Meu na Vakabulabulataka Vakacava na Noqu Vulica na iVolanikalou?

Sarah Keenan

Utah, USA

Droini mai vei Bradley Clark

Au sa qai lesu mai ena noqu kaulotu ki vale ka rauta tiko e vula tolu, ni sa tekivu meu kunea na dredre ena kena wiliki nai volanikalou.

Au dau wilika na ivolanikalou ena veisiga ni noqu kaulotu kau yalataka meu na wilika tikoga niu lesu ki vale. Ia, ni sa toso tiko na gauna, sa levu na ka e vakaosooso mai. Sa dau levu na noqu cakacaka ni vuli e vale, se sa rui dau osooso na cakacaka, se au sa rui oca saraga. Ena veiulubale kecega, sa mai malumalumu na noqu wili ivolanikalou me yacova saraga ni sa tutu yadua sara na gauna au wilika kina.

Au dolava na Vola i Momani ena dua na bogi kau nakita meu wilika ga e dua na tikina. Au vakananuma vei au na tikina au wilika ni volanikalou e “vosa talei ni Kalou, io, na vosa sa vakamamacataka na yalo sa mavoa” (Jekope 2:8).

Au vakasamataka vakatitobu kau qai vakila na veivakayarayarataki ca e sa kauta mai vei au na kena vakaweleweletaki na vulici ni volanikalou. Au vakila niu lomaocaoca vakalevu e koronivuli, vakawelewele e valenilotu, ka qai yawa sara mai vua na Kalou. E gadreva na yaloqu na vosa veivakabulai ni Kalou e kune ena ivolanikalou. Au kila ni gadrevi meu na tuva tale vakavinaka na veika meu vakaliuca.

Au gole yani vei ira noqu itokani, matavuvale kei na liuliu ni Lotu me tarogi ira na vakatutu eso me rawa ni vakabulabulataki na noqu vulica na ivolanikalou. Au kunea ni veivuke vakalevu e tolu na ka.

Na imatai, au kila mai ni vulici ni volanikalou ena bogi e sega ni veidonui kei au. Na vuli-ka ena mataka e vakatara vei au meu vakasamataka tu vakatitobu ena loma ni siga na ivunau kei na ivakavuvuli au wilika ena mataka.

iKarua, eda sa vakavulici meda wili ivolanikalou kei na noda vuvale, ia, me vaka niu vuli tiko e koliji kau sega ni tiko kei na noqu vuvale, sa tekivu meu wili ivolanikalou kei na noqu lewe ni rumu kei na itokani. E vukei au na veika oqo meu dau qaqarauni, ka vakavuna sara mai e levu na veitalanoa vakosipeli totoka.

iKatolu, sa tekivu meu vola na veivakauqeti kei na vakanananu au ciqoma ena gauna ni vuli volanikalou. E vukei au na veika oqo meu vakanamata vakatabakidua kina veika au wilika tiko ka vukei au meu kila vinaka cake na domo ni Yalo.

Ni sa yaco tale me sa dua na ka e vakaliuci ena noqu bula, au raica ni sa levu na gauna kei na igu meu rawata kina na veika e gadrevi meu cakava. Sa bibi ga, niu sa vakila e dua na veivolekati vua na Kalou ena noqu wilika ka vakasamataka vakatitobu na ivolanikalou. Ena gauna oqo niu sa taura na gauna meu vulica na ivolanikalou, au vakila na vakacegu ka kunea ni vakabulai na yaloqu.