Tofotofoina o le Musika
E alala le tusitala i Iuta, ISA.
Afai ou te manao e faaloloto la’u molimau ma alualu i luma faaleagaga, e tatau ona tuu lo’u faia o ’alofaga mo a’u amioga.
Sa ou faapea lava sa ou laki, ma ou manuia faaleagaga a o o’u leano i nisi o tulaga faatonuina o le talalelei. O lea sa fai ai lava mea sa ou manao i ai, filifili po o le fea o tulaga faatonuina na taua ae o le fea na le taua. O se tasi o tulaga faatonuina sa ou manatu i ai e tuu i le faitalia, o le le faalogologo lea i musika masoa ma paaa (tagai i le Mo le Malosi o le Autalavou [2011], 22). Ou te lei manatu o musika sa ou faalogologo i ai, sa faia se eseesega i le ala na ou amio a’i ma ou lagona e uiga i le talalelei. Sa i ai lava sau molimau malosi ia Iesu Keriso, ma sa ou taumafai i le mea sili e auauna atu ai i isi ma auai i au sauniga Lotu. Sa ou faapea ifo ia te au lava, sa o se mea leaga le le ola o na fai musika i ni olaga mama, ae sa le afaina lo’u faalogologo i a latou musika—aua, sa lei taofia ai au mai le ola i se olaga sa lilifa atu i le talalelei.
A o ou sauni e auauna atu i se misiona, sa ou le manatu lava i le auala na faatapulaa ai e musika na ou faalogologo ai lo’u alualu i luma faaleagaga.
Ae peitai, i le toe o nai itula tatala lo’u valaauga o le misiona, sa oo mai ai i lo’u mafaufau le mau i le Alema 32:27 : “Ae faauta, afai tou te ala mai ma fafagu o outou mafaufau, e oo i le tofotofo i au upu, ma faaaoga sina vaega itiiti o le faatuatua, ioe, e tusa pe ua le mafai ona e faia o se isi lava mea nai lo le fia talitonu, ia tuu lea manao e galue i totonu ia te oe, seia oo lava ina ia e talitonu ai i se ala e mafai ai ona e tuu ane o se avanoa mo se vaega o aʼu upu.”
Ma sa faapea ona ou mafaufau ai i lena upu e tasi: tofotofo. Afai na ou fia maua faamanuiaga na ou misia, e tatau ona ou tofotofo i ai. O lea la, mo le isi tolu vaiaso na sosoo ai, sa ou le faalogologo ai i au musika le talafeagai. Sa faigata le taimi muamua, ma sa tele ou sasi sa i ai. Ae ina ua mavae ni nai aso, o lagona toafilemu na amata ona ou maua i aso uma, na lava ia e fesoasoani ia te au. E le gata i lea, i le avea ai ma se tagata aoga i le kolisi, sa amata ona lelei au [taumafaiga] i au vasega. Na mafai ona ou taulai atili atu, ma sa faateleina le ogatasi ma le Agaga i se taimi o lo’u olaga lea sa sili ona taua ai le taitaiga faalelagi.
Sa ou iloa sa faapena foi ona suia ou manaoga. Sa ou manao e maua faamanuiaga uma o loo faatalitali mai le Tama Faalelagi e tuu mai ia te au. O lo’u aafiaga i le suia o a’u mausa i musika na fesoasoani ou te iloa ai, e leai ni tulaga faatonuina e tuu i le faitalia ma o poloaiga uma ua tuuina mai ia i tatou, ua mamanuina ina ia faalolotoina ai lo tatou sootaga ma lo tatou Tama Faalelagi ma avea atili ai i tatou e pei o Ia. O le le tausia o tulaga faatonuina tatou te le mananao i ai, e nao lo tatou le maua ai o Ana faamanuiaga folafolaina.
O le mulimuli i tulaga faatonuina o le talalelei ma le tausia o poloaiga, e iloagofie ai i tatou o ni soo moni o Keriso. Pe a tatou faia lena laasaga o le alu atu mai le lelei i le sili atu ona lelei, ua tatou faafiafia moni ai lo tatou Tama oi le Lagi. E le mafai ona tatou faavaeluatai i lenei talalelei. A le o loo tatou minoi i luma po o le pauu i tua, ma o le manatu “O loo ou manuia lava i le taimi nei” o le a mautinoa lava lo tatou solomuli ai i tua. Ae afai tatou te faalagolago ia Iesu Keriso ma le mana o Lona Togiola ia alualu teisi ai i luma i aso taitasi, ona mafai lea ona tatou nonofo faatasi ma Lona filemu ma iloa o loo avea i tatou ma ituaiga tagata o loo Ia silafia e mafai ona avea ai i tatou.