E Mafai Ona Lelei Atu Ona Tatou Faia: Faafeiloaiina o Isi i totonu o le Lafu
O ni auala nei se fa e mafai ona e fesoasoani ai i tagata fou ma tagata ua toe foi mai, ia latou lagonaina e pei i latou o ni tagata auai [o le ekalesia].
I totonu o se masina talu ona papatiso Melisa (ua suia igoa uma) i Sisifo-ogatotonu o le Iunaite Setete, sa ia faia ai le tatalo amata i le sauniga faamanatuga. Sa popole o ia e uiga i le tatalo i nofoaga faitele ae “sa [ou] lagonaina le to’a i lo’u tomai e talanoa atu i lo’u Tama Faalelagi,” o lana tala mai lea. “Ma le isi mea, ua leva ona ou tatalo, ae maise lava a o ou sailiili i le Ekalesia, ma sa lagona le fesoasoani mai o le Agaga Paia ia te au.”
O le mea lea na faate’ia ai ina ua maua atu se imeli mai se tagata o le uarota o le na faamatalaina “ma le matuai auiliili” itu uma na sese ai lana tatalo. Sa vave ona oo mai ia Melisa le ma, maasiasi, ma se osofaiga faataumaoi o le masalosalo, seia oo ina musuia o ia e valaau atu i le faifeautalai ua maea lana misiona, lea sa aoaoina o ia. “Sa vave ona ia faamautinoa mai ia te au e faapea, sa matuai le tatau i lenei tagata ona faitioina au i se auala faapea,” o lana tala lea. “Sa ia fai mai foi, e le taitai lava fai le au epikopo i se isi tagata o le ekalesia, e pei ona sa ou manatu ai, e tuu mai lenei ituaiga o manatu faaalia.”
O le [lagonaina o le] faamalosiauina, sa tumai ai le toaga o Melisa i le uarota, talia valauga, ma faapea ona malosi ai lona faatuatua. Ae sa alu ni nai masina o tau faagalo le tiga ma [tau faafoi mai] le lagona to’a lea na aveesea mai le mauaina o lena imeli faavaivai loto.
Ae paga lea, o le tala a Melisa e le o se tulaga ese. E toatele tagata fou ma tagata ua toe foi mai e feagai ma luitau taua, ae e mafai lava ona alofia, mai le lagona latou te le auai. O nisi taimi e oo lava ia i latou e i ai molimau malolosi, e tauivi lava ia tumau faamaoni pe a latou lagonaina le le faaaofiaina. I se vitio faasolo talu ai nei ua faaautuina Lotogatasi i Eseesega, o loo tautalagia ai e taitai o le Ekalesia lenei faafitauli, ma uunaia tagata auai ina ia nofouta atili, ia aofia ai ma agalelei ia latou fegalegaleaiga.
E fesoasoani tala nei e faapupula ai le auala e mafai e i tatou o ni tagata o le ekalesia ona faaaoga nei mataupu faavae ma ofoina atu faauoga moni ma le lagolago faalelagona ia i latou o e matelaina mo lena taliaina ma le loto atoa i le Ekalesia a le Alii.
Ia Avea ma se uo i le faatuatua
“Pe a paologia le faitotoa o se falelotu i le ata lafoia o se tagata, e tatau ona latou lagonaina i le taimi lava lena le taliaina ma le alofaina ma le siitiaina ma le musuia … e alu atu ai ma avea ma se tagata lelei atu, ona latou te iloa e alofa le Alii ia i latou ma ona e i ai ni a latou uo i la latou tapuaiga.”
—Carol F. McConkie, Fesoasoani Muamua i le Au Peresitene Aoao o Tamaitai Talavou
Sa manaomia e Melisa ni uo moni, ae maise lava i totonu o lana uarota, lea e mafai ona tapa i ai pe a ia manaomia se fautuaga po o se fesoasoani. Sa lei auai lona toalua ma lana tama teine i le Ekalesia faatasi ma ia.
“O le sau i le lotu ma vaai atu i aiga uma na ou lagonaina ai le matuai tuua toatasi,” o lana tala lea. Sa agaga faauo tagata uma, ae e oo lava i lo latou fiafia, na ia lagona ai le pei “o le a ou le mauaina lava lena susulu FaaMamona ona sa nao au lava sa i ai faafitauli.”
