Kae ʻOua Ke Tau Toe Feʻiloaki
ʻOku ʻOmi ʻe he Tohi ʻa Molomoná ʻa e Mahú
“The Book of Mormon—Keystone of Our Religion,” Ensign, Nov. 1986, 6–7.
ʻOku ʻi ai ha mālohi he tohí ʻoku kamata ke tafe mai ki hoʻo moʻuí he momeniti te ke kamata ako fakamātoato ai ʻa e tohí.
Tā fakatātaaʻi ʻe BjornThorkelson
“ʻIkai ‘oku ‘i ai ha meʻa ‘oku ongo loloto ‘i hotau lotó ‘oku tau fakaʻānaua ai ke tau ‘unuʻunu atu ke tau ofi ange ki he ‘Otuá, ke tau hoko ‘o tatau mo ia ‘i heʻetau fononga fakaʻahó, ke tau ongoʻi ‘oku ‘iate kitautolu Hono mālohí maʻu ai pē? Kapau ‘oku pehē, ‘e tokoniʻi kitautolu ʻe he Tohi ʻa Molomoná ke tau lava ‘o fakahoko ia ‘o laka hake ‘i ha toe tohi kehe.
ʻOku ʻikai ke akoʻi mai pē kiate kitautolu ʻe he Tohi ʻa Molomoná ʻa e moʻoní, neongo ʻokú ne fai ia. ʻOku ʻikai ke fakamoʻoni mai pē kiate kitautolu ʻe he Tohi ʻa Molomoná kia Kalaisi, neongo ʻokú ne toe fai mo ia foki. Ka ʻoku ʻi ai mo ha toe ʻuhinga kehe. ʻOku ʻi ai ha mālohi ʻi he tohí ʻe kamata ke tafe atu ia ki hoʻo moʻuí ʻi he momeniti ko ia ʻokú ke kamata ke ako fakamātoato ai ʻa e tohí. Te ke maʻu ai ha mālohi lahi ange ke ke fakafepakiʻi ʻaki ʻa e ʻahiʻahí. Te ke maʻu ʻa e mālohi ke ke fakaʻehiʻehi mei he kākaá. Te ke maʻu ai mo e mālohi ke nofo maʻu ‘i he hala fāsiʻi mo lausiʻí. ʻOku ui ʻa e folofolá ko e “ngaahi folofola ʻo e moʻuí” (T&F 84:85), pea ʻoku hala ha feituʻu ʻe toe moʻoni ange ai ka ʻi he Tohi ʻa Molomoná. Ko e taimi ʻokú ke kamata ai ke fiekaia mo fieinua ki he ngaahi folofola ko iá, te ke maʻu ʻa e moʻuí ʻo mātuʻaki lahi fau. …
ʻOku hanga ʻe he ngaahi talaʻofa ko ʻení—ʻo fakatupulaki ʻa e ʻofa mo e uouangataha ʻi he ʻapí, ha fefakaʻapaʻapaʻaki lahi age ʻi he vahaʻa ʻo e mātuʻá mo e fānaú, ha tuʻunga fakalaumālie mo e māʻoniʻoni māʻolunga ange—ʻo ʻikai ko ha ngaahi talaʻofa noa pē, kae tatau tofu pē mo e meʻa naʻe ʻuhinga ki ai ʻa e Palōfita ko Siosefa Sāmitá, ʻi heʻene pehē ʻe tokoni ʻa e Tohi ʻa Molomoná ke tau ʻunu ʻo ofi ange ki he ʻOtuá. …
Naʻá ku fai ʻa e lea ko ʻení ʻo kau ki he Tohi ʻa Molomoná ʻi he taʻu ʻe hongofulu tupu kuo hilí:
“ʻOku makatuʻunga nai e ngaahi nunuʻa taʻengatá ʻi heʻetau tali ki he tohi ko ʻení? ʻIo, ki hotau tāpuakí pe fakamalaʻiá.
“ʻOku totonu ke hoko hono ako ʻo e tohí ni ko ha meʻa ke fai ʻe he Kāingalotu kotoa pē ʻi he kotoa ʻo e moʻuí. He ka ʻikai, ʻokú ne tuku ai hono laumālié ʻi ha tuʻunga fakatuʻutāmaki pea taʻe tokanga ki he meʻa ko ia ʻokú ne ʻoange ʻa e uouangataha fakalaumālie mo fakaʻatamai ki heʻene moʻuí kotoá. ʻOku ʻi ai e faikehekehe ʻi he taha ului ʻoku langa ʻi he funga maka ʻo Kalaisí ʻo fou he Tohi ʻa Molomoná pea kei pikimaʻu ki he vaʻa ukameá, pea mo ia ʻoku ʻikaí.”
… ʻOua te tau nofo ʻi he halaiá … ʻi heʻetau toʻo maʻamaʻa e meʻaʻofa maʻongoʻonga mo fakaofo ko ʻeni kuo foaki mai ʻe he ʻEikí kiate kitautolú. Ka tau ikunaʻi muʻa ʻa e ngaahi talaʻofa ʻoku fekauʻaki mo hono mataʻikoloa ʻaki ia ʻi hotau lotó.