Ko e Faleʻi Naʻe ʻIkai Ke u Fie Fanongo Ki Aí

ʻIkai tukumai e hingoá

Taulanga ʻAlekelé, Palāsila

ʻI he taimi ne u fakakaukau ai mo hoku husepānití ke kamata haʻama pisinisí, naʻe faingataʻa ʻa e ʻuluaki taʻu ʻe tolú. Naʻe ʻikai ke ma lava ʻo maʻu ha tupu pea lahi mo e moʻuá. Naʻá ma ngāue mālohi, ka naʻe hanga ʻe he ngaahi palopalemá ʻo ngaohi e taimi ko iá ko e faingataʻa taha ia heʻema moʻuí.

Ne toe kovi ange ʻi he mālōlō ʻeku faʻē-ʻi-he-fonó ʻi he ʻaho, hili pē ʻa e Kilisimasí, pea ʻosi pē ha uike mei ai, ʻi he Fakaʻosi Taʻú, naʻá ku puke lahi. ʻI he taimi ko iá, ne ʻosi ʻema paʻangá, ʻosi mole ʻema kaá, pea ko e kovi tahá, ne mole mo ʻema maluʻi moʻuí.

Ne fāifai pea ʻilo naʻá ku puke ʻi ha faʻahinga kanisā, ko hono taʻu ʻaki ʻeni ʻe nima. Naʻe fuʻu lahi pea naʻe fie maʻu ke tafa fakavavevave. Ne siʻi e taimí, pea naʻe ʻikai haʻama paʻanga ki he faitoʻo totongi mamafa ne u fie maʻú.

Naʻá ku talanoa mo hoku husepānití mo e pīsopé ʻo kole ha tokoni. Ne ma fakamatalaʻi ange ko ha tūkunga fuʻu fakatuʻutāmaki ʻeni. Naʻe hohaʻa ʻa e pīsopé, ka naʻá ne talamai naʻá ne ongoʻi ke kiʻi tatali ʻo fuofuoloasiʻi kimuʻa pea fai e tokoní ke sio naʻa toe maʻu ha founga ʻe taha maʻa kimaua. Naʻá ne fakapapauʻi mai kapau naʻe feʻunga ʻema tuí, ʻe tofa ‘e he ʻEikí ha hala ke u maʻu e tokoni naʻá ku fie maʻú.

ʻI he kamataʻangá, naʻá ku ʻita mo loto-mamahi ʻi he tali ʻa e pīisopé. Ne u ongoʻi kuó ne siʻaki au mo e ʻEikí. Ka naʻe ʻi ai haʻaku fakamoʻoni ki he ongoongoleleí, pea ne u tui ne uiuiʻi ʻema pīsopé ʻe he ʻOtuá. Neongo ʻeku loto mamahí, ka ne u lotua ʻa e Tamai Hēvaní ke Ne tokoniʻi au ke u ʻofa, fakaʻapaʻapaʻi mo poupouʻi ʻeku pīsopé. Ko e taimi ne u lotua ai ʻení, naʻe fakafiemālieʻi au peá u ongoʻi ʻe tokoniʻi au ʻe he ʻEikí ʻi ha founga ʻe taha.

Ne u hoko atu ʻi he tui mo hoku husepānití, peá u maʻu e ngaahi sivi fakafaitoʻo ne fie maʻú mo fakataimi-tēpileʻi hoku tafá, neongo e siʻi ʻema paʻangá. ʻI he ʻaho kimuʻa ʻi hoku tafá, ne ma fakatau atu ʻema pisinisí ʻaki ha mahuʻinga lelei, ʻo lava ai ke ma totongi kotoa hoku ngaahi moʻua fakafaitoʻó.

Kuo mahino ʻeni e ʻuhinga naʻe momou ai ʻeku pīsopé ke tokoní. Naʻá ne ngāue ʻi he ueʻi ʻa e laumālié kae lava ke u maʻu ha aʻusia fakalaumālie mahuʻinga. Ne akoʻi au ʻe he aʻusia ko iá ke u falala ki he Fakamoʻuí, pea naʻa mo e taimi ʻoku ngali fakakina mo fakailifia e halá. ʻOku ou fakamālō koeʻuhí ko e faleʻi naʻe ʻikai ke u fie fanongo ki ai mei heʻeku pīsopé. ʻOku ou ʻiloʻi he taimí ni ko e ʻOtuá ko ha ʻOtua ʻo e ngaahi mana pea ʻoku ʻikai ke Ne siʻaki kitautolu.