ʻI he Taimi Naʻe Faingataʻa Ai ʻa e Ngāué
ʻOku nofo ʻa e taha naʻá ne faʻú ʻi Sanitiako, ʻOtu Filipainí.
ʻE lava fēfē ke u tokangaʻi ha taha ʻoku ʻulungaanga faingataʻá?
Tā fakatātā ʻe Chris Thornock
Ko e taha ʻo e ngaahi meʻa faingataʻa taha kuó u ikunaʻí ko ʻeku fakakaukau “ʻOku ʻikai ke u tokanga Aú.” Kapau naʻe ʻikai ke u māfana ki ha meʻa naʻá ku fai, naʻá ku ʻiteʻita mo taʻe-makātakiʻi ʻa e kakaí.
Ne liliu kotoa ʻeni ʻi ha mālōlō fakaako ʻe taha ʻi he taimi ne kole mai ai ke u tokangaʻi ʻeku kui tangata taʻu 76. Ko “Tatí,” ʻo hangē ko ia ne mau ui ʻakí, ne pā kalava, pea ne mamatea fakakonga ai hono sinó. ʻI he taimi ne kole mai ai hoku fāmilí ke u tauhi ia ʻi ha māhina ʻe uá, naʻe ʻikai ke u lava ʻo ʻiloʻi pe te u fēfēʻi!
Naʻe pau ke u ʻā pongipongia ke teuteu ʻene meʻatokoni pongipongí, mo hono kaukaú, pea mo ʻene faitoʻó. Ne u tokoniʻi ia ke lue takai holo he ko ʻene fakamālohisino fakaʻahó ia. Koeʻuhí naʻe faingataʻa ke ngaue, naʻá ku ʻi hono tafaʻakí maʻu pē, ʻo aʻu pē ki heʻene kaukaú mo ʻene fakaʻaongaʻi e falemālōloó. Ko e konga faingataʻa tahá ʻa ʻeku hoko ko ha kiʻi taʻahine kei taʻu 18.
Makehe mei he ngaahi meʻá ni kotoa, naʻe ʻulungaanga faingataʻa. ʻOku ʻikai ko ha mēmipa ia ʻo e Siasí pea kehe mo ʻene ngaahi tefitoʻi moʻoní meiate au. Ko ha tangata ne fonu fakaʻiseʻisa—ʻo kaikaila maʻu pē, ʻikai malimali, mo pehē maʻu pē, “Te u mate!” Koeʻuhí ko e faʻahinga fakakaukau ko ʻení, naʻe faingataʻa ke ma vālelei.
ʻI he kamataʻangá, naʻá ku fai e meʻa kotoa naʻa ku lavá ke kalo mei hoku ngaahi fatongiá, ka naʻe ʻikai ke ola lelei. Ko ia ai ne u fakakaukau ke liliu ʻeku fakakaukaú pea fai ʻeku lelei tahá.
Hili ha uike ʻe taha ʻo e fakakaukau foʻou ko ʻení, ne fakafiefia kiate au hono tauhi ʻo Tatí. Ne tupulaki ʻeku faʻa kātakí, pea kamata ke mahino kiate au hono faingataʻaʻiá. ʻI heʻeku tauhi iá, naʻe tuku ʻeku fakakaukau ko ha kavenga iá kau pehē ko ha faingamālie ʻeni ke u maʻu ai ha taimi lelei mo ia.
Naʻe liliu foki mo Tati. Naʻe hoko ʻa e tangataʻeiki fakafulofula ko ʻení ko ha kui tangata fofonga malimali mo angavaivai. Naʻe aʻu ʻo saiʻia ke fanongo ki he ngaahi hiva ʻa e Especially for Youth!
‘I ha pō ʻe taha naʻá ku fanongo atu ʻoku pātatō holo, ko ia ne u fakasiosio atu ki hono lokí pe ko e hā e meʻa naʻá ne faí. Naʻá ne lotu pea ko e fuofua taimí ia. ʻOku ueʻi au he ʻaho kotoa pē ʻe he liliu ko ʻení.
Kuó u foki he taimí ni ki he kolisí, ka te u ʻalu tuʻo ua he māhina ke ʻaʻahi kia Tati mo hoku fāmilí. ʻOku mau kai fakataha mo ia mo hiva ki ai. Kuo fakaʻau ke kovi ange e tuʻunga ʻo ʻene moʻui leleí, ko ia, ʻi he taimi ní, ko e tokoni lelei taha te u lava ʻo faí ko e fai pē ha ngaahi lotu maʻana.
ʻOku ou houngaʻia he faingamālie ke tokangaʻi ʻa Tatí koeʻuhí he naʻá ne tokoniʻi au ke u ʻiloʻi e meʻa te u malava ʻo faí. Ko e ʻofá ko ha meʻa mālohi fau—naʻá ne fakamolū fakatouʻosi hoku lotó mo ia ʻo Tatí. Kuó u ako ʻa e ʻuhinga ʻo e feilaulaú mo e angaʻofá. Ko hono moʻoní, ʻoku fakamaamaʻi ʻe he manavaʻofá ʻa e loto kotoa pē!