O Leo o Le Au Paia o Aso e Gata Ai
O Le Faamafanafanaga Faaletino mai Tusitusiga Paia
Ata na tusia e Allen Garns
A o ou laitiiti, sa ou maua ai i le ma’i o le gugu o tamaiti. Sa masani ona ou ma’i, ma sa matou faaaluina ma o’u matua ni itula se tele i ofisa o fomai. Sa la popole mo lo’u ola maloloina ma lagona le vaivai, aua sa le mafai ona latou faaleleia le mea sa faaletonu. Ou te lei faatauaina o laua lagona, seia oo i le taimi na ou vaavaai atu ai ma le leai o se mea e mafai ona ou faia, a o tauivi lo’u tina ma le ma’i o le kanesa o le susu.
I le faaiuga o se tasi o vaiaso, sa ou alu atu ai i le fale o lou tina i New Jersey e faatasi ma ia a o feagai ma se faasologa o togafitiga i vailaau malolosi [chemo]. Sa ou fia mafuta ma ia ae sei fai se malologa a o’u tuagane mai le tausiga o ia i aso taitasi. Sa manaomia se tagata e vaaia o ia i le taimi o le po ona o ona togafitiga, o lea sa faatu ai lona moega i totonu o le potu malolo. Sa ou fuafua ou te moe i luga o le nofoa umi. Sa tiga tele le ma’i o tina ma sa leai se mea na mafai ona ou faia. Sa ou lagonaina le vaivai ma le le fiafia.
A o taumafai ma le faigata tina e moe, sa uunaia au e faitau atu tusitusiga paia ia te ia. Sa fiafia o ia i tusitusiga paia, ae sa vaivai tele foi o ia e uu pe faitau. Ina ua ou fesili atu i ai, po o le a le mea e manao ou te faitauina atu, sa fai mai, e fiafia lava i le tusi a Alema. Ina ua uma ona tilotilo solo i ulutala o mataupu, sa uunaia au e faitau mai le mataupu e 7.
Sa faatumulia le potu i le Agaga a o ou faitauina upu o loo faamatala ai le misiona a Keriso i le lalolagi: “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma maʼi o ona tagata.
“Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale” (Alema 7:11–12).
Sa faauau pea ona ou faitau seia oo ina moegapepe lava Tina. Sa valaaulia e tusitusiga paia le Fesoasoani i lona fale ma sa fesoasoani e faamoe o ia. Sa ou maua se molimau malosi atu e uiga i le mana o tusitusiga paia, ma Iesu Keriso, o le sa naunau e avea ma o tatou Faaola ma faamafanafana i tatou i o tatou puapuaga uma.