Tefitoʻi Moʻoni ʻo e Ngāue Fakaetauhí
Ala Atu ʻo Tokoni ʻi he Manavaʻofa
ʻI hoʻo muimui ki he sīpinga manavaʻofa ʻa e Fakamoʻuí, te ke ʻilo ai ʻokú ke lava ʻo fai ha fakalakalaka ki he moʻui ʻa e niʻihi kehé.
Your Faith Has Made You Whole, tā ʻe Jorge Cocco
Ko e manavaʻofá ko hono ʻiloʻi ia e mafasia ʻa e niʻihi kehé mo ke maʻu ha holi ke fakamaʻamaʻa pe fakafiemālieʻi iá. Ko ha fuakava ke muimui ki he Fakamoʻuí, ko ha fuakava ia ʻo e manavaʻofá ke “fefuaʻaki ʻa hoʻomou ngaahi kavengá” (Mosaia 18:8). Ko ha tufakanga ke tokangaʻi e niʻihi kehé, ko ha faingamālie ia ke ngāue fakaetauhi ʻo hangē ko ia ne mei fai ʻe he ʻEikí: ʻo manavaʻofa … pea hoko ko [ha faikehekehe] (Sute 1:22). Naʻe fekau mai ʻe he ʻEikí, “Feʻofaʻaki mo manavaʻofa ʻa e tangata takitaha ki hono kāingá” (Sākalaia 7:9).
Ko e Manavaʻofa ʻa e Fakamoʻuí
Ko e manavaʻofá ko ha mālohi ia ʻokú ne teke e ngāue fakaetauhi ʻa e Fakamoʻuí (vakai ki he fakamatala he tafaʻakí: “Ko ha Fakamoʻui Manavaʻofa”). Naʻe tupu mei heʻene manavaʻofa ki Hono kāingá, ʻa e tā tuʻo lahi ʻene ala atu ʻo tokoni ki he niʻihi ne nau feohí. Naʻá Ne ʻafioʻi e ngaahi fie maʻu mo e holi ʻa e kakaí, pea naʻá Ne lava ʻo tāpuekina mo akoʻi kinautolu ʻi he ngaahi founga ne mahuʻinga taha kiate kinautolú. Naʻe ikuʻanga e holi ʻa e Fakamoʻuí ke hiki hake kitautolu mei hotau mafasiá, ʻa e ngāue fisifisimuʻa ko ia ʻo e manavaʻofá: ko ʻEne Fakalelei maʻá e ngaahi angahala mo mamahi ʻa e faʻahinga ʻo e tangatá.
Ko ʻene malava ko ia ʻo feau e ngaahi fie maʻu ʻa e kakaí, ko ha meʻa ia ʻe lava ke tau faifeinga ki ai. ʻI heʻetau moʻui anga māʻoniʻoni mo fakafanongo ki he ngaahi ueʻi ʻa e Laumālié, ʻe fakalotoa ai kitautolu ke tau ala atu ʻo tokoni ʻi ha founga ʻoku ʻaonga.
Ko ʻEtau Fuakava ʻo e Manavaʻofá
ʻOku finangalo e Tamai Hēvaní ke manavaʻofa ʻEne fānaú (vakai, 1 Kolinitō 12:25–27). Ke tau hoko ko ha kau ākonga moʻoní, kuo pau ke tau fakatupulaki mo fakahaaʻi ha manavaʻofa ki he niʻihi kehé, tautefito kiate kinautolu ʻoku faingataʻaʻiá (T&F 52:40).
ʻI heʻetau toʻo kiate kitautolu ʻa e huafa ʻo Sīsū Kalaisí ʻo fakafou ʻi heʻetau fuakava he papitaisó, ʻoku tau fakamoʻoni ai ʻoku tau loto fiemālie ke manavaʻofa. Naʻe akonaki ʻa Palesiteni Henry B. Eyring, ko e Tokoni Ua ʻi he Kau Palesitenisī ʻUluakí ʻo pehē, ʻoku tokoniʻi kitautolu ʻe he meʻafoaki ʻo e Laumālie Māʻoniʻoní ke tau fai ia: “Ko ha mēmipa fuakava koe ʻo e Siasi ʻo Sīsū Kalaisí. …
“Ko e ʻuhinga ia ʻokú ke fie tokoniʻi ai ha taha faingataʻaʻia ke ne laka ki muʻa neongo ha meʻa fakamamahi mo faingataʻa. Naʻá ke palōmesi ange te ke tokoni ki he ʻEikí ke fakamaʻamaʻa ʻenau kavengá mo fakafiemālieʻi kinautolu. Naʻe foaki atu kiate koe ʻa e mālohi ke ke tokoni ʻi hono fakamaʻamaʻa e ngaahi kavenga ko iá, ʻi he taimi naʻá ke maʻu ai e meʻafoaki ʻo e Laumālie Māʻoniʻoní.”1
Hangē ko ʻení, naʻe tofanga ha fefine ʻi Lūsia ʻi ha faingataʻa fakafāmili naʻe ʻikai ai ke ne toe lava ʻo ʻalu ki he lotú, ʻo laka hake ʻi he taʻu ʻe taha. Naʻe tokoni leva ha fefine ʻe taha ʻi he koló he Sāpate kotoa pē, ʻo ne telefoni ki ai ʻo fakamatala ange ʻa e ngaahi leá, lēsoní, uiuiʻi ngāue fakafaifekaú, fanga kiʻi pēpē ne faʻeleʻí pea mo ha ngaahi ongoongo kehe pē kau ki he koló. ʻI hono fakaleleiʻi ko ia e palopalema fakafāmili ʻa e fefiné, naʻá ne kei ongoʻi pē ʻokú ne kau atu ki he koló tupu mei he telefoni fakauike ange ʻa hono kaungāmeʻá.