O Le Tusi Na Laveaiina Lo’u Ola
Faamatalaga mai le Faauta I o Outou Tamaiti, saunia e Robert Barrett
Sa auai lo matou aiga i le Ekalesia a o 12 ou tausaga. I lena taimi, sa ou le iloa le taua o lena meaalofa. Ou te lei iloa pe moni le Ekalesia, ae sa faagaeetia lo’u tama ma lo’u tina i le savali sa aumai e faifeautalai. Sa ou fiafia foi i faifeautalai ae ou te lei malamalama atoatoa i mea na latou fai mai ai. Na iu lava ina la valaauliaina i matou e papatisoina, ma sa filifili lo’u aiga o le a matou auai o se aiga po o le leai lava. Sa ou ioe i ai ma papatisoina ai e aunoa ma le liuaina.
Sa ou auai i le lotu ma le seminare, ae mulimuli ane, sa toe o ese ai lou aiga [mai le ekalesia]. Sa i ai au uo i le lotu ma ou alu ai i le seminare ma le Mutuale ia faatasi ai ma i latou. Ou te lei popole i le talalelei po o aoaoga, ma sa ou manatu sa faaiva tagata tele le lotu. Sa oo lo’u olaga i faafitauli ina ua amata ona ou auai i gaoioiga e pei o le gaoi i faleoloa ma le faaleagamea. Sa oo ina sauā loʼu tama, ma sa ou mafaufau e uiga i le pule i le ola.
Ae ui i lea, o le pule i le ola sa lei avea lava ma se filifiliga. Sa le mafai ona ou faia lena mea i lo’u tina, o lē sa ou alofa tele i ai. O lea sa ou aluese ai e su’e se tali. Sa ou autilo solo ma vaaia ai au uo mai le lotu. O le mea e tasi sa ia i latou sa lei i ai ia te au, o se molimau. O lea la i le 16 o ou tausaga, i le fa o tausaga talu ona ou papatiso, sa ou saofai ai i lalo e faitau le Tusi a Mamona mo le taimi muamua.
Sa faigata, ma sa toeitiiti alu le lua tausaga [o faitau]. Ao ou faitau i le 3 Nifae e uiga i le asiasiga a le Faaola ia Sa Nifae ina ua mavae Lona Toetu, lea sa Ia faamanuia ai a latou fanau, ma sa o ifo agelu mai le lagi ma siomia i latou, sa pei lava na ou tu ai faatasi ma Sa Nifae ma vaaia i ou lava mata lena mea faavavega na tupu. Sa molimau mai le Agaga Paia e uiga i lena taimi maoae.
Sa le mafai ona ou toe faitauina se isi mea, sa puaoa la’u vaai i loimata. Ina ua ou toe to’a malie, sa faaauau la’u faitau. Na mavae atu nai nisi vaiaso, ma sa ou faamaeaina le tusi, tootuli, ma tatalo e fiailoa pe ua moni. Ae ou te lei maua se tali.
Na mavae atu aso ma sa ou tootuli soo ma aioi atu ia iloa pe moni le tusi, pe moni le Ekalesia, ae sa ou le maua lava se tali. I le lotovaivai, ma i le mavae ai o vaiaso talu ona uma ona ou faitauina, sa ou toe tootuli tasi ai lava ma fesili atu, “Le Tama Faalelagi, pe moni ea le Tusi a Mamona?” O le tali na oo mai sa le o le mea lea sa ou mafaufauina: “Ua uma ona ou tauina atu ia te oe. O lena e te iloa e moni.”
Sa ou mauaina la’u molimau i vaiaso na muamua atu, a o ou faitau i le faamanuiaina o tamaiti e Keriso. Sa ou iloa o lenei Ekalesia, O Le Ekalesia a Iesu Keriso o le Au Paia o Aso e Gata Ai, o le malo o le Atua i le lalolagi, ua toefuataiina mai e se perofeta ma taitaiina e se perofeta, e pei o aso anamua.
E le o se faatele la le faapea atu, na laveai lo’u ola e le Tusi a Mamona, ae e sili atu ona sa’o le faapea atu, na laveai au e le talalelei toefuataiina ma faaauau pea ona faafou ma faafailele au i aso taitasi. O la’u meatotino aupito faapelepele lea.