Oqo na Vanua

Simeon Nnah

Aba, Nigeria

Droini mai vei Allen Garns

Na tamaqu, e dua yalodina ka lotu Vakarisito, e vakavulici au meu vakabauti Jisu Karisito. E vukei au na vakabauta oya me bula tiko ena ivalu yabaki tolu mai Nigeria ena mua ni yabaki 1960 ni se lewe ni mataivalu. E muri au sa mai, veilecayaki kau sa sega ni lako ki lotu.

Niu a gole mai ki Amerika ena 1981 meu mai vuli, au vakila niu gadreva na Kalou ena noqu bula. E rua na yabaki na noqu goleva tu na veimatalotu duidui e Boston, Massachussetts, ka sega ni dua vei ira e vakauqeti au. Au sega ni vakila na Yalo, ka sa tu vakadua noqu vaqaqara.

E sega ni dede nona mai tomani au na watiqu, o Mabel ni gole mai Nigeria ena 1984, sa tekivu tale me rara mai na yaloqu ena gagadre meu toro voleka vua na Kalou ka lewena e dua na lotu. E dua na itokani e veisiko tiko mai Nigeria ka sega ni kila tu niu vakasaqara tiko e dua na lotu, ka tukuna vei au me baleta e dua na lotu e rogoca tiko ka tiko kina e dua na ivola ka vakatokai me iVola i Momani.

Ni oti oya, au sa tekivu meu vakasaqara na veilotu. Au kunea e dua na lotu ka vakatokai na Lotu i Jisu Karisito ni Yalododonu Edaidai. Na vosa na yalododonu e toboki au. Au sega ni kila ni tiko e dua na lotu era vakatokai na lewena me ra yalododonu. Na Sigatabu oya au sa nanuma meu vakaraica tu mada.

Ena soqoni au tiko kina, era lagata na ivavakoso na serenilotu ena vakarokoroko, era masulaka na madrai kei na wai o ira na bete, ka liutaki na soqoni ena ivakarau e matau ka malua. Ni oti oya, niu sa vakasamataka tiko na soqoni kau taubale yani ki tuba, au rogoca na yacaqu.

“Simeon,” e kaya mai na Yalo, “oqo na vanua.”

Ena gauna oya, e rau gole mai vei au e rua na daukaulotu. Erau vakamacalataki rau kei na iVola i Momani. Au vakaraici rau kau kaya, “Au sega ni kila e dua na ka me baleta na Vola i Momani, ia au kila na iVola Tabu. Au sa vakarau tu.”

Sa tekivu me rau vakavulici au na yavu ni veivakabulai. E se bera madaga ni dua na vula, au sa papitaiso. A lewe na mai na Lotu o watiqu ni oti vakalailai oya. Ni oti vakalailai ga oya, keirau sa vauci ena Valetabu e Washington D.C. Kei iratou na luvei keirau e lima.

Ena valetabu, esa vakatakilai vei au e levu na ka, ia na vosa au rogoca ena imatai ni siga e valenilotu esa vakadeitaki vakavica vata na gauna vei au mai na ivakatakila e valetabu: “Oqo na vanua.” Na revurevu ni tukutuk oqori mai na Yalo Tabu esa veisautaka vakadua na noqu bula kei na nodratou bula na watiqu kei na luvequ.