Yali qai Kune
Au kila ni dau sauma na nodra masu na Tamada Vakalomalagi. Ena gauna e vakaitikotiko kina na noqu matavuvale mai Jamani, keitou a gole ena dua na na taubale vakailawalawa ena neitou koro. Na taubale vakailawalawa e dua na gauna era lako vata mai nai lawalawa na veitokani kei na vuvale era mai marautaka na taubale vata ena loma ni veikau. Erau vakadonuya na noqu itubutubu meu taubale kei na dua noqu itokani ki liu, ka keirau sa liu sara yani ena sala oya.
Ni oti e vica na miniti au sa sega ni raica na noqu vuvale. Au tukuna vei noqu itokani niu sa na waraki ira toka ga na kena vo e gaunisala oya. Oti ga vakalailai au sa sega ni raici noqu itokani kei na nona matavuvale, ka rau sega ni se yaco mai na noqu itubutubu. Au sa tu duadua tu e loma ni veikau, kau sa rere sara vakalevu. Au nanuma meu sa na masu ni na kunei au e dua.
Ena dua na yasani veikau, e vakila o tamaqu ni tukuna vua na Yalo Tabu, “Me lako ka vaqai luvena tagane.” E vakila o koya na noqu gadrevi koya, sa ka vuki tale mai ka tukuna vei tinaqu ni sa mai vaqarai au. Ni oti ga e vica na miniti sa cici cake mai o tamaqu ena sala au wawa tu kina ka kunei au. Au sa marau vakalevu sara niu sa raici tamaqu! Ni sa tukuna vei au ni vakila sara e dua na veivakauqeti kaukauwa ni’u gadreva na veivuke, au kila saraga ni sa sauma na Tamada Vakalomalagi na noqu masu.
Au sa marau vakalevu niu kila, ni veitalia na vanua au tiko kina, au rawa ni vosa vei Tamada Vakalomalagi. Ena vukei au o Koya meu kunea noqu sala.