O Leo o Le Au Paia o Aso e Gata Ai
Vaavaai Atu i le Tuua e le Ma Pepe o Lenei Olaga
Ata na tusia e Allen Garns
Ina ua uma le faata muamua o le tagata [i le manava], sa ta’u mai e le fomai ia i maua sa i ai se avanoa na maua ai le ma pepe fou i le Tauni [Down syndrome]. Ma te lei mafaufauina ma lou toalua e faalogo i lenei mea, ma sa faafuasei lava ona suia ai la’u vaaiga mamao mo le lumanai.
I le taimi atoa o le maitaga, na faatumulia lo’u mafaufau i fesili ma popolega e uiga i se mea o le a tulai mai. Ae, sa ma sauniuni ma le faaeteete mo le taunuu mai o si a ma pepe. Ina ua oo mai le aso, sa ou lagonaina i lo’u loto o le a lata ina fanau mai se tagata matagofie ma faapitoa.
Sa ma faaigoaina le ma pepe tama o Santiago, ma e lei umi ona fanau mai ae ma iloa ane, e le gata ina maua i le Tauni [Down syndrome] ae na aafia foi lona fatu, ate, ma mama i nisi o faaletonu ogaoga faalesoifua maloloina. O le taimi lava lena, na sulu i ai e fomai ma tausi soifua se masini e faamanava ai ma se masini o le fatu ma le mama. A o mavae atu aso i le falemai, sa amata ona ma talatalanoa ma lo’u toalua i ni auala o le a ma tausia faatasi ai Santiago ma ona uso. O le taimi lena sa ma iloaina ai le ma matuai manaomiaina o lo tatou Tama Faalelagi.
Sa faasolosolo manuia si ma “Santi” laitiiti ma aveese ai mai le masini na faamanava ai. Ina ua amata ona manava ia lava, sa pei na fai mai, “Tina, o le a ou faamalosi ma fai la’u vaega.” Sa ia oomiina o maua tamatamailima i si ona lima itiiti. Sa malosi o ia, peitai, sa lei malosi lona fatu. Sa faafuasei ona le galue lelei lona fatu, ma i se taimi puupuu mulimuli ane, sa toe foi atu ai o ia i lona Tama Faalelagi.
Ou te lei moemiti lava o le a ou oo i se mea faapena. O le faatalitali ma le naunautai tele i le oo mai o sau tamaitiiti, o le faia o le tele o fuafuaga mo ia, ae toe vaai atu i lona tuua o lenei olaga, o se tasi lea o mea aupito sili ona tiga e mafai ona oo i ai se tama ma se tina.
Sa ma o atu ma lou toalua i le malumalu ina ua mavae le tanuga o Santiago. Ina ua ma ulufale atu i ai, sa ma lagonaina le faamafanafanaina. Sa ou iloa, e i ai se aso o le a ou iloa ai la’u pepe ma olioli ia te ia i le avea ai ma ona tina. Ou te faafetai mo malumalu ma mo aiga e faavavau. O lenei la, o le matou tiute o le ola i se auala e mafai ona matou toe faatasi ai ma si o matou Santiago itiiti.