E faaopoopo atu i le faifeautalai ua maea le misiona lea sa aoaoina o ia, sa faamanuiaina Melisa ia Sini, o se uo i le Initoneti o le sa muai faailoaina atu o ia i le Ekalesia. “Sa faigata le vaai atu o tauivi mai Melisa i lana eria i le lotoifale, a o ou tilotilo atu ae leai se mea na mafai ona ou faia,” o le faamalamalama mai lea a Sini. “O lea sa ou faia ai se vaega patino o le Facebook ma ni nai tagata eseese o le ekalesia sa matuai malolosi, ma agalelei, o e na fesoasoani ma faauoina o ia i itu na le mafai ona ou faia na o au.”
Sa le gata ina ofoina atu e le vaega se lagona o le faaaofia ai mo Melisa a o ia mauaina lona tulaga i le uarota, ae sa tali atu foi i fesili e uiga i sitaili o le olaga ma atugaluga faaleaganuu. “Sa ou ola ae i ofu lima mumutu ma ofuvae vae e pupuu tele,” na fai mai ai Melisa. Sa ia talisapaia uo i luga o le Initoneti o e na tali mai ma ni ata o lavalava e mafai ona ia vaavaai i ai i faleoloa o le lotoifale. O lenei mea na uunaia ai o ia e fesili atu i tamaitai i lana uarota e fautuaina atu ni ata tifaga, ina ua ona le toe maua le lagolelei i nisi o ana ata sa i ai.
O se vaega taua o le faauoga, na faailoa mai e Melisa o le, sa ia sailia fautuaga. O fautuaga e lei talosagaina, e pei lava o le pavale ae le o le faaaofia ai, o le osovale i tulaga patino lea e mafai ona faatiga ia i latou o e le o sauni i ai.
Mulimuli ane, sa valaauina ai Melisa e faiaoga i le Aualofa. O lona valaauga na tuuina mai ai ni avanoa e fegalegaleai ai ma isi tagata i le uarota. Sa faasoa atu e Melisa i uso ona faafitauli e le gata i le tau faamasani i le avea ai o se tagata fou, ae faapea foi le feagai ai ma se tamaitiiti e i ai manaoga faapitoa, nisi o faafitauli patino i lona soifua maloloina, ma le “Oi, ua lata ina mate la’u taifau.” O le aafiaga o le i ai o isi uso e faalogo ma tali mai faatasi ma o latou lava faafitauli i totonu o le vasega faapea ma talanoaga patino, na faamaonia le loloto o le faamalologa [e maua mai ai]. O nei fesootaiga sa fesoasoani ia Melisa e lagona ai, ua iu lava ina i ai ni ana uo moni i totonu o le faatuatuaga.
Ia Faaaofia Tagata Uma.
“Ua poloaiina e le Faaola Ona soo, ‘ia outou fealofani; faapei ona ou alofa atu ia te outou’ (Ioane 13:34; faaopoopo le faamamafa). O lea tatou te vaai atu i auala sa Ia alofaina ai i tatou. … Afai tatou te faia o Ia ma o tatou faataitaiga, e tatau ona tatou taumafai e le aunoa e aapa atu ia faaaofia ai tagata uma.”
—Elder Dallin H. Oaks o le Korama a Aposetolo e Toasefululua
O Ropati, o se tagata sailiili i Kanata, na auai atu i ni fonotaga ma gaoioiga eseese a le AAG. Sa ia sailiili i ni tapuaiga eseese ae o loo faaauau pea ona suesue i le Ekalesia ona o le musumusuga sa ia maua i ona aoaoga faavae ma le Tusi a Mamona. E auai atu i le inisitituti e aoao atili ai ma iloa ai o le siosiomaga o fegalegaleaiga e “manaia ma matagofie, faauo, ma tumu i lagona lelei,” o lana tala lea. “O tagata Mamona o ni tagata sili ona lelei i le lalolagi.”
Sa faamatala e Ropati o ia lava, o se tagata matamuli, ma sa fia fegalegaleai ae fai mai, “Sa tele ina ou tutu i talane o puipui o le potu, na le mautonu pe faapefea ona avea ma se tasi o vaega, o nisi o i latou o ni uo ua leva o le AAG o e e foliga mai e le o manaomia se isi tagata.” Peitai e lei leva ae mou malie atu lenei lagona o le faaesea. I le taimi o se gaoioiga, sa ia faamatala ai, “sa sau ai se tagata ia te au ina ua uma le taumafataga o le afiafi ma faamalosiau mai ou te nofo mo le tifaga; ana leai, semanu ou te tuumuli, ae nai lo lena, sa ou maua se taimi sili ona fiafia. Na manaomia ona ou iloa sa i ai se tagata na manaomia au iina.”
