Faatoilaloina o le Matautia o le Masalosalo
Saunia e Elder Hugo Montoya
O le Fitugafulu
E oo lava i laau tetele e mafai ona gauai atu i siama e le vaaia. E tutusa lava ma le faatuatua—afai tatou te faatagaina le masalosalo e tuputupu ae, e mafai pala ai aa faaleagaga seia oo lava ina tatou palalasi.
Ata pue mai le Getty Images
I le taimi o le galuega a le Faaola i le lalolagi, sa tofotofoina ai o Ia e Satani.
“Ua faalaina ia i po e fagafulu ma ao e fagafulu, mulimuli ane ona fia taumafa ai lea o ia.
“Ona alu ane lea ia te ia o le faaosooso, ua faapea mai, Afai o oe le Alo o le Atua, ina fetalai atu ia ia liu areto nei maa” (Mataio 4:2–3; ua faaopoopo le faamamafa).
Na faaosoosoina e le tiapolo le Faaola e ala i le faamasalosalo i Lona paia. Sa ia faaaogaina le fuaitau o le aiaiga “Afai o oe le Alo o le Atua.”
Ae o le faaaogaina o le malosi lea e sau mai le iloa o tusitusiga paia, na teena ai e le Alii le faaosoosoga. Na fetalai o Ia,” “Ua tusia, e le na o mea e ai e ola ai le tagata, a o afioga uma e tulei mai i le fofoga o le Atua” (Mataio 4:4).
O le talanoaga lenei i le va o Iesu Keriso ma Satani ua tatou maua ai se manatu manino i le ala e faaosooso ai i tatou e le fili ina ia tuu masalosaloga leaga i o tatou loto ma mafaufau.
O Se Osofaiga Natia
A o ou ola ae i Sonora, Mekisiko, e i ai ni laau tetele e tau o Lora Initia. E toeitiiti lava 100 futu (30 m) le maualuga, ma ni ogalaau tetele ma fausaga o lala ma lau ua malolosi lelei. Talu ai nei lava, na osofaia ai le tele o nei laau i se faamai e taua o le aa pala a Texas. Pe a osofai lenei limu, o ona aafiaga e le vaaia mo ni nai tausaga. Ae ui i lea, e faasolosolo malie lava ona pala ia aa o na laau matagofie ona o limu, ma amata ai ona pepe. O laulaau e liu i le lanu samasama ona toulu lea. Ona mago lea o le ogalaau ma lala, ma e tatau ona tatuu i lalo le laau.
E pei o le sosolo o limu i nei laau, e mafai e masalosaloga ona osofaia o tatou mafaufauga. Afai tatou te faatagaina i latou e ola, i se taimi umi e mafai ona aafia ai o tatou aa ma pala ai lo tatou faavae o le faatuatua seia oo foi ina tatuu i tatou i lalo.
O ituaiga uo faapena e mafai ona tuuina mai le masalosalo e ala i le fai mai o fesili faatiga. O saite o le Initoneti e mafai ona faaosofia le masalosalo e ala i le tuuina mai o faamatalaga le sa’o. Ae e faateteleina masalosaloga pe a tatou lagonaina le tuulafoaia po o le lofituina, ona fesiligia ai lea o avega o loo tatou tauavea. O faitioga a le tagata natura, e pei o le “Aisea ua tupu ai ia te au, le Alii e?” po o le “Afai o au o Lau auauna, aisea ua e faatagaina ai … ,” e mafai ona musumusu mai i o tatou taliga e le Tama o pepelo uma. E i ai sona faamoemoega taufaamatau: ina ia faavaivaia lo tatou mautinoa o i tatou o fanau a le Atua.
Ina ia tetee atu i le masalosalo faapena, e tatau ona tatou manatua le atoatoa o le fuafuaga a lo tatou Tama. Nai lo o le nopiai ai i fesili le lelei, e tatau ona tatou ole atu mo le malosi, e pei ona faia e Iosefa Samita: “Ia manatua lau au paia mafatia, lo matou Atua e; ma o le a olioli ai au auauna i lou suafa e faavavau” (MF&F 121:6). E tatau foi ona tatou faatuatua o le a laveaiina i tatou e le Alii (tagai i le 1 Korinito 10:13).
Gaoi e Faafefe i le Fana
Ou te manatua se aafiaga patino lea na fesoasoani ia te au e aoao ai e sui le masalosalo i le faamoemoe. Sa ou auauna atu o se peresitene o le siteki i le taimi lena. Sa itiiti lau fanau. Sa ma faia ma lou toalua pisinisi fai totila, ma sa ma galulue ai mo le tele o itula.
I se tasi o na po, a o ma faia ma lou toalua ni totila mai le vaeluapo seia oo i le 3:00 i le vaveao, na o mai ai ni alii talavou se toatolu i totonu o le ma faleoloa. Sa matuai onana le toatolu lenei i fualaau faasaina. Sa fai e le toalua o i latou ni matapulepule e na o mata ma gutu e aliali ai, ma ni ofufaatimu uumi. Sa nana i ofufaatimu a latou auupega. Sa latou faamatauina i ma’ua, tuu ma’ua i totonu o le faleoloa, ae tapuni le faitotoa. Na tutu le toatasi e leoleo fafo, sa faafia ona alaga mai, “Fasioti i la’ua! Fasioti i la’ua?
