Na Cava, na Cava na Vuna, ka na qai Caka vakacava: Na Vakamatailalai ni Veivakalesui mai
Mo vakavulica na kosipeli, e dodonu mo rawa ni vakamacalataka na vuki tani, veitabagauna, kei na Veivakalesui mai. Ena rawa ni vukei iko na ituvatuva oqo.
Kaya mada ni o gadi tu kina baravi kei na nomu vuvale nei nomu itokani me dua na macawa. O sa marautaka dina, ia sa tekivu mo sa teilasa ki na nomu vuvale. Ka qai vakauta yani o tamamu e dua na itukutuku ena talevoni me raica o sa vakacava tiko—sai koya saraga oqo na ka o gadreva mo vakila kina na loloma ka o ni nanumi talega.
E via vakatoka oya na bula ena vuravura oqo. E sega ni dau vakauta mai na itukutuku ena talevoni na Tamada Vakalomalagi, ia eda sega ni tiko ena noda itikotiko vakalomalagi, e dua na sala e dau veitaratarataka mai vei keda na Nona loloma na Tamada Vakalomalagi sai koya nona talai ira mai na parofita.
Tabagauna
iTaba mai vei Ben Simonsen
Era liutaka na parofita na veika e vakatokai me veitabagauna, na veiwasewase ni gauna ni (1) Tiko kina e vuravura e dua na nona iliuliu vakamatabete sa lesi ka (2) vulica na iliuliu oqo, e dua na parofita na ituvatuva ni veivakabulai mai vua saraga na Kalou. E qai vakavulica na parofita, se veiwaseyaka, yani na kosipeli vei ira na tamata.
Eda vakavinavinaka kina ivolanikalou, eda kila e levu na ka me baleta na veitabagauna. Eso na kena e bibi sai koya na gauna i Atama, Inoke, Noa, Eparama, Mosese, Jisu Karisito, kei Josefa Simici. E tekivuna na veitabagauna oqo na Turaga mai vei ira na parofita oqori.
Vukitani
Vukitani=ivalavala ca. Ni vuki tani e dua na tamata se ilawalawa mai na dina ni kosipeli i Jisu Karisito, cakitaka na parofita, ka lutu ena ivalavala ca, era sa vukitani.
E Tekivu Vakacava na Vukitani
E kaciva na Kalou e dua na parofita, e vakavulica na kosipeli dina i Jisu Karisito.
O ira na tamata era muria na nona ivakavuvuli na parofita era na vakalougatataki.
Eso na tamata era qaciqacia ka cakitaka na parofita.
E dau kauti ira tani mai Nona parofita na Turaga nira sega ni ciqoma na ivakavuvuli ni kosipeli na tamata.
Ni sa donu na gauna, ena kaciva na Kalou e dua na parofita me vakalesuya mai na dina, na matabete, kei na Lotu.
Veivakalesui Mai
Na veivakalesui mai sai koya na kena vakasukai e dua na ka ki na kena ituvaki taumada. E sega ni dua na veiveisau, me veisautaki e dua na ka e sa tiko rawa ki na dua na ka vou. Me ivakaraitaki, kevaka o via vakalesuya e dua na vale makawa, o na tara tale ena kena idavodavo ga ka a tauyavu taumada kina . O na vinakata beka me dua na kena i rara ni buka vou, ia o sa na veisautaka tiko na vale, sega ni vakalesuya.
Na kosipeli i Jisu Karisito e a gadrevi me vakalesui mai baleta ni a yali tu ena gauna ni Vukitani Levu. Era bula tu ena drau vakacaca na yabaki na tamata ka sega tu na Lotu dina. Sa qai vakalesuya mai na Turaga na Nona Lotu kei na kosipeli mai vei Josefa Simici, me vaka ga era parofisaitaka na parofita ena gauna makawa (raica na Aisea 2:1–3; 29:13–14; Cakacaka 3:19–21; Na iVakatakila 14:6–7; 2 Nifai 3:3–15).
Na kosipeli dina i Jisu Karisito e sa tiko qo ka na sega tale ni yali—o na tiko vata kaya? E dina ga ni sa tubu tikoga na ivalavala ca e vuravura, ena tikoga me yacova na ivakataotioti na Lotu i Jisu Karisito.
Esa tiko na digidigi mo cakava—na digidigi vataga era sotava mai o ira na bula mai na ivakatekivu ni gauna: o na vakamuria beka na parofita? Kevaka o sa cakava vakakina, o na kalougata ka na tikoga kei iko na Yalo.
Atama
E a painia dina o Atama: e matai ni tamata e vuravura ka matai ni parofita! E vakavulica na nona matavuvale na kosipeli, ia, ena ivakatekivu e vuqa era “sa muria ga na lomadra butobuto” ka cakitaka na dina (Mosese 6:28).
Inoke
O sa bau rogoca e dua na koro taucoko ni kau cake ki lomalagi? Io, na koro ko Saioni—ka tauyavutaka o Inoke—era sa valavala dodonu ka sa kauti ira cake na Kalou me bula vata kei Koya (raica na Mosese 7:23).
