Dua na Lesoni Totoka

Mai vei Elder Valeri V. Cordón

Ena Vitusagavulu

“Seu na dolava … na katuba ni lomalagi, ka sovaraka vei kemudou na ka ni veivakalougatataki” (Malakai 3:10).

Niu tubucake tiko mai Guatamala, e taukena noqu matavuvale e dua na vale ni cula isulu ni qito.

E vinakata o tamaqu me ra vulica na gone ena neitou vuvale me ra cakacaka vakaukauwa. Keitou vukei koya ena valeniculacula. Au dau curudruvi vakawasoma niu se gone kina. Esa dau vakaga meu sa dau vakacacana e levu na ka! Ia, niu sa qase mai, sa vakatara o tamaqu meu maroroya na na misini ni culacula.

E saumi keitou o tamaqu me baleta na cakacaka keitou cakava. Ka na qai taroga, “Na cava o na cakava ena nomu ilavo?” Au a kila na kena isau ka kaya: “Sauma na noqu ikatini ka maroi ilavo ni noqu kaulotu.”

Niu sa yabaki 13, e vakayalia na ilavo levu na neitou bisinisi. Esa yaco mai me keitou sa volitaka yani e levu sara na misini ni culacula. Sa sega ni rua na drau na tamata cakacaka, e sa lailai mai na lima. Era cakacaka ga ena neitou qarati e vale.

Au sa dau sauma tu ga na noqu ikatini, ia au sega ni kila vinaka na kena bibi. Ka qai yaco mai meu vulica e dua na lesoni talei. Au rogoci rau noqu itubutubu ni rau veivosaki lo tiko ena dua na mataka ni Vakarauwai. E tukuna o tamaqau vei tinaqu ni sa veirauti ga na ilavo me saumi ga na ikatini se voli kina na kakana. E sega ni veirauti me caka ruarua. Au lomaleqa. Na cava ena cakava o tamaqu?

Ena Sigatabu au raici tamaqu ni solia e dua na waqanivola kivua na peresitedi ni neitou tabana. E digitaka o koya me sauma nona ikatini! Au marautaka ni cakava vakakina, ia au lomaleqa talega. Na cava beka keitou na kania?

Ena mataka ka tarava, eso era a mai tukituki ena neitou katuba. Era mai tukuna vei tamaqu ni ra gadreva eso na isulu ni qito. O ira na tamata dau otataki sulu ni qito era dau qai sausaumi ni sa caka oti na ota. Ia, o ira oqo era saumi tamaqu ena siga oya, ni se bera madaga ni caka oti na isulu ni qito!

Ena dua na muanimacawa, au sa mai vulica e dua na lesoni totoka ka sa tu ga kei au ena noqu gauna kece ni bula. Na lawa ni katini e vukei keda meda tara cake na noda vakabauta ka vakaraitaka na noda vakavinavinaka vua na Tamada Vakalomalagi. Na saumi katini e dua na veivakalougatataki!