Sa tuu e se tasi o alii talavou le gutu o lana fana i lo’u manifinifi ma faamalosi a’u e taoto i lalo. Sa tuu e le isi alii le gutu o lana fana i le fatafata o lo’u toalua. Sa ou tatalo ia le matuaoti la’u fanau, ma sa puipuia i ma’ua e le Alii. Sa iu ina loka i ma’ua e le au faomea i totonu o le faleletaua ona nino loa lea, ma o ese atu i lau pikiapu.
Na ma matala loa, ma valaau loa mo se fesoasoani. Na o mai leoleo faapea foi ma lo’u uso. I se vave na mafai ai, sa matou aveina atu ai lo’u toalua i le fale. Ona ma o lea ma lou uso e sue lau taavale, ae sa lei faamanuiaina. Sa ou toe foi atu i le fale i le 5:00 i le vaveao, ma le lagona faanoanoa tele.
O Fea Lo’u Aiga?
Sa faateia a’u ona sa lei i ai iina lou toalua ma la’u fanau. Sa fai mai se tuaoi, sa tigaina lou afafine e fa tausaga le matua i le manava tiga, ma na latou faanatinati atu o ia i le falemai. I le iloaina o le a matou matua manaomia se tupe mo le tausiga o ia, sa ou lagonaina sa leai sau filifiliga ae ia toe foi atu i le faleoloa totila ma fai oka o le aso. Talu ai sa na o i ma’ua ma lou toalua le aufaigaluega, o lea sa na o au ai ma sa ou nanati solo, i le faiga o paluga, tuu paluga i totonu o le masini fai totila [hopper], fetuunai le tetele, fetamoeai i luma ma tua e faauma totila ma tautua i tagata faatau.
E oo ane i le taimi lea ua ta le 8:00 i le taeao. Sa amata ona ou mafaufau i mea na tutupu i le po. Sa oo mai le fesili i lo’u mafaufau, “Afai o oe o le peresitene o le siteki, aisea ea ua tutupu ai nei mea uma ia te oe?”
Mea Uma Lava ae Le o Totila
Sa ou tuleieseina le mafaufauga faataumaoi ae ou tatalo mo le malosiaga. Ona ou faalogoina lea o se leo i ou tua: “Peresitene.” O lo’u epikopo ma se uso mai le uarota, o ou faiaoga o aiga.
Fai mai le epikopo, “Ma te le iloa fai totila, e le mafai la ona ma fesoasoani atu ia te oe iinei. Ae aua e te popole i lau loli, lou toalua, lou afafine ma’i, po o isi au fanau. Nofo oe iinei ae o le a ma fesoasoani atu i isi mea uma.” Sa maligi ou loimata o le lotofaafetai.
Sa latou vaaia mea uma lava vagana ai totila. I lena aoauli ina ua ou foi atu i le fale, ou te alu atu ua uma ona tapena ma mama lou fale, na auli ou ofitino, ma sa taatia mai se meaai mo au. Sa leai se tasi na i ai i le fale, ae na ou iloaina sa i ai iina le Aualofa. Na maua e leoleo lau taavale, ma na totogi e se tasi o le uarota [le tupe] e faamatuu mai ai.
Sa ou alu vave loa e vaai lo’u toalua ma lo’u afafine. Sa i ai iina le epikopo, ma sa ia faia se faamanuiaga o lo’u afafine. Sa ma’i o ia i le pitogaau, ae ua sologa lelei mea uma.
A o ma talanoa ma lo’u toalua, na ma maua se uunaiga e faapea, sa lei faaaogaina e le epikopo le taulaga anapogi po o aitema mai le faleoloa a le epikopo e fesoasoani ai ia i matou. Nai lo lena, sa ia faaaogaina punaoa ma le alofa mutimutivale o tagata o le matou uarota.
I ni nai aso mulimuli ane, a o malolo lou afafine ma a o fesoasoani mai lou toalua ia te au i le faleoloa totila, na taunuu mai ai ni tamaitai se toatolu. O i latou ia o tina o le au gaoi talavou ma na oo mai e fai mai le latou faatoesega. Sa latou faamatala mai, na maua e leoleo a latou fanau tama. Mulimuli ane, na toso mai ai e nei tina a latou fanau tama i totonu o le faleoloa e talosaga mo le faamagaloga, ma sa ma faamagalo atu ia i latou.
Latou Te Le’i Masalosalo
Ua faamalolosia aa faaleagaga o lo’u aiga mo le ono augatupulaga ona o le faatuatua le maluelue o le tama o lo’u tamamatua.
