“Lade yani ki Uciwai!”

Elvin Jerome Laceda

Pampanga, Philippines

Droini mai vei Gary Alfonso

Dua na siga e kerei au o noqu bubu meu kauta eso na kakana e a vakarautaka o koya vei noqu nei. E a dua na yakavi katakata ni Vakarauwai, ka sa levu sara na ka e tu au via cakava ka sega ni dua vei ira na talai tiko mai vei noqu bu. Au tukuna vua me tala e dua na tavalequ, ka cikevaka tiko ga o koya meu lako ga o au.

Sa oti e dua na auwa, ka sa tekivu meu vakila ni dodonu meu vakayacora na nona kerekere o noqu bubu. Au taura mai na kakana au sa taubale yani kina vale nei noqu nei. Esa yawa sara, niu sa yaco yani ekea, au sega ni namaka meu tiko vakabalavu.

Au raica ni rau davo tu ena dua na ililili e vesu tu na muana ki na rua na vunimaqo lalai o noqu nei kei luvena vula lima. Na rua na vunikau oqo e rau toka volekata tiko e dua na uciwai ka drodro voleka toka e dakuni vale. Au taubale yani vei rau meu solia vei rau na kakana. Vakasauri, sa cavuka na dali ka vesu toka kina na idavodavo lili. E rau qiqi yani kina uciwai o noqu nei kei luvena lailai. E kukuvi au na rere. Au sega ni kila na qalo, ka e sega ni tiko e dua me veivuke. Au sega ni kila na ka meu cakava.

Au rogoca totolo sara, na domo ni Yalo ni sa tukuna vei au meu: “Lade yani ki loma!”

Au sega tale ni vakasama vakarua, au sa lade ga. Sa kalougata sara, niu kunea na gone ena loma ga ni vica na sekodi, ka sa rawa vei noqu nei me cabe mai e wai. Niu cabe mai kei na gone lailai, au sega ni vakabauta na veika e sa qai yaco. Au lade yani kina uciwai niu sega ni kila na qalo, ia, baleta ga niu vakarogoca na Yalo, keirau vakabulai kei tavalequ lailai mai na luvu.

Au vakila kina na bibi ni noda rawa ni kila ka rogoca na veidusimaki kei na veivakauqeti ni Kalou vei keda mai vua na Yalo Tabu. Au vakavinavinaka ni yaco meu rogoca na veika e kerea noqu bubu kau kauta na kakana ki na vale nei noqu nei. Au kila ni dodonu meda gumatua kina sasaga meda rogoca tiko na veivakauqeti vakayalo me rawa ni da liga ni veivuke vei ira na Luvena na Kalou.