Tau Lava o le Faitau ma Tatalo
Ina ua 17 o’u tausaga, sa tau mai e se uo ia te au o ia o se Mamona. O le taimi lena sa ou le iloaina po o le le mea na ta’u o le Mamona. Sa lei fai mai o’u matua ou te alu i le lotu, o lea sa le tele ai so’u iloa i le Tusi Paia pe e uiga i le Atua, ia pe na ou fia iloa foi. Sa ou ta’u atu i la’u uo, “Afai ou te fia iloa se mea e uiga i ai, a ou sailia e au lava.”
O le vaai mai sa ou le popole tele i le Ekalesia, o lea sa na ona ia tuu mai ai se kopi o le Tusi a Mamona. Ona fai mai lea ia te au, e faitau ma tatalo e uiga i ai. Na te lei faamalosia au pe le fiafia ona ou te lei fia faalogo e uiga i le Ekalesia. Na pau lava le mea sa manao ou te faia o le faitau ma tatalo.
Mulimuli ane i lena po, a o ou susueina le tusi, sa ou matauina ai lana molimau i le pito i luma. A o ou faitauina lana molimau, sa ou lagonaina e tatau ona ou aoao atili e uiga i le tusi lenei. O lea sa ou amata ai mai le 1 Nifae. Sa le mafai ona ou tuuina i lalo le tusi. Sa ou fia iloa atili.
E lei leva, ae ou alu i se afiafi faaleaiga faatasi ma lona aiga lea sa latou aoaoina ai au e uiga i le talalelei a Iesu Keriso. E ui lava ina sa leai se mea na ou iloa e uiga i le talalelei, ae sa foliga mai sa talafeagai mea uma. A o ou aoao atili, na suia ou uiga faaalia e uiga i le Ekalesia, le Atua, ma Iesu Keriso. Mo le taimi e tasi i lo’u olaga, sa ou manao ai e fai le mea na finagalo le Atua ou te faia. E lei leva ae aoaoina au e faifeautalai, papatisoina ma faamauina o se tagata o Le Ekalesia a Iesu Keriso o le Au Paia o Aso e Gata Ai.
Na suia e le Tusi a Mamona lo’u olaga. A o ou toe tepa i tua, e mafai ona ou vaaia le ala na fesoasoani ai le Agaga Paia ia ou manao e aoao atili. Sa fesoasoani le talalelei ou te iloa ai po o ai au, o fea na ou sau ai, ma o fea ou te alu i ai pe a ou faamaoni. Ou te faafetai i la’u uo lea na faasoaina mai ia te au, ma faaali mai, o se uo moni e faasoa atu upumoni o le talalelei.