E faamanatu mai ia te au e se tasi o faataitaiga i lo’u talafaasolopito le aua le masalosalo. I le 1913 i Mekisiko, na talai atu ai e Elder Ernest Young ma ana soa le talalelei i le tina o le tina o lo’u tinamatua o Maria de Jesus de Monroy, o se ua oti lana tane; [ma] lana fanau teine e toatolu o Natalia, Jovita, ma Guadalupe; ma lana tama tama e toatasi o Lafaele—le tama o lo’u tamamatua. Sa papatisoina i latou i le aso 10 o Iuni. E lua masina mulimuli ane, na tuua ai e tagatanuu o le Iunaite Setete le atunuu ona o le Fetauaiga i Mekisiko.
I le aso 29 o Aokuso, 1913, le aso na faamoemoe e tuuvaa ese ai Peresitene Rey L. Pratt ma faifeautalai Amerika uma, na alu atu ai Lafaele Monroy, o se alii na 34-tausaga lona matua, ua lua masina talu ona liliu mai, i le fale o le misiona e faailoa atu i ai ona atugaluga. “O le a le mea o le a oo ia matou?” sa ia fesili ai. “E leai se paranesi ua faatulagaina i San Marcos, ma e le o ia i matou le perisitua.” O le faalogo atu i atugaluga a Lafaele, na fai atu ai Peresitene Pratt ia te ia e nofo i lalo. Sa tuu ona lima i luga o le ulu o Rafael, faaee atu i ona luga le Perisitua Mekisateko, faauuina o ia o se toeaina, ma vaetofia o ia o se peresitene o le Paranesi o San Marcos.
O Lafaele, o le sa malamalama o ana feagaiga o le papatisoga na paia ma faavavau, sa malamalama foi e tatau ona ia faasoa atu le talalelei. Mo le 23 masina, sa fesoasoani ai i laua ma lona fesoasoani o Vicente Morales, i le faaliliuga ma le papatisoga o le silia ma le 50 o tagata. Sa laua talai atu i nai isi tagata e toatele.
Ma o le aso 17 o Iulai, 1915, sa taunuu atu ai fitafita i San Marcos. Na tuuaia e fitafita tau ia Lafaele ma Vicente i le auai ma lagolago i le autau tetee, i le nanaina o auupega, ma le auai i se tapuaiga ese lava. Sa latou ave faapagota i laua, sauaina faatauga i laua, ma tasisi seia oo ina la matapogia. Ona tuu atu lea i ai e fitafita se avanoa mulimuli e faasao ai o laua ola. O le a faasaoina i laua pe afai la te lafoaia le la tapuaiga. Sa talu atu Lafaele, “E le mafai ona ou faia, aua ua ou iloa e moni le mea ua ou mauaina.”
Sa lei masalosalo Lafaele ma Vicente. Sa tutusa a laua gaoioiga ma o laua malamalama ma molimau. I le faaiuga o lena aso, sa fasiotia ai i laua e le Autau a le Liberation o le itu i Sate, ma tuuina atu ai o laua soifua mo le mea sa la talitonu i ai.1
O Loo Moni Lava i Aso Nei
Ia aua nei o tatou masalosalo i le moni o le galuega lenei. Soo se taimi lava e tofotofooina ai i tatou e masalosaloga, ia tatou mafaufau loloto i o tatou aafiaga faaleagaga. O le faia o lena mea, o le a fesoasoani tatou te tafiesea ai masalosaloga. E faapitoa le moni o lenei mea ia i latou, o e ua taliu mai mai le galuega faafaifeautalai ona faatagaina lea o masalosaloga e oo atu i [o latou mafaufau], o tagata ua loa ona i ai i le ekalesia, o e ua lelavava tutumau, ma o tagata fou liliu mai o e na muai lagonaina le olioli tele ae ua le o toe fafagaina o latou faatuatua.
Afai o lou tulaga lea, ou te fia fai atu: Afai sa moni le talalelei i le taimi na auina atu ai lau talosaga e avea ma se faifefautalai, (ma sa moni!), afai sa moni i le taimi na e ulu ai i le malumalu (ma sa moni!), afai sa moni i le taimi na e liliu ma papatiso ai po o le taimi na e faaliliuina ma papatisoina ai isi (ma sa moni!), afai sa moni i le taimi na sa e faamau ai (ma sa moni!), o lona uiga la, e faapena foi le tutusa o le moni i le taimi nei!
Sa faaali mai e Iesu e ala i faataitaiga, e mafai ona tatou maua le malosiaga mai tusitusiga paia. Na faaali mai e Iosefa Samita, o le ole atu i le tatalo o le a aumaia ai le toomaga. O i latou o e ua tuuina atu o latou soifua, ma le le masalosalo, ua latou faaalia, e tusa lava pe feagai ma le oti, o loo i ai lo tatou faamoemoe.
E le tatau ona tatou gauai atu i le atuatuvale, aua o tofotofoga ma faaosoosoga e mo se taimi le tumau. E mafai e i tatou uma ona maua le faamoemoe i le folafolaga a le Faaola: “Vaai mai ia te aʼu i mafaufauga uma; aua le masalosalo, aua le fefefe” (MF&F 6:36).