’i lava o ia. “O le a la le mea e sosoo ai?” sa ia fesili lemu atu ai. “O le a le mea o le a e faia pe a uma ona e papatiso?”
“O le a ou faapotopoto faatasi ma le Au Paia,” na fai atu ai Sieni. “O le a ou alu i Navu.”
E faia pea …