E solia mai na Kalou na Nona loloma veivueti me vakamaravutaka na noqu leqa
Eso na gauna e sega ni rawarawa na kaulotu, ia sa ka yaga sara.
Niu sa lesu mai vale ena kaulotu, au sa mai duavata tale kei noqu matavuvale ni oti e 18 na vula na kaulotu. Ena noqu kaulotu, au a vakalougatataki vakalevu ni a volekati au tiko na Tamaqu Vakalomalagi.
Ena loma ni rua ni noqu lesi, au a lomaleqa, dina ga niu vosa tiko Vaka-Varanise. Au dau madualaka meu tarovi ira na tamata meu tukuni Jisu Karisito. A vukei au vakalevu o noqu imatai ni itokani ena nona ivakarau.
Sa dau tu ga vei au na iVola i Momani meu wasea kina na itukutuku totoka ni Vakalesuimai maivei Josefa Simici.
Dua na siga, au a vulica tiko e dua na ivola a solia mai na tabana ni kaulotu meu vulica kina na cakacaka ni kaulotu. Au raica kina e dua na taro baleta na iVola i Momani. E kaya, o sa sotava beka e dua na ka e baleta na iVola i Momani? E rawa beka mo wasea vei nomu itokani.”
Au a vakasamataka, “E sega ni dua na ka au a sotava.” Au sa mani masu vua na Tamaqu Vakalomalagi niu sa vuli lesoni oti, ka meu taroga ke sa dina na iVola i Momani (Moronai 10:4). Au a sega ni ciqoma e dua na isaunitaro ena gauna o ya. Au a taroga tale na Kalou ena taro vata ga o ya niu sa masu ka sa voleka sara meu soro.
Ena gauna oqo, keirau a vakavulica tiko e dua na dauvakatataro sa yabaki 30 mai oqo na nona sotavi ira tiko na daukaulotu. Keimami dau kerea na daukaulotu vua na Kalou me keimami kila na cava e leqa tiko, kei na sala me vukei o neimami dauvakatataro oqo me rawata e dua na ivakadinadina.
Sa mani lokuci na siga ni papitaiso ia na siga ni bera na nona papitaiso a qiriti keirau mai ka kaya ni sega ni via papitaiso. A mani dua na neirau lesoni kei koya ka keirau a sureta e dua na veiwatini daukaulotu me keitou mai veivakavulici vata. Sa neitou inaki me keitou kila na ka e tarova tiko na nona via muri Jisu Karisito.
Keitou a taroga e vuqa na ka baleta na iVola i Momani, ka keitou kila ni sega na nona ivakadinadina ni sa solia mai na Kalou e dua tale na ivola me vakadinadinataki Jisu Karisito.
Ena gauna ni lesoni, au a vakila e yaloqu ni kaya mai, “Au gadreva meu kerea vei nodatou dauvakatataro ke rawa me keitou na masu ka kerea ke sa dina na iVola i Momani.” Au a vinakata meu vagaluya na vakasama o ya baleta niu sega ni yaloqaqa meu cakava na ivakaro ni Kalou vei au.
A votu vei au na ivolanikalou ena Vunau kei na Veiyalayalati wase 9:8–9:
“Ia, raica, au sa kaya vei iko, sa dodonu mo vakasamataka vakavinaka ena nomu vakasama; oti e dodonu mo qai taroga vei au kevaka e sa dodonu, ia kevaka e sa dodonu, au na vakauqeta na yalomu ka na katakata mai na lomamu; o koya ko na qai vakila sara ni sa dodonu.
“Ia kevaka e sega tiko ni dodonu ko na sega ni vakila e dua na ka, ia ko na vakila na berabera ni nomu vakasama ka na vakavuna mo na guilecava na veika e cala; o koya, ena sega kina ni rawa ni o vola na veika e tabu vakavo ga ke soli vei iko mai vei au.”
Au sa vakila na lomaqu ni sa tekivu katakata sara mai vakalevu, au a voleka ni biuta na rumu meu laki gunu wai. Au sa qai kila ni a vukei au na yalo oqo meu yaloqaqa cake meu dolava na gusuqu ka kerei neirau dauvakatataro ke rawa ni keitou sa masu ena gauna o ya ka kerea vua na Kalou ke sa dina na iVola i Momani.
Niu bera ni masu, au sa kila tu ni sa dina na iVola i Momani baleta niu vakila na katakata ni lomaqu, me vaka e kaya na ivolanikalou: “ko na qai vakila sara ni sa dodonu”.
Ni sa yaco tiko na masu, au a tagi vakalevu baleta niu sa rarawa sara ni o neirau dauvakatataro a kaukauwa na yalona ka tarovi koya me vakila na Yalo. Ia, au a vakavinavinaka vakalevu baleta ni a sauma mai na Kalou na noqu vakatataro ni oti e dua na vula ni vakasamataki tiko na taro “e dua beka na ka au sa sotava baleta na iVola i Momani?” Sa qai dua na noqu ivakadinadina baleta na iVola i Momani.
Au sega ni kila na levu ni iVola i Momani au a veisoliyaka ena noqu gauna taucoko ni kaulotu, ia au kila ni ivola oqo e rawa ni veisautaka na noqu bula. A veisau na noqu bula, sega ni bera ni noqu laki kaulotu ia niu sa kaulotu tiko. Au sa kila na sala meu na cakacaka vata kina kei na Yalo me na sauma na nodra taro na tamata.
Au vakadinadinataka ni iVola i Momani sa vatuivakadei ni noda lotu. Au kila ni dau sauma na Kalou na noda vakatataro. Ena tiko beka ga na Nona ituvatuva ia ena dau sauma mai. Eso na gauna, eda nanuma ni yacovi keda na vakatovolei, sa baleta ni sega ni lomani keda na Kalou. Oqo e sega ni dina. Au kila ni Kalou e vakatara vei keda na veivakatovolei, sega ni baleta ni sega ni lomani keda, ia e baleta ga ni gadreva me vakasavasavataki keda vaka na daimani baleta ni da sa rui ka bibi Vua. E vinakata o Koya me da yaloqaqa, vuku, yalodina ka tuvaki kaukauwa tu meda valuta rawa na veitemaki i Setani.
Au kila ni da sa itaukei ena Lotu i Jisu Karisito ka sega ni lotu ni dua na tamata. Na Kalou e Kalou ni cakamana. Au sa sureti keda vakayadua meda dau masu vakawasoma vua na Tamada Vakalomalagi ka taroga ke sa dina na iVola i Momani. Dina ga ke o sa kila oti tu ni dina, me vaka a kaya o Peresitedi Henry B. Eyring, “Au a taroga na Kalou ke sa dina na iVola i Momani, sega ni baleta ni sega na noqu ivakadinadina, ia sa baleta niu vinakata meu vakila na yalo vata ga e dau vukei au ena veigauna meu vakila na loloma ni Kalou”.
Na iVola i Momani sa ivakadinadina ni loloma ni Kalou vei ira na luvena.
A laki kaulotu o Amandine Liard ena Tabana ni Kaulotu na France Paris mai na Maji 2016–Okosita 2017. E lewena tiko o koya na Tabanalevu Toahotu, e Tahiti.