Tusitusiga Paia: Sefulu Minute i le Aso
Sa matou fai atu i ni tagata talavou se toalima e faataitai i le valaaulia a Elder Stevenson e suitulaga le 10 minute o le matamata i le televise i aso taitasi i le faitauina o le Tusi a Mamona.
Pe ua e faatuina se sini o le suesueina o tusitusiga paia e tai foliga faapenei? “E amata atu i le aso lenei, o le a ou suesueina au tusitusiga paia mo se itula i aso uma lava—ma o le a ou faia i le atoatoa.”
Afai ua e setiina lena ituaiga o sini, o faapefea mai? E matea, sa lei lelei tele. O le taumafai e atinae se amioga fou e mafai ona matuai faigata tele, ae maise lava ona e masani ona tatou faia ni sini le talafeagai (e pei o lea o loo i luga) lea e vave lava ona tatou lelavava pe lofituina ai.
Ina ia faia moni le suesueina o tusitusiga o se mausa, e sili atu le lelei o le amata [i mea] laiti. Na tuuina mai e Elder Gary E. Stevenson o le Korama a Aposetolo e Toasefululua se fautuaga lelei tele: “E faaalu e le autalavou se averesi e fitu itula i le aso e matamata ai i le TV, komepiuta, ma telefonipoto. … E mafai ona e suitulaga nisi o na taimi i aso taitasi—ae patino lava i taimi o loo faaalu i alafaasalalau faaagafesootai, le initoneti, taaloga, po o televise—i le faitauina o le Tusi a Mamona? …E tusa lava pe na o se 10 minute i le aso.”1
Sa matou fai atu i ni autalavou se toalima e talia le valaaulia a Elder Stevenson. Sa latou maitauina taimi o aso uma latou te matamata ai i le televise, ona latou suitulagaina lea o le 10 minute o lena taimi e suesue ai le Tusi a Mamona. Tagai foi la i a latou taumafaiga—atonu o le a latou musuia oe e te faataitai foi i ai!
Ata na tusia e Iker Ayestaran
“Ina ua uma ona tusitusia faamaumauga o le taimi na ou faaaluina i ala o faasalalauga faa-agafesootai mo le vaiaso muamua, sa fai si ou te’i i le aofai o le taimi na ou faaaluina i la’u telefoni. Sa o se manatu lelei tele lea mo au e faaaoga ai nisi o na taimi mo le Tusi a Mamona, ae maise lava ona o le faitauina ma le filiga o tusitusiga paia e le o se tasi lea o o’u malosiaga.
“O le mea moni, o se tasi o aso muamua lava sa faitau ai au tusitusiga paia i le taeao, sa o se aso le manaia tele lea. Ae ui i lea, sa ou iloaina o le faitauina o tusitusiga paia o le a alualu ai i luma lo’u olaga, o lea sa faaauau ai pea ona ou faitauina.
“Ou te manatu o le aafiaga aupito silisili lava mai le faitauina i aso uma o le, sa faateleina ai ona ou lagonaina le Agaga. Sa faigofie atu ona ou faia ni faaiuga. Sa ou lagonaina le alofa sili atu mo tagata e siomia au, ma se manao faateleina e auauna atu. A faitau au tusitusiga paia i le taeao, e sili atu ona manaia le aluga o le aso. A ou faitau i le po, ou te moe lelei lava. Ou te fautuaina malosi ia faataitai tagata uma i lenei mea. Oka se eseesega e faia ai!”
Bryn C., 18 tausaga, Iuta, ISA
“Ina ua ou mataituina le faaaogaaga o la’u telefoni, sa ou iloa ai sa ou i luga o la’u telefoni le tele o le taimi o le Aso Sa. Sa ou manatu sa o se mea leaga lea, ae sa tatau ona ou taumafai e faalatalata atu i lo’u Faaola—ae nai lo lena, sa ou sioa atu i le lau o la’u telefoni.
“A o amata ona ou faitauina au tusitusiga paia, ou te faitau i le 10 minute i po uma ae ou te lei moe, mo au la, na toeitiiti lava a mataupu i le po. A o ou faia lenei mea, sa ou matauina ai ua faigofie atu ona ou moe. Sa ou iloa foi ua lelei atu au faaiuga e fai i le vaiaso atoa, ma o le aotelega la, sa ou maua lagona lelei e uiga ia te au lava.