Noa
O kila me baleta na nona waqa o Noa. Era le walu ga na tamata—na vuvale nei Noa—era bula mai na waluvu baleta nira vakarorogo kina ivakaro nei Noa (raica na iVakatekivu 7; Mosese 8). Ia, o kila ni a ciqoma o koya na matabete ni se qai yabaki 10 (raica na V&V 107:52) ka “eso na tuwawa … era sa vakasaqarai Noa me ra kauta laivi na nona bula”? (Mosese 8:18).
Eparaama
E voleka ni vakacabori o Eparama me nodra isoro eso na bete ivalavala ca, ia ka sa vakabulai koya e dua na agilosi (raica na Eparama 1). Eso dina na ivakatakila totoka e vakaraitaki vua, e oka kina na ivakatakila ni bula taumada. Era lewe ni nona kawa na lewe ni Lotu, ka vakatoka yacataki vua na Veiyalayalati Vaka-Eparama. (Raica na Eparaama 2–5.)
Mosese
E liutaki ira na Isireli mai Ijipita o Mosese ka qai vukei ira me ra rawata na galala. E “segata kina vagumatua me vakatabui ira na nona tamata me rawa kina ni ra raica na mata ni Kalou; ia era sa vakaukauwataka ga na lomadra ka sega ni tiko rawa ena nona iserau” (V&V 84:23–24). E dina sara, baleta na nodra vukitani, era veilakoyaki tu ena lekutu ka rauta e 40 na yabaki!
Jisu Karisito
E sega walega ni vakavulica o Jisu Karisito na kosipeli kei na cakacaka mana, ia e tauyavutaka talega o Koya na Nona Lotu e vuravura. E sorovaka na noda ivalavala ca ka vakoti e kauveilatai ka tucake tale me rawa vei keda meda lako curuma rawa na mate vakayalo kei na vakayago talega. E liuliu ni Nona Lotu nikua, ka ivurevure ni lewa matabete o Koya kei Tamada Vakalomalagi.
Na Vuki Tani Levu
Ni oti na Nona Tucake tale na iVakabula, era saga me ra vakateteya na Nona iApositolo kei ira tale eso nai liuliu ni Lotu na kosipeli, ia era cakitaka na nodra ivakavuvuli na tamata ka vakamatea talega eso na iApositolo. Baleta na nodra ivalavala ca na tamata, e sa yali mai vuravura na taucoko ni kosipeli. E lutu kina na butobuto vakayalo na vuravura (raica na Aisea 60:2).
-
Ni sivia mai na 1,000 na yabaki, era sega ni vakaivotavota na tamata ena cakacaka vakalotu ni veivakabulai, na veivakalougatataki ni valetabu, se na veidusimaki ni parofita.
-
Era yali mai na iVola Tabu na dina vakamareqeti.
-
Na veivakasama lasu era vakatavulici me baleta na ituvaki dina ni Kalou.
-
Eso na cakacaka vakalotu ni veivakabulai era veisautaki se vakavulici cala tu (raica na Aisea 24:5).
-
Na vukitani oqo e qai vakavuna na tauyavutaki e levu na matalotu.
Na Veisau
Ena gauna ni Vuki tani Levu, e levu na tamata vakasama-vakalotu e Urope era vakila mai ni sega ni vakatavulici donu tu na kosipeli i Jisu Karisito. Era sega ni parofita o ira na dauveisau oqo, ia era saga na nodra igu me ra vakavulica na dina era kila vinaka tu. Era veivuke na kena vakarautaki na iVola Tabu me soli yani vei ira e levu cake na tamata. E vuqa era valataka na galala vakalotu ka dolava na sala me Vakalesui mai na kosipeli.
Josefa Simici
E yali beka vakataucoko na taucoko ni kosipeli? Sega! E vakatakila tale mai na dina bibi vei Josefa Simici. Era vakalesuya mai na dauniitukutuku vakalomalagi na idola kece vakamatabete e veiganiti, vua (raica na V&V 27:8–13; 110; 128:18–21), ka yaco oqo me “itabagauna ni taucoko ni gauna” (V&V 138:48). Esa kilai ni gauna edaidai baleta ni sai otioti ni tabagauna ni se bera na Karua ni Lako mai o Jisu Karisito.
Na Veivakalesuimai
Kila na cava? Esa NOMU na veivakalougatataki ni Veivakalesui mai. Io, o iko!
-
E vakalesui mai Na Lotu i Jisu Karisito ni Yalododonu Edaidai kei na parofita kei ira na iapositolo me ra liutaka.
-
Na iVola i Momani, Vunau kei na Veiyalayalati, Mataniciva Talei, kei na ivakatakila tale eso era vakalesuya mai na dina vakamareqeti era sa yali tu (raica na 2 Nifai 27).
-
E ciqoma o Josefa Simici na Matabete i Eroni mai vei Joni na Dauveipapitaisotaki (raica na V&V 13) kei na Matabete i Melekiseteki mai vei iratou na iApositolo o Pita, Jemesa kei Joni (raica na V&V 128:20).
-
Era vakayacora vakavinaka na lesi tu vakamatabete na cakacaka vakalotu ni veivakabulai.
-
Eda kila ni na sega tale ni yali na dina ena vuki tani (raica na Taniela 2:44).