E faapei o Melisa, na te talisapaia uo o le AAG o e e faamatalatala atu aoaoga faavae, ae le faafitoitonuina tele le ala e ola ai. O uo e matele i le faalogo nai lo le faatonu, e pei lava o se “tagata o loo savali i ou tafatafa, nai lo o le tulei mai tua ina ia topetope ai lau alu. O le tele o taimi, e te lāvea ma tau pa’ū.”
Sa tauivi lava Ropati e lafoai le ulaula. O lona le lagolelei ua faapupula ai le ala e nofouta lelei ai i latou e fou i o latou eseesega. “E leai se tasi o tagata o le au paia ua faia mai se tala ia te au e uiga i lo’u manogi tapaa,” o lana tala lea. “Peitai, afai e le i faatoa uma ona tata ou lavalava, ou te nofo i le fale ou te le alu i le inisitituti po o le lotu.”
E mafai ona tatou atinaeina se lagona sili atu o le auai a o tatou faamautinoa atu ma faaaofia i latou o e e fou i le Ekalesia. Na saunoa Elder D. Todd Christofferson o le Korama a Aposetolo e Toasefululua, “Ou te matuai faanoanoa lava pe afai e sau se tagata ma le matuai vaivai ma faapea mai … , ‘Ou te fia i ai iinei’ ona le amanaia lea pe le manatulia o ia. O se mea leaga tele lena mea. … E tatau ona tatou tali lelei atu nai lo lena” (“Is There a Place for Me?” [vitio], lds.org/media-library).
Tuu Oe Lava Iina
“A e filifili e tuu oe lava iina, ua e faamanuiaina le olaga o se isi tagata. … E mafai ona e sueina le tagata o loo nofonofo i fafo, o nofonofo mamao ese atu? … Pe a ua e tatalaina lou loto i isi tagata, e te iloa ai tatou te auai uma lava.”
—Jean B. Bingham, Peresitene Aoao o le Aualofa
Ina ua auai Elsa i le Ekalesia i Netherlands, sa ia maua ai se fesootaiga moni lava ma se Tama Faalelagi agaalofa. Ae i le avea ai ma se talavou matua nofofua, sa feagai foi o ia ma le tuuatoatasi ina ua le maua e tagata o lona aiga ma ana uo le lagolelei i talitonuga ma mausa a lana lotu fou. “O le mea sili ona lelei sa faia e tagata o le ekalesia mo au,” sa ia fai mai, “o le naunau lea e faauo mai ia te au i fafo atu o le lotu. O nisi matou te o i le malumalu e fai papatisoga e ui lava ua uma ona maua o latou faaeega paia. E manaomia ona matou fegalegaleai ma tagata o le ekalesia i tua atu o le Aso Sa e maua ai le malosi ma tumau e oo i le iuga.”
E manatu Elsa, o lona luitau tele lava i le avea ai o se tagata fou liliu mai o le, “faamoemoe lea ia vave ona malamalama i mea uma”, o lana tala lea. “I faapuupuuga o upu, mea e tutupu, ma valaauga uma. E fai lava si lofituina, ma o isi taimi ou te popole i tagata e faamasinoina au ona o le le vave o la’u pu’e.” E le gata i lea, e pei o le toatele o isi, sa maua o ia i le popolevale i fegalegaleaiga “o le mea lena ou te fiafia ai e nofo latalata i le pito i tua o le falesa, e seasea ona fegalegaleai.” O vaega toatele e taufaafefe, ma e mafaufau o ia pe faamasino o ia e isi ona o lona leai o sona sao. “E le faapea ou te le manao e fai so“u sao i lesona po o le usuina leotele o viiga pe fai se tatalo i luma o tagata,” o lana tala lea. “Ae ona ou te fefe ina ne“i ou tagi i luma o nei tagata ou te lei masani lelei ai.”
Fai mai Sister McConkie: “Ou te iloa ni tagata e omai i le lotu i Aso Sa uma ina ia mafai ona musuia ma faagaeetia, ma e na o le savavali ese atu ma lagona ua faamasinoina ma le le alofaiga—e le manaomia, e pei e leai se avanoa mo i latou i le lotu. E tatau ona ese lo tatou faia o lenei mea.”