“Ou te faafetai lava ona sa mafai ona ou maua lenei valaaulia, ma ua ou fuafua e faaauau pea ona faitau mo le 10 minute i le aso, ma fai a’u tatalo i po.”
Ryan E., 16 tausaga, Alapama, ISA
“Ou te lei mafaufau moni sa tele lo’u alu i ala o faasalalauga faa-agafesootai, seia oo ina talosagaina au e mataitu lo’u faaaogaina, ma o le taimi lena na ou iloa ai le tele o lo’u olaga na faaalu i ala o faasalalauga.
“O le taimi lava na amata ai ona ou matuai taulai atu i le faitauina o tusitusiga paia i aso uma, sa ou lagonaina se naunautai e faitau i le Tusi a Mamona, ma sa ou manao e aoao mai ai. A o ou faitau mo le 10 minute i aso taitasi, sa oo ina faateleina lo’u fiafia i tala. Pe tusa ua afa [la’u faitauga] ae ou filifili loa, ao lei amata ona ou faitau, o le a ou tatalo ina ia ou maua tali i au fesili, ma sa ou maua moni lava na tali e ala mai i le Agaga Paia.
“Ou te iloa e talanoa mai le Atua ia i tatou e ala mai i tusitusiga paia, ma o le Tusi a Mamona o se tasi o molimau ia Iesu Keriso. E mafai moni lava ona faamanuiaina ai o tatou olaga e ala i le suesue ma le agaga tatalo ma le faatauanau. Ou te matua faafetai mo le avanoa sa ou maua e auai ai i lenei mea, ma ou te valaaulia tagata uma ina ia faia foi faapea. Sa o se aafiaga na suia ai olaga.”
Sydney B., 16 tausaga, Arisona, ISA
“A o lei ou mataituina le taimi sa ou faaaluina, sa ou faapea o le a faigata tele le aveeseina o le taimi ma le faitauina o tusitusiga paia—ae ina ua ou iloa le tele o le taimi na ou faaaluina i ala o faasalalauga faa-agafesootai, o le aveesea mai o le 10 minute mai lena taimi sa matuai faigofie lava! Sa mafai ona ou faitauina i le malologa o le aoauli po o le taimi tonu lava a o lei amataina le seminare.
“Ina ua uma ona ou faitau i tusitusiga paia, sa sili atu ona ou mataala i mea na ou tilotilo i ai i luga o faasalalauga faa-agafesootai. Afai ou te tau atu i se mea leaga, ma gagana le lelei po o se savali lelei, ou te matauina ma taumafai ou te aloese ai, ia lelei atu nai lo le taimi muamua. Sa ou matauina foi, o au tatalo sa sili atu ona faamaoni ma sa tele ni tali o tatalo na ou mauaina. E mautinoa lava o le mea lenei ou te faamoemoe e faaauau pea mo se taimi umi lava!”
Izzie J., 16 tausaga, Kalefonia, ISA
“E ui lava ina sa galo ona ou faitau i ni nai taimi, ae o le aotelega, sa manuia. Na ou iloaina, ae ou te lei amata i le valaaulia a Elder Stevenson, o le mea moni, sa tusa pe nao le 3 minute i po taitasi na ou faitau ai, ma o le faateleina o la’u faitau i le 10 minute i po taitasi, ua ou vaaia ai se eseesega i lo’u olaga. Pe a ou faitau, ou te lagona le faateleina o lo’u lagonaina o le Agaga, ma e mafai ona ou lagonaina faamanuiaga o le puipuiga faaleagaga i aso uma. E tutusa lava le faigata o le tau amata ona faitau i le mavae ai o se taimi e leo toe faitauina tusitusiga paia, ma o le taimi lava na ou amatalia ai le mausa o le faitau, sa le mafai ona ou toe tuua.
“Sa ou matauina mo au lava ia, a ou faitauina tusitusiga paia i le taimi tonu o le a ou moe ai, e masani lava ona ou moe pe le tele foi se mea e maua mai la’u faitauga. E sili atu le lelei o le faitau a le o le taeao po o le tuua foi o le aoga.
“Sa ou fiafia tele i le faiga o lenei mea, ma ou te luiina tagata uma e faataitai i ai.”
Rachel A., 15 tausaga, Colorado, ISA