Savali a le Au Peresitene Sili
O Perofeta e Taialaina i Tatou
Saunia e Peresitene Thomas S. Monson
I ni nai tausaga ua mavae, sa ou nofo ai i le potu o le Malumalu o Sate Leki lea e fono ai le Au Peresitene Sili ma le Korama a Aposetolo e Toasefululua e faatasi i le vaiaso. Sa ou tepa atu i luga o le puipui lea e feagai ma le Au Peresitene Sili, ma o iina na ou vaai atu ai i ata o Peresitene taitasi o le Ekalesia.
A o ou tilotilo atu ia te i latou, o e na muamua atu ia te a’u—mai le Perofeta o Iosefa Samita (1805–44) ia Peresitene Gordoon B. Hinckley (1910–2008)—sa ou mafaufau, “Ou te matua faafetai mo le taitaiga a i latou taitoatasi.”
O tamalii maoae nei o e sa le’i maluelue, sa le’i faavaivai ma sa le’i toilalo. O ni tagata nei o le Atua. A o ou mafaufau i perofeta o aso nei na ou iloa ma alofaina, ou te manatua o latou soifuaga, o lo latou uiga, ma a latou aoaoga musuia.
O Peresitene Heber J. Grant (1856–1945) o le Peresitene o le Ekalesia i le vaitaimi na ou fanau mai ai. A o ou mafaufau i lona soifuaga ma aoaoga, ou te talitonu o se uiga auaumama sa faaalia e le aunoa e Peresitene Grant o le filiga—filiga i mea e lelei ma matagofie.
O Peresitene Siaosi Alapati Samita (1870–1951) sa Peresitene o le Ekalesia i le vaitaimi sa ou auauna ai o se epikopo o le matou uarota i le Aai o Sate Leki. Sa ia saunoa faapea, o loo i ai se tosogamaea tele o loo faia i le va o le Alii ma le fili. Sa ia aoao mai, “Afai o le a e tumau i le itu a le Alii, o le a e i lalo o lana uunaiga ma o le a leai sou manao e faia mea sese.”1
Sa valaauina au e auauna atu o se sui o le Korama a Aposetolo e Toasefululua i le 1963 e Peresitene Tavita O. MaKei (1873–1970). Sa ia aoaoina mai le magafagafa i isi e ala i le ola sa soifua ai i lona olaga. Na saunoa o ia, “O le Kerisiano moni, o le alofa i lona faatinoga.”2
O Peresitene Iosefa Filitia Samita (1876–1972), o se tasi o tusitala a le Ekalesia na tusia le tele o tusi, sa avea ma se mataupu taiala i lona soifuaga le atamai i le talalelei. O se tamalii lea ua ou iloaina, sa faitau e le aunoa i tusitusiga paia ma sa masani i aoaoga ma aoaoga faavae o loo maua ai i totonu o o latou itulau.
Na auauna atu Peresitene Harold B. Lee (1899–1973) o se peresitene o le matou siteki a o ou laitiiti. O se upusii e sili ona fiafia i ai o ia o le, “Ia outou tutu ai i nofoaga paia, ma aua le masii ese.”3 Sa ia uunaia le Au Paia ia agavaa i le, ma tali atu i, musumusuga a le Agaga Paia.
Ou te talitonu o se mataupu faavae taiala i le soifuaga o Peresitene Spencer W. Kimball (1895–1985) o le tuuto. Sa atoatoa ma manino lelei lona tuuto i le Alii. Sa tuuto foi o ia i le ola i le talalelei.
Ina ua avea Peresitene Ezra Taft Benson (1899–1994) ma Peresitene o le Ekalesia, sa ia tofia au e auauna atu o lona Fesoasoani Lua i le Au Peresitene Sili. O le alofa sa avea ma ana mataupu faavae taiala, lea sa faaalia i lana upusii na sili ona fiafia i ai, na fofoga mai e le Faaola: “O a ituaiga o tagata e tatau ona outou i ai? E moni ou te fai atu ia te outou, e pei lava o au nei.”4
O Peresitene Howard W. Hunter (1907–95) o se tasi sa le aunoa ona vaavaai mo uiga e sili ona lelei i isi. Sa faaaloalo o ia i taimi uma; sa lotomaualalo o ia i taimi uma. Sa o se faamanuiaga lo’u auauna atu ai o lona Fesoasoani Lua.
Na aoao mai e Peresitene Gordon B. Hinckley i tatou, ia faia le mea sili tatou te mafaia. Sa ia tuuina mai se molimau mamana e uiga i le Faaola ma Lana misiona. Sa Ia aoaoina i tatou ma le alofa. O le auauna ai o lona Fesoasoani Muamua sa o se faamamaluga ma se faamanuiaga mo a’u.
Ua auina mai e le Faaola ia perofeta aua e alofa o Ia ia i tatou. I le taimi o le konafesi aoao ia Oketopa a sau nei, o le a toe maua e le Au Pulega Aoao o le Ekalesia le avanoa e faasoa atu ai Lana afioga. Matou te faataunuuina lenei tiutetauave ma le mamalu tele ma le lotomaualalo.
E maeu le faamanuiaina o i tatou i le i ai o le Ekalesia toefuataiina a Iesu Keriso i luga o le fogaeleele, ma o le Ekalesia ua faavaeina i luga o le papa o faaaliga. O faaaliga faifai pea o le toto ola tonu lea o le talalelei a Iesu Keriso.
Tau ina ia tatou sauniuni e maua faaaliga faaletagata lava ia lea o le a tele mai i le taimi o le konafesi aoao. Talosia ia tutumu o tatou loto i le naunautai loloto a o siiae o tatou lima e lagolago ai perofeta ma aposetolo soifua. Talosia ia faamalamalamaina, siitia, faamafanafanaina, ma faamalosia i tatou a o tatou faalogologo atu i a latou savali. Ma talosia ia tatou saunia e toe tautino i tatou lava i le Alii o Iesu Keriso—Lana talalelei ma Lana galuega—ma ola ma se tautinoga faafouina i le tausia o Ana poloaiga ma le faataunuuina o Lona finagalo.