Fai mai Elsa, o tagata o le Ekalesia o e e le faamasino atu, e sili atu ona fesoasoani ia te ia. “Latou te faalogo i ou faafitauli ae e le osovale i lo’u olaga faaletagata lava ia. Latou te galulue ma le faamaoni ma le onosai a o ou aoaoina mo au lava mea uma e uiga i le tagata o le ekalesia.” E ui lava i lona popolevale, ae e o atu faatasi o ia ma faifeautalai e sue tagata fou o le ekalesia ma tagata sailiili. “Ou te iloa le lagona o le avea ma se [tagata] fou,” sa ia faamalamalama mai ai, “ma ou te manao ia mautinoa e leai se tasi e liliuese mai meaalofa o le talalelei ia na faasaoina ai au mai le faanoanoa.”
Ola i le Talalelei, Avea ma Soo
“E mafai e tagata ona aumai ni meaalofa ma ni manatu eseese. O le vaega tele o aafiaga ma tulaga, ma luitau e feagai ma tagata, o le a ta’u mai ai ia i tatou le mea moni e matuai taua i le talalelei a Keriso. Ma o le tele o mea na totoe na faapea ona maua i le aluga o taimi, ma e sili atu ona faaleaganuu nai lo o le faaleaoaoga faavae, e mafai ona see ese ma mafai ona tatou aoao moni e avea ma soo.”
—Elder D. Todd Christofferson o le Korama a Aposetolo e Toasefululua
E ui lava i le mea sa faitio muamua ai i le Ekalesia, na auai Simi ona sa ia maua “se molimau faaleagaga e le mafesiligia mai le Agaga Paia lea na molimau mai i le moni o le talalelei ma ona aoaoga faavae.” Ae ui i lea, o se tasi o ona luitau tele lava, o le tau fetuunai i le aganuu a le AAG.
Ina ua uma ona papatiso, sa ia iloa ai, o le tele o amioga ua tele ina talia e tagata o le ekalesia, o aganuu ae le o aoaoga faavae. “E ui ina tupu lenei mea i soo se lotu ua faatulagaina,” na ia faamatala mai, “ae sa ou lagonaina afai ou te lei usitai i ni auala faapitoa, o le a tuuaia au i le le taliaina atoatoa o le talalelei. O a’u tauiviga sa le o le talalelei po o aoaoga faavae ae o se tulaga o le usitaia lea e pei e na o le faaleaganuu.”
E pei ona faamalamalama mai e Elder Christofferson, tatou te manaomia o tatou tagata fou liliu mai, tagata sailiili, ma isi e fesoasoani ia i tatou e taatiaese faiga masani e le o ni aoaoga faavae ua faapea ona faaputu i le aluga o taimi ae avea ma ni soo moni.
O le saunoa mai i faamanuiaga o fegalegaleaiga ma tagata e eseese tulaga, ua faamalosiau ma ai Elder Oaks i le Au Paia o Aso e Gata Ai, e aloese mai le taulai atu i eseesega ae, nai lo lena, ia amata i le fesili atu, “O fea e te sau ai? A o ou tulaga faatauaina autu? O le a le mea e te manao e ausia? O lenei ituaiga o talanoa tuusao ma le taliaina, e uma ane, ua fesoasoani ia i latou e fou i la tatou lio ia lagona le faaaofiaina, siitiaina, alofaina, ma saunia e talia le faaolataga i totonu o le tino o Keriso.
E pei o taitai o le Ekalesia i le taimi nei, sa popole le Aposetolo o Paulo e uiga i fevaevaeaiga i le Ekalesia anamua a Keriso. Sa ia uunaia tagata o le Ekalesia o i ai ni manatu malolosi ia aloese mai le faatiga i uso a Au Paia e uiga i aga masani ia e mulimuli ane, e le taua moni, ma faamalamalama mai e faapea, e ui “e faafefeteina le poto, a o le alofa e faamafanafana lea” (1 Korinito 8:1). Sa ia valaau mai ia “[leai] ni maseiga ia te outou,” ma ia taulai atu ia “Iesu Keriso, o ia lava na faasatauroina” nai lo o mea e ese ai tagata o le ekalesia mai le tasi ma le isi (1 Korinito 1:10; 2:2).
I aso nei, ua lapataia i tatou e aposetolo ma perofeta ina ia saili le lotogatasi i eseesega, ma faamalosiau mai ia tatou tuu ni avanoa mo tagata taitoatasi o le Ekalesia a Keriso, o se vaega taua o lo tatou faamoemoega ia o mai ma le “lotogatasi i le faatuatua ma le iloa lelei o le Alo o le Atua …ia oo i le fua o le ua matua e tatau ma le tumu o Keriso” (Efeso 4:13).