Salatu kina Marau Dina
Mai vei Elder Ulisses Soares
Ena Mataveiliutaki ni Vitusagavulu
Mai na dua na vosa e tukutuku, “Salatu kina Marau,” e soli e Brigham Young Univesiti–Hawaii ena June 8, 2017.
Meda sa qai digitaka meda lomana na Turaga ka muria na Nona salatu ni marau.
E levu cake tale mai na veika kecega, e gadreva na Tamada Vakalomalagi na noda marau dina ka tawayalani.
“Na noda marau e tuvanaki ena veivakalougatataki kece e solia vei keda o Koya—na ivakavuvuli ni kosipeli, ivunau, cakacaka vakalotu ni matabete, veimaliwai vakavuvale, parofita, valetabu, na totoka ni veibuli, vakakina na madigi me sotava kina na veivakatovolei. … E tala mai na Luvena e Duabau ga me vakayacora na Veisorovaki me rawa ni da marau ena bula oqo ka ciqoma na taucoko ni reki ena tawamudu.”1
Era vakasaqara tu na tamata ena veivanua e dua na ka. Ena nodra sala ga, na ka era vakasaqara dina tiko sai koya na marau. Sa vakakina na dina saraga vakaikoya, ia, e vuqa era sega ni vakila na marau “ni ra sa sega ni kila na vanua me ra vakasaqara kina” (V&V 123:12).
Baleta ni ra sega ni kila na vanua me ra kunea kina na marau dina ka tawayalani, era vakasaqara ena veika e laurai ni kauta mai na vakacegu vakayago walega—na voli ni yaya, vakasaqarai ni rokovi kei na vakacerecerei mai vuravura ena ivakarau sega ni veiganiti, se vakanamata tu ena rairai kei na serau totoka vakayago.
Na marau vakayago e dau vakaveilecayakitaka na marau dina. E kena irairai na levu ni tamata era vakasaqara na marau vakayago, na lailai ni marau era na rawata. E kena ivakarau, ni na gauna lekaleka ga na marau vakayago.
Me vaka e tukuna o Peresitedi David O. McKay (1873–1970): “O na rawata beka na veiveisau ni marau vakayago oqori, io, o na sega ni kunea na reki, o na sega ni kunea na marau. Na marau e kune ga ena sala dredre oya, e dina ni raba lailai, ia e dodonu, e veimuataki kina bula tawamudu.”2
Ka ni rarawa vei ira e vuqa, na marau e sega ni rawarawa me ra yacova. Era kila na sainitisi ni “levu cake mai na dua na ka e vakilai ena dua na gauna lekaleka na marau sai koya na ituvaki e umana e dua na bula vinaka—sai koya, e dua na yalo ni vakilai na veika e vakaibalebale vakalevu cake kei na titobu ni vakacegu e vakilai ni sa rawati na veika e bibi.”3
E vakaraitaka na vakadidike ni marau e sega ni vatuka ni kena veiladayaki na veika eda sotava tiko ena veigauna. Ia, na kena rawati na marau e dau okati kina na tokoni vakabalavu ni sasaga e levu cake, ni veika bibi ena bula. Na marau e laurai mai na itovo matau ni veisiga, na itovo tudei, kei na iwalewale ni vakasama ena rawa ni vakavotukanataki kei na cakacaka e nakiti. E levu na noda marau e “vakatau tikoga vei keda yadua.”4
Meda vakasamataka mada eso na ka bibi ena salatu ni marau e kune ena ivolanikalou ka ra vakavulica na parofita kei na iapositolo ni gauna oqo. Na teivaki dei ena yalodina na noda veikalawa ena salatu dodonu ena vakatarai keda meda marautaka na ilakolako sa tu e matada.
iValavala Dodonu
Na imatai ni veisalatu oqo ena bula savasava, ka iwalewale ni vakasama kei na itovo tudei e yavutaki mai na ivakatagedegede cecere ni bula savasava. E oka kina na bula savasava kei na bula vakasakiti, ka vakatarai iko mo curu yani kina valetabu ni Turaga. Na tamata yalo savasava era taukena e dua na kaukauwa levu e lomadra kei na itovo sa rakorako sara. Era tamata nuidei baleta ni ra bula kilikili tu me ra ciqoma ka dusimaki mai na Yalo Tabu. Na bula savasava e tekivu mai na lomada kei na vakasama, ka sa kumukumuni ni uludolu vakaudolu ni veidigidigi lalai era caka e veisiga.
“Mo qarauna me savasava tiko ga na nomu vakanananu; ia ena taucoko sara kina na nomu vakabauta ena mata ni Kalou; raica ena yaco vei iko na veivakalougatataki ni ilesilesi vakabete, me vaka na tegu sa lutu mai lagi.
“Ena sala vata voli ga kei iko na Yalo Tabu; ia na nomu itikotiko sa itikotiko ni yalododonu kei na dina sa tudei sara; raica na nomu lewa sa lewa e sega ni mudu; ia kevaka sa sega ni taurivaki vakatani sa na tudei tu ga me tawamudu” (V&V 121:45–46).
E vakatavulica o Peresitedi Thomas S. Monson (1927–2018) ni “veitokani e vakamareqeti duadua ena nomu vakasama ni matata tu, mai na nomu bula savasava—sa dua dina na ka e lagilagi meda kila ni o tu ena vanua o sa lesi kina, e savasava ka nuidei tu ni o sa bula kilikili.”5
Duridodonu ka tudei
Na ikarua ni salatu ni marau sai koya na duridodonu ka tudei tu. A vakatavulica o Elder Richard G. Scott (1928–2015) ena Kuoramu ni iApositolo Le Tinikarua:
“Mo vakila ni marau tawayalani e lako mai ena nomu ituvaki, ka sega ni mai ena veika e tiko vei iko.
“Na reki dina e lako mai ena itovo tudei, ka taraicake mai na vakarau ni veidigidigi dodonu ena veigauna kece. … Na nomu veidigidigi dodonu ena vakaraitaki iko kei na veika e bibi vei iko. Era cakava me rawarawa na noda cakava na veika dodonu. Me baleta na nomu marau ena gauna oqo kei na veigauna ena nomu bula, me tudei tiko nomu talairawarawa vua na Turaga.”6
Ni da vulica na ivolanikalou, eda kila kina ni veiyalayala e cakava na Turaga vei keda ena vakatau kina na noda talairawarawa ka vakauqeta na bula dodonu. Na yalayala oqori e vakabulabulataka na yaloda, ka kauta mai vei keda na inuinui meda vakayaloqaqataki meda kakua ni guce ena gauna mada ga ni noda sotava na bolebole ni veisiga ni da bula tiko ena dua na vuravura sa takali tiko kina na itovo dodonu kei na yavunibula savasava. Esa vakakina, e dodonu meda vakadeitaka na noda vakasama, vosa, kei na ivalavala e muataki keda tiko kina salatu lesu vua na Tamada Vakalomalagi.
Yalodina
Na ikatolu ni salatu ni marau sai koya na duridodonu ka tudei tu. E bibi sara meda kila vinaka ni vakalougatataki keda na Kalou ena noda vakabauta, ka e vurevure ni bula kei na inaki vakalou kei na rai e tawamudu. Na ivakavuvuli ni vakabauta e cakacakataki e vakauqeta na gumatua. Ena bula sa matanataki tiko ena noda vakasama dodonu kei na gagadre me sa lomada dina meda cakava na veika kecega e kerea na Kalou kei Jisu Karisito vei keda. Ena muataki keda meda tekiduru ka masuta na Turaga meda dusimaki ka tucake yani ka cakacakataka ena nuidei me rawati na veika sa vaka na Nona lewa.
Ni o toso tiko e liu ena nomu ilakolako, o na vakatovolei me laurai kevaka o na cakava na veika kecega e vakarota na Kalou (raica na Eparama 3:25). Oqo e tiki ni veika e sotavi ena bula oqo. Sa na gadrevi kina meda toso tikoga ki liu ni tudei tu noda vakabauti Karisito, ka liutaki tiko ena Yalo, ka vakararavi tiko vua na Kalou ni na vakarautaka na veika eda gadreva.
Nanuma tiko me na kua ni vakayavalati na nomu vakabauta—ena gauna sara madaga ni dredre levu. Ni o tudei tiko, na Turaga ena vakalevutaka na nomu rawa ni lamata cake mai na veibolebole ni bula. Eda sa qai rawa ni vakamalumalumutaka na lewa vakatani ka da na taracake na igu meda uabaleta yani, na veika mada ga e matanataka mai na veivakataotaki lelevu.
Yalosavasava
Na vakalou, e dua tale na salatu kina bula marau, ka semati voleka sara ki na uasivi vakayalo ka vakayago. Na vakalou e vakaraitaka na savasava ni lomada kei na inaki. Ena rawa vakacava meda cakacaka tiko ena veisiga meda vakani keda tiko vakayalo me rawa ni da vakatoroicaketaka na noda itovo tudei vakalou?
E sauma o Peresitedi Harold B. Lee (1899–1973): “Eda vakatoroicaketaki keda ga vakataki keda ena vakatovotovo. … Meda vakaukauwataka tiko ena veisiga na yaloda masu, ena cakavinaka e veisiga, kei na veiwasei kei ira na tani. Meda vakania na yaloda e veisiga ena wiliki na ivolanikalou, e na [lotu vakamatavuvuale], na tiko ena veisoqoni, na vakaivotavota ena sakaramede. …
“Na tamata yalododonu e sasaga tikoga me vinaka cake tiko ena nona kila ni gadreva tiko o koya me veivutuni e veisiga.”7
E dua tale na tikina bibi ni vakalou sa sema sara kei na vakayacori ka maroroi na veiyalayalati e valetabu. Kevaka eda sa yalodina, e rawa ni laveti keda yani ka sivia na veiyalayala ni noda kaukauwa ga kei na rai. Na veivakalougatataki yalataki ni kosipeli i Jisu Karisito e rawa ni noda ena noda yalodina kina cakacaka vakalotu kei na veiyalayalati eda cakava kei Tamada Vakalomalagi kei Jisu Karisito e valetabu. E tiki ni ivakarau ni bula “ena ivakarau ni marau” e oka kina na taraicake ni valetabu meda sokalou kina ka vakayacora na veiyalayalati kei na Turaga (raica na 2 Nifai 5:16, 27).
E bibi ena salatu oqo meda qarauna me vakatoroicaketaki tiko na bula vakayalo ka me bula savasava tikoga.
Talairawarawa
Na muri ni vakaro ni Kalou e semati ki na veisalatu tale eso. Ena gauna era sa veiwasei kina na Nifaiti kei na Lemanaiti, era sautu sara ni ra vakamurai na lewa, itutu, kei na ivakaro “kei na ivakaro ni Turaga ena veika kecega, me vaka na lawa i Mosese” (2 Nephi 5:10). Na iwalewale oqo e tiki bibi ni bula raraba “ena ivakarau ni marau.”
E vakatavulica o Peresitedi Monson ni: “Kila tu o Koya ni da sa vakamuria na ivunau eda na bula marau kina, ena vakaibalebale ka sega soti na lomaocaoca. Ena rawarawa na iwali ni bolebole, vakakina na sotavi ni noda leqa ka da na ciqoma na veivakalougatataki sa yalataka tu na [Kalou].”8 “Na kila ka eda vakasaqara, na kena isau eda sasagataka meda rawata, kei na kaukauwa eda gadreva nikua meda sotava kina na bolebole ni dua na vuravura dredre vakaidina ka vuki veisau tu ga, sa na rawa ni noda kevaka eda sa na talairawarawa ki na ivakaro ni Turaga.”9
Sa kerei keda na iVakabula:
“Kevaka dou sa lomani au, dou muria na noqu vunau. …
“Ko koya sa nanuma na noqu vunau ka talairawarawa kina, sai koya oqo sa lomani au; ia ko koya sa lomani au ena lomani koya ko Tamaqu, ia kau na lomani koya, ka vakatakilai au vua” (Joni 14:15, 21).
Sega ni nanumi koya ga kei na Loloma
Na salatu serau ni marau e dua e kune kina na sega ni nanumi koya vakataki koya kei na loloma—na loloma e veikauwaitaki, daunanamaki, kei na so tale na ivakarau ni loloma vakalou kina yalo e bula yadua. Na loloma sai koya na sala dodonu sara kina marau ka na vakasinaita ka vakalougatataka na noda bula kei na nodra o ira na tani. E kena ibalebale, me vaka e kaya na iVakabula, ni dodonu mo vakaraitaka na loloma vei ira sara madaga na nomu meca (raica na Maciu 5:44).
Ni o cakava vakakina, o sa vakayacora tiko na ivunau levu mo lomana na Kalou. O na sivia na cagi ca e liwa mai—na yaloca, na druka, kei na veika ca. Na marau dina ka tawamudu e lako mai ni o digitaka mo “lomani Jiova na nomu Kalou ena lomamu taucoko, kei na yalomu kecega, kei na nomu nanuma kecega” (Maciu 22:37; raica talega na Nai Vakarua 6:5; Marika 12:30; Luke 10:27).
Meda digitaka o keda yadua na loloma ni Turaga ka muria na Nona salatu kina marau, sai koya na “na inaki kei na ituvatuva ni noda tu